![محدث فورم [Mohaddis Forum]](/styles/default/xenforo/Forum.jpg)
محمد ارسلان
خاص رکن
- شمولیت
- مارچ 09، 2011
- پیغامات
- 17,861
- ری ایکشن اسکور
- 41,093
- پوائنٹ
- 1,155
{علم حدیث کو طلب کرنا ساری عبادتوں سے افضل عبادت ہے}
امام سفیان ثوری رحمہ اللہ فرماتے ہیں میں نہیں جانتا کہ روئے زمین پرکوئی عمل علم حدیث کی طلب سے افضل ہو اس کے لئے جو اللہ تعالیٰ کی رضا مندی چاہتا ہو۔آپ کافرمان ہے کہ میرے نزدیک حدیث سے بڑھ کر بوجھل اور اس سے افضل چیز کوئی اور نہیں۔ افضل تو اس کے لئے ہے جس کا ارادہ آخرت کا ہے اگر یہ ارادہ نہ ہوتوبڑا خوف ہے۔
فرماتے ہیں جو شخص اللہ تعالیٰ کو خوش کرنا چاہتا ہومیرے علم میں تو اس کے لئے حدیث سے افضل اور کوئی چیز نہیں۔ دیکھو تو تمام مسلمانوں کو اپنے کھانے پینے تک میں اس کی ضرورت رہاکرتی ہے۔
امام وکیع بن جراح رضی اللہ عنہ فرماتے ہیں کوئی عبادت اللہ تعالیٰ کے نزدیک حدیث کے پڑھنے پڑھانے سے زیادہ افضل نہیں۔
بشر بن حارث رحمہ اللہ فرماتے ہیں جو شخص اللہ تعالیٰ سے ڈرتا ہو اور نیک نیت ہو میں نہیں جانتا کہ روئے زمین پر اس کے لئے کوئی عمل طلب حدیث سے بھی افضل ہو رہا۔ رہا میں، سو میں تو اپنے ہر قدم پر جو میں نے اس میں اٹھایا ہو استغفار کرتا ہوں۔
{حدیث کی روایت تسبیح خوانی سے بھی افضل ہے}
امام وکیع رحمہ اللہ فرماتے ہیں اگر روایت حدیث میرے نزدیک تسبیح خوانی سے بہتر نہ ہوتی تو میں ہرگز روایت حدیث میں مشغول نہ ہوتا۔
(امام وکیع کے اس قول پر اہل علم حضرات روشنی ڈالیں)
{حدیث کی روایت کا درجہ درس قرآن جیسا ہے}
سلیمان تیمی رحمہ اللہ فرماتے ہیں کہ ہم ابو مجلز رحمہ اللہ کے پاس تھے اور وہ ہمیں حدیثیں سنا رہے تھے تو ایک شخص نے کہا کاش کہ آپ قرآن پاک کی کوئی سورت پڑھتے؟ تو ابو مجلز رحمہ اللہ نے جواب دیا کہ میرے نزدیک علم حدیث بھی کسی سورت کی تلاوت سے کم نہیں۔
(اس قول پر اہل علم حضرات روشنی ڈالیں)
{حدیث کی روایت کا ثواب نماز پڑھنے کے برابر ہے}
محمد بن عمرو بن عطا کہتے ہیں کہ موسیٰ بن یسار ہمیں حدیثیں سنا رہے تھے تو سیدنا ابن عمررضی اللہ عنہ نے ان سے فرمایا جب آپ حدیث بیان کرنے سے فارغ ہوںتب سلام کیجئے گا۔ اس لئے کہ آپ گویا نماز میں ہیں۔
(اس قول پر اہل علم حضرات روشنی ڈالیں)
{حدیث کی روایت نفل نماز سے افضل ہے}
امام وکیع رحمہ اللہ فرماتے ہیں اگر میں جانتا کہ نفل نماز کا پڑھنا حدیث بیان کرنے سے افضل ہے تومیں ہر گز حدیث بیان نہ کرتا۔
امام قعبنی رحمہ اللہ سے بھی یہی فرمان منقول ہے۔
عمر بن سہیل رحمہ اللہ سے معافی ابن عمران اہلحدیث سوال کرتے ہیں کہ اے ابو عمران! آپ کے نزدیک یہ افضل ہے کہ حدیث لکھوں؟ آپ نے جواب دیا کہ ایک حدیث کا لکھنا میرے نزدیک رات بھر کی نماز سے افضل ہے۔
محمد بن عبدالعزیز رحمہ اللہ کے پاس ابو زرعہ رحمہ اللہ کا مکتوب وصیت کے بارے میں آیا انہوں نے صبح سے لے کر جمعہ کی نماز کے وقت تک اسکو پڑھا۔ پھر جمعہ کے دو فرض پڑھ کر اسے پڑھنے لگ گئے۔ عصر تک پڑھتے رہے عصر کے بھی صرف فرض پڑھے۔ اس دن نوافل پڑھے ہی نہیں اور ان حدیثوں کے پڑھنے میں مشغول رہے اسلئے کہ حدیث کا پڑھنا نفل نماز سے افضل ہے۔
(اس قول پر اہل علم حضرات روشنی ڈالیں)
{حدیث کا لکھنا نفلی روزوں سے افضل ہے}
امام احمد بن حنبل رحمہ اللہ سے سوال ہوتا ہے کہ ایک شخص تو نفلی روزوں اور نفلی نمازوں میں مشغول ہے او ردوسرا شخص حدیث کے لکھنے میں مشغول ہے۔ فرمائیے آ پ کے نزدیک کون افضل ہے ؟آپ نے فرمایا حدیث لکھنے والا۔سائل نے کہا آپ نے اسے اس پر فضیلت کیسے دیدی؟ فرمایا اس لئے کہ کوئی یوں نہ کہے کہ لوگوں کو ہم نے ایک چیز پر پایا اور ان کے ساتھ ہولئے 1
امام ابوبکر احمد بن علی خطیب رحمہ اللہ رحمہ اللہ اس کتاب کے مصنف فرماتے ہیں کہ بالخصوص اس زمانہ میں تو حدیث کا سیکھنا ہر قسم کی نفلی عبادت سے افضل اور بہتر ہے۔ اسلئے کہ سنتیں مٹتی چلی جارہی ہیں ان پر سے عمل اٹھتا چلا جارہا ہے اور بدعت اور بدعتی بڑھتے چلے جارہے ہیں۔
یحییٰ یمان رحمہ اللہ کا بھی قول ہے کہ آج کل طلب حدیث بہترین عبادت اور خیروبرکت کا باعث ہے لوگوں نے کہا امام صاحب ان طالب علموں کی نیت نیک کہاں ہوتی ہے ؟آپ نے فرمایا طلب حدیث خود نیک نیتی ہے۔
1۔ یعنی حدیثیں نہیں ہونگی تولوگ دوسروں کی تقلید اور پیروی کرینگے۔
(اس قول پر اہل علم حضرات روشنی ڈالیں)
