السلام علیکم،
لیں جی، آخر کار ہمیں احباب کے تعاون سے اسکینر مل گیا۔ کچھ ساتھیوں نے پے پال پر رقم بھجوائی اور ایک صاحب نے شاید بیرون ملک کہیں سے پچاس ہزار کی خطیر رقم کراچی میں کسی کو ٹرانسفر کی، جنہوں نے آگے مجھ تک بذات خود پہنچائی۔ تعاون کرنے والے تمام احباب کا بہت بہت شکریہ۔ اللہ تعالیٰ سب کے اخلاص کو قبول فرمائیں اور دنیا و آخرت میں بہتر اجر عطا فرمائیں۔ آمین ۔
لیکن درحقیقت ہمیں پورا اسکینر ہی امریکہ سے ایک شخصیت نے بھجوا دیا، اور پھر اسکینر کے شپمنٹ کے اخراجات بھی اٹھائے۔ یہاں کسٹمز سے کلیئر کروانے میں بھی کافی پیسے لگ گئے۔ کل ملا کر یہ ایک اسکینر کم و بیش ایک لاکھ روپے تک کا پڑا ہے۔ اللہ تعالیٰ انہیں جزائے خیر عطا فرمائیں۔ آمین۔
دیگر احباب جنہوں نے اسکینر کی مد میں رقم بھجوائی تھی، ہم انہیں یقین دہانی کرواتے ہیں کہ ان کی رقم ان شاء اللہ دین ہی کے کام میں صرف کی جائے گی۔ اگرچہ ہم کچھ رقم بچا کر رکھنا چاہتے ہیں کہ جن سے خود کار اسکینر خریدا جا سکے، جس کا پچھلی پوسٹس میں ذکر بھی کیا تھا۔ لیکن ہمارے آئندہ اخراجات کا مرکز اب حدیث پراجیکٹ ہے، لہٰذا بالکل درست طور پر کچھ بھی کہنا مشکل ہے۔