ایک عالمِ دین کی بذلہ سنجی

[عمران اسلم]

شیخ عبداللہ المطلق سعودی عرب کے بڑے علمائے کبار کمیٹی کے رکن ہیں۔ اُنکا شمار فی البدیہ اور فوراً فتویٰ دینے کے حوالے سے مشہور ترین علماء میں ہوتا ہے۔ اپنی بذلہ سنجی، ظرافت اور پُر مزاح طبیعت کی وجہ سے عوام میں ایک خاص مقام رکھتے ہیں۔ ٹی وی پر براہ راست پروگراموں میں اُن سے پوچھے گئے سوالات کے جواب سننے کے لائق ہوتے ہیں۔
ذیل میں اُنکے کچھ دلچسپ جوابات پیشِ خدمت ہیں:

ٹی وی پر، ایک مرتبہ ایک لڑکی نے ٹیلیفون کر کے پوچھا؛ شیخ صاحب، میری امی بہت عمر رسیدہ ہے اور چل پھر بھی نہیں سکتی۔ اشد ضرورت اور حوائج کیلئے فقط رینگ کر چلتی ہے۔ میرا سوال یہ ہے کہ اسلام میں میری امی کس صنف میں آتی ہے؟
شیخ صاحب نے جواب دیا؛ تمہاری امی رینگ کر چلنے والی مخلوقات میں آتی ہے!

... ....
ایک پروگرام کے دوران یمن سے ایک سائل نے ٹیلیفون کر کے پوچھا؛

شیخ صاحب، میرے موبائل میں قرآن شریف کی بہت سی تلاوت بھری ہوئی ہے۔ کیا میں موبائل کے ساتھ بیت الخلاءمیں جا سکتا ہوں؟
شیخ صاحب: ہاں جا سکتے ہو، کوئی حرج نہیں۔
سائل نے سوال دہرایا: شیخ صاحب، میں موبائل میں قرآن شریف کے بھرے ہونے کی بات کر رہا ہوں۔
شیخ صاحب: میرے بھائی! کوئی حرج نہیں، قرآن شریف موبائل کے میموری کارڈ میں ہوگا، تم اُسے ساتھ لیکر بیت الخلاءمیں جا سکتے ہو۔
سائل: لیکن شیخ صاحب یہ قرآن کا معاملہ ہے۔ اور بیت الخلاءمیں ساتھ لے کر جانا اچھا تو ہرگز نہیں ہے ناں!
شیخ صاحب؛ کیا تمہیں بھی کُچھ قرآن شریف یاد ہے؟
سائل: جی شیخ صاحب، مُجھے کئی سورتیں زبانی یاد ہیں۔
شیخ صاحب: تو پھر ٹھیک ہے، اگلی بار جب تُم بیت الخلاء جاؤ تو اپنے دماغ کو باہر رکھ جانا۔

.... ....

سعودی چینل کی براہِ راست نشریات میں ایک سائل نے شیخ صاحب کو ٹیلیفون کر کے پوچھا، شیخ صاحب میں نے غصے کی حالت میں اپنی بیوی کو طلاق دیدی ہے۔ اب کس طرح اُس سے رجوع کروں؟
شیخ صاحب نے جواب دیا؛ میرے بھائی طلاق ہمیشہ ہی غصے کی حالت میں دی جاتی ہے۔ کیا کبھی تم نے ایسا سنا یا دیکھا ہے کہ کسی نے اپنی بیوی کو طلاق دی اور وہ مزے سے بیٹھا تربوز کے بیج چھیل کر کھا رہا تھا؟

.... ....
ایک سائل نے ٹیلیفون کر کے پوچھا؛

شیخ صاحب، کیا غسلِ جنابت کےلئے ناخن بھی کاٹنے پڑیں گے؟
شیخ صاحب نے تعجب بھرے انداز میں جواب دیا؛
روزانہ غسلِ جنابت کرو تو کاٹنے کیلئے ناخن کہاں سے لاؤ گے؟

.... ....
ایک پروگرام میں سائلہ نے پوچھا:

شیخ صاحب، کچن میں برتن دھونے سے کیا میرا وضوءٹوٹ جائے گا؟
شیخ صاحب نے جواب دیا: کیا تمہارے برتن پیشاب کرتے ہیں؟

.... ....
ایک عورت نے ٹیلیفون کر کے اپنا مسئلے کا حل پوچھا، شیخ صاحب نے جواب دیدیا تو عورت نے شیخ صاحب سے کہا:

شیخ صاحب، میرے لئے دُعا کیجئے کہ اللہ تعالیٰ میرے نصیب میں شیخ محمد العریفی سے شادی لکھ دے۔
شیخ صاحب نے سائلہ سے پوچھا، تم شیخ محمد العریفی سے شادی اُس کے خوبرو ہونے کے باعث کرنا چاہتی ہو یا اُس کے علم کی وجہ سے؟
سائلہ نے جواب دیا؛ شیخ صاحب، میں اُن سے شادی اُن کے علم کی وجہ سے کرنا چاہتی ہوں۔
شیخ صاحب نے جواب دیا؛ تو پھر شیخ صالح السدلان اُس سے زیادہ بڑے عالم ہیں۔ میں دُعا کرتا ہوں کہ اللہ تمہاری شادی شیخ صالح السدلان سے کرادے!
(واضح رہے کہ شیخ محمد العریفی ایک نوجوان اور نہایت ہی خوبرو عالمِ دین ہیں جبکہ شیخ صالح السدلان صاحب نہایت ہی ضعیف العمر عالم دین ہیں)

شیخ صاحب کی بات سُن کر پروگرام کا کمپیئر اسقدر زور سے کھکھلا کر ہنسا کہ کافی دیر تک اپنے آپ پر قابو بھی نہ پاسکا۔
.... ....
البتہ ایک بار خود شیخ کے ساتھ اِس طرح ہوا کہ ایک مصری سائلہ نے ٹیلیفون کر کے پوچھا:

شیخ صاحب، میرے خاوند کا میرے ساتھ بہت ہی غلط رویہ ہے۔ میری کوئی بات نہیں مانتا۔
شیخ صاحب نے جواب دیا؛ تم اُسے اپنے اچھے اخلاق کے جادو سے قابو کرو۔
سائلہ نے پوچھا؛ یہ جادو میں یہاں سے کرواؤں یا واپس مصر جا کر کرواؤں؟

انتخاب: محمد سلیم شانتو​

 

[ارشد]

ماشااللہ ،یٰہ علم و دانایی قران و سنت کے فہم کی دین ہے۔۔
شیخ محترم عبداللہ المطلق کے اور بھی سوالوں کے جوابات کی گزارش ہے؟

 

[محمد ارسلان]

السلام علیکم
ہاہاہاہاہا
بہت زبردست ،واقعی مزاحیہ جواب ہیں،مجھے ان کی ویڈیو یا آڈیو چاہیے کیا مل سکتی ہے۔
پہلے شیخ صاحب دوسروں کے ساتھ مزاح کرتے آئے اینڈ میں شیخ صاحب کے ساتھ ہاتھ ہو گیا۔ہاہاہاہاہاہا
خصوصا یہ دو جواب شیخ صاحب کے بہت زبردست ہیں،مجھے بڑی ہنسی آئی یہ پڑھ کر۔

سعودی چینل کی براہِ راست نشریات میں ایک سائل نے شیخ صاحب کو ٹیلیفون کر کے پوچھا، شیخ صاحب میں نے غصے کی حالت میں اپنی بیوی کو طلاق دیدی ہے۔ اب کس طرح اُس سے رجوع کروں؟
شیخ صاحب نے جواب دیا؛ میرے بھائی طلاق ہمیشہ ہی غصے کی حالت میں دی جاتی ہے۔ کیا کبھی تم نے ایسا سنا یا دیکھا ہے کہ کسی نے اپنی بیوی کو طلاق دی اور وہ مزے سے بیٹھا تربوز کے بیج چھیل کر کھا رہا تھا؟

ایک پروگرام میں سائلہ نے پوچھا:

شیخ صاحب، کچن میں برتن دھونے سے کیا میرا وضوءٹوٹ جائے گا؟
شیخ صاحب نے جواب دیا: کیا تمہارے برتن پیشاب کرتے ہیں؟

 

[شاہد نذیر]

ماشاءاللہ بہت ہی پر لطف تحریر ہے۔اگر ممکن ہو تو مزید اس طرح کی باتیں شیئر کریں۔جزاک اللہ