تعلیم قرآن

[محمد نعیم یونس]

باب: ۳

تعلیم قرآن

تعلیم:
علم الصرف میں لفظ تعلیم ، تفعیل کے وزن پر ہے۔ جس کی خصوصیت میں تصییر(ہوجانا، بنانا) کا معنی ہوتا ہے۔ جیسے
وَتَّرَ القَوْسَ۔
اس نے کمان کو زرہ دار بنایا۔
اسی طرح تعلیم کا معنی ہوگا کہ بتدریج مگر تسلسل کے ساتھ کسی کو علم کی روشنی سے منور کرنا۔ تاکہ وہ تاریکیوں میں نہ بھٹکے۔ عربی میں لفظ تعلیم میں علم دینے کے ساتھ دینی، اخلاقی اور عملی تربیت و صحیح راہنمائی کا پہلو بھی ہے۔اس لئے تعلیم القرآن کا مطلب کسی ناواقف کو بتدریج قرآنی علم سے آراستہ کرکے اسے عملی اور اخلاقی اعتبار سے صاحب قرآن بنانا۔ اسے ایسے علم سے مزین کرنا جو قرآن کے الفاظ وعبارات کو اور ان کے مفاہیم کو رسوخ سے پہچان پائے اور عالم ربانی کہلائے۔ظاہر ہے یہ تعلیم، قرآن کو ایک بار پڑھنے سے حاصل نہیں ہوتی بلکہ بار بار پڑھنے اور غورو فکر سے حاصل ہوتی ہے۔

اس کی اہمیت وضرورت :
قرآن کریم کتاب ہدایت ہے۔ اس کے بے شمار ایسے پہلو ہیں جن کا جاننا از بس ضروری ہے۔ اس میں اس کی اپنی لغت ہے ضرب الأمثال ہیں،غریب، مشکل، مترادف الفاظ ہیں مثلاً: قلب، فؤاد اور صدر میں کیا فرق ہے۔، اور متباین کلمات ہیں، یَشْرِیْ، المَولٰی وغیرہ یا اضداد میں سے ہیں جیسے لفظ ظن اور زعم وغیرہ ہیں۔ بعض کلمات ہیں ان کا لفظی مطلب کچھ اور بنتا ہے مگر اس سے مراد کیا ہے۔جیسے رَیْبَ الْمَنُونِ وغیرہ۔ ان سب کو جاننے کے لئے فقہ اللغہ کا علم بہت ضروری ہے۔

 

[محمد نعیم یونس]

٭… قرآن مجید ہر دور کے لئے نئی کتاب ہے۔یہ ایک Living Book زندہ کتاب ہے ۔ اس کی تعلیم وتعلم کے لئے ہر دور کے عصری علوم کا جاننا انتہائی ضروری ہے تاکہ دلوں کے تالے کھلیں،تدبر وتفکر کی عادت طلبہ میں پیدا ہو۔ سورج کی روشنی کی طرح قرآن اپنا نور وعلم پھیلاتاجائے۔ جتنی کھلی اور بڑی کھڑکی ہوگی اتنی سورج کی روشنی زیادہ پہنچے گی ۔قرآن کریم کو سمجھنے کے لئے بھی جتنا بڑا ظرف ہوگا اتنا ہی فائدہ ہو گا۔

٭…دور حاضر الیکٹرانک میڈیا کا دورہے۔ اس کی جنگ نے نظریاتی سرحدیں برائے نام ثابت کردی ہے۔اس جنگ میں جھوٹ ، فحاشی اور استحصال عام ہے۔تعلیم قرآن ہی اس جنگ کا مقابلہ کرنا سکھاتی ہے ۔ہماری شکست وریخت کا مداوا اسی کی تعلیم میں ہی ہے۔اگر اللہ کے اس کلام پر ہمارا ایمان ہو تو ہمیں دوست ودشمن کی صحیح تمیز ہوسکتی ہے۔اس میں بہت سی تنبیہات ہیں جن کے اسباق ہمیں بار بار یاد کرائے گئے ہیں جو شاید ہمارے مشکل حالات میں راہنمائی کردیں۔ عباد الرحمن بننا ہمارا کام ہے اور رحمن الدنیا بننا اس کا۔

 

[محمد نعیم یونس]

٭…اس میں پیشین گوئیاں ہیں۔تاریخ ہے جس کی تحدید کرنا بہت مشکل ہے۔ مثلاً:
{إذ قالوا لنبی لہم ابعث لنا ملکاً }۔
موسیٰ علیہ السلام کے بعد یہ کون سے نبی تھے؟ اس کا تعین اسرائیلیات کا گہرا مطالعہ چاہتا ہے۔ پھرذرا آگے {وقد أخرجنا من دیارنا} سے کیا مراد ہے کس نے انہیں ان کے علاقوں سے نکالا تھا؟ اور بیت المقدس اگر اس سے مراد ہے تو پھر کون سا وہ بادشاہ تھا جس نے غلبہ پاکر انہیں بے دیس کیا۔اسی طرح{ لتفسدن فی الأرض مرتین} میں مرتین سے کیا مراد ہے؟ کیا یہ ہوچکا یا کچھ باقی ہے؟ اس کا تعین خاصا تاریخی مطالعہ چاہتا ہے۔

٭…کائنات کی بے شمار نشانیاں ہیں جن کے لئے بے پناہ عصری علوم کی ضرورت ہے۔جن کا حاصل کرنا بہت ضروری ہے۔

٭…مختلف مذاہب کے غلط عقائد ونظریات سے قرآن نے آگاہ کیا ہے ؟ انہیں سمجھنے کے لئے ایسے مذاہب کی اصل زبان کا علم ہونا تاکہ اصل مصادر سمجھے جاسکیں،پھر ان کا تقابلی مطالعہ کرنا ایک طالب علم کے لئے بہت ضروری ہے۔

 

[محمد نعیم یونس]

٭…قرآن، ایک نظریہ وعقیدہ کی کتاب ہے۔ جس میں سراسر توحید کی دعوت ہے۔اس میں بیان شدہ شریعت، راہنما شریعت ہے۔اس کے مقابل میں بے شمار نظریات، اور ازم اٹھے، قانون بنے جو وقتی سیاسی غلبہ حاصل کرنے کے بعد مغلوب ہوگئے۔ مگر کیا یہی قوانین انسانوں میں مساوات یا متوازن زندگی کی ضمانت دے سکے؟۔قرآن نے اپنے بہی خواہوں کو تاریخ کی ایک مثال دے کر ضمانت دے دی کہ خلفاء راشدین کے عہد میں ایسا ممکن ہوسکا ہے۔ اس لئے ا س کی تعلیمات سمجھنا اور تسلیم کرنا ضروری ہے۔

٭…تاریخ یہود اور آغاز مسیحت ، دونوں مسخ شدہ ہیں۔اور مشرکانہ مذاہب کا سر پیر نہیں۔ قرآن کریم کے مطابق ، ان کی تاریخ دجل وفریب اور دہشت وبربریت کی تاریخ ہے۔انسانی خون کی ہولی کھیلنے والے کیا انسانیت کے راہنما بن سکتے ہیں۔یہ سب مذاہب جھوٹ کے سہارے چل رہے ہیں۔انٹر نیٹ پر ان کے گھر کے بے شمار بھیدی لنکا ڈھارہے ہیں۔قرآن کریم نے اسی جھوٹ کا انکشاف پندرہ سوسال پہلے کردیا تھا۔اس لئے ایک مومن یہی ایمان رکھتا ہے کہ دونوں نے علمی، روحانی اور اصلاحی بددیانتی کی ہے اور یہی ملزم ہیں۔قرآن کریم پہلی کتب کا مُہَیْمِن یعنی نگران یا ناسخ ہے۔دنیا بھر میں پھیلی مشرکوں کی بین الاقوامی منڈی اور ان کی متنوع مشرکانہ سرگرمیاں اور رسم ورواج کے ہر اہم پہلو پر قرآن نے روشنی ڈال دی ہے کیا مزید کچھ وضاحت کی ضرورت ہے۔ اس گنداور کیچڑ سے لت پت اس دنیا کو صرف قرآن کا طالب علم ہی صاف ستھرا اور امن کا گہوارہ بنا سکتا ہے۔اور سبھی کی گردنیں تبھی ایک ہی رب کی چوکھٹ پر جھکیں گی۔

 

[محمد نعیم یونس]

٭… ابن خلدون اپنے مقدمہ میں لکھتے ہیں:
عرب محض اہل زبان ہونے کی بناء پر قرآن کے اجمال وتفصیل سے کما حقہ آگاہ ہوجاتے تھے اور اس کے معنی ومفہوم کی تہہ تک پہنچ جاتے تھے۔(مقدمہ: ۴۸۰)

حالانکہ حقیقت یہ ہے کہ کسی بھی زبان میں لکھی ہوئی علمی تالیف محض اس زبان کے جاننے سے نہیں سمجھی جاسکتی بلکہ اس تالیف کو سمجھنے اور پڑھنے کے لئے زبان (Language) کی معرفت کے ساتھ ساتھ ذہنی وعقلی استعداد کی بھی ضرورت ہوتی ہے۔ اہل علم صحابہ میں سے بعض حضرات قرآن مجید کے بعض کلمات کے مفہوم وادراک سے عاجز رہے۔ أباً کیا معنی رکھتا ہے ؟ سیدنا عمر رضی اللہ عنہ نے لاعلمی کا اعتراف کیا ۔{ أو یأخذہم علی تخوف} میں تَخَوُّفٍ کا معنی کیا ہے برسر منبر صحابہ کرام سے سیدنا عمرؓ فاروق نے اس کا سوال کیا۔ایک ہذلی نے کھڑے ہوکر جواب دیا کہ اس کا معنی تَنَقُّصٍ ہے یعنی اتنی کمی کرنا کہ خوف آنے لگے۔ اور دلیل میں یہ شعر پڑھا:
تَخَوَّفَ الرَّحْلُ مِنْہَا تَامِکًا قَرَدًا کَمَا تَخَوَّفَ عُوْدَ النَّبْعَۃِ السَّفَنُ
اس کی پالان سکڑ کر ایسے کم پڑ گئی جیسے کھردری کھال تیروں کی لکڑی کو کم پڑ جاتی ہے۔(الموافقات:۴۰)

 

[محمد نعیم یونس]

سیدنا ابن عباسؓ فرماتے ہیں:
{ فاطر السموات} کا صحیح مفہوم میرے ذہن میں نہیں آرہا تھا حتی کہ دو اعرابی ایک کنویں کے متعلق نزاع میرے پاس لے آئے۔ ان میں سے ایک نے اپنے حق ملکیت کے ثبوت میں کہا:
أنَا فَطَرْتُہَا:
میں نے ہی پہلی مرتبہ اس کنویں کو کھودا ہے۔ یہ کلمہ سنتے ہی مجھے اس مشکل کا جواب مل گیا کہ فَاطِرَالسَّمٰوٰتِ کا کیا مطلب ہے۔

عدی بن حاتم رضی اللہ عنہ نے خیط أبیض اور خیط اسود کا جو مفہوم لیا وہ بھی اس خیال کو رد کرنے کے لئے کافی ہے کہ بعض صحابہ قرآن کے معنی ومفہوم کی تہ تک پہنچ جاتے تھے۔آپ ﷺ نے ہی ان کی اصلاح فرماتے ہوئے فرمایا:
إِنَّکَ لَعَرِیْضُ الْقَفَا، إِنَّما ہِیَ سَوَادُ اللَّیْلِ وَبَیَاضُ النَّہَارِ۔
تم چوڑی گدی والے ہو یعنی تم خوب موٹے ہو۔ اس سے مراد رات کی سیاہی اور صبح کی روشنی ہے۔

٭…یہ بھی ضروری نہیں کہ صحابہ کرام نے سارے قرآن کو سمجھا ہو۔کیونکہ انہیں سوال کرنے سے منع کردیا گیا تھا۔ دوسرا یہ کہ وہ اپنے دور کی ذہنی رسائی کے مطابق سوچ کر فیصلہ کرلیتے تھے۔ مثلاً فرعون کی لاش کے بارے میں آیت کے یہ الفاظ {الیوم ننجیک ببدنک لتکون لمن خلفک آیۃ}۔صحابہ نے یہ سوال نہیں کیا کہ فرعون کی لاش کہاں ہے؟ بلکہ انہوں نے اپنے فہم کے مطابق یہ سمجھ لیا کہ اس دور کے لوگوں کے سامنے اس کی لاش کو اللہ تعالی نے پیش کیا ہوگا اس لئے یہی ان کے لئے ایک بڑی نشانی یا عبرت تھی۔اسی طرح {ویخلق لکم ما لا تعلمون}۔ ان سواریوں کو اللہ تعالی پیدا کرے گا یاکرتا رہے گا جنہیں تم نہیں جانتے۔گدھے، خچر، گھوڑے اور اونٹ کے علاوہ کون سی ایسی سواریاں ہیں جنہیں اللہ تعالی پیدا کرتا رہے گا؟ صحابہ کرام نے ایسے سوال نہیں کئے بلکہ ان آیات سے سبق یہی لیا کہ جو ہستی انہیں پیدا کرسکتی ہے وہ بعد بھی قادر مطلق ہے کہ جو چاہے پیدا کرے۔اس لئے زمانہ حال کی سواریاں ہمارا ذہنی کمال ہے اور جس کا خالق اللہ تعالی ہی ہے۔

 

[محمد نعیم یونس]

٭… عربی زبان کو جوپختگی اور دوام حاصل ہے اس کی وجہ اس کی فصاحت وبلاغت اور الفاظ کا وسیع ذخیرہ (Vocabulary) ہونا ہے۔ایک خاندانی سسٹم کی طرح اس کا نظام ہے۔ماضی، مضارع، حاضر ومستقبل اور امر ونہی، اسم ظرف وافعل التفعیل کے ہمراہ مبالغے کے صیغے ہیں، مثلاً: اسم فاعل کا مبالغہ فَعَّال ہے۔ انسان زندگی میں ایک آدھ بار جھوٹ بولے تو اسے کاذِب کہتے ہیں۔ اور اگر ہر لفظ یا ہر بار جھوٹ بولے تو اسے کَذَّابٌ کہہ دیتے ہیں۔چڑیوں کی چونچ کو زَقْزَقَۃُ الْعَصَافِیْر کہتے ہیں اس لئے کہ اس کے حروف میں زَقْزَقَہ ہوتا ہے۔جو عَسْعَسَ کے بالکل مناسب ہے جو فعل ثنائی ہے۔ جس میں مضعف یا تکرار کا معنی ملتا ہے جیسے: اللَّیْلُ یُعَسْعِسُ۔ رات بتدریج آتی اور بتدریج چلی جاتی ہے۔ اس کی اپنی رموز (Abriviations)ہیں۔اس میں مترادفات واضداد ہیں۔لسان العرب میں ۸۰ہزار مادے ہیں۔ ہر مادے کے پچاس یا ساٹھ فعل یا اسم ہیں۔ جبکہ آج کل کی رائج زبانوں میں زیادہ سے زیادہ ۲۵ہزار الفاظ ہیں۔ان مادوں کے اعراب ہیں اور بڑے دقیق معانی اپنے اندر پوشیدہ رکھتے ہیں۔کبھی ایک ہی حرکت معنی کو بدل دیتی ہے۔ جیسے:
قدَم، یعنی سَبَقَہُ بِقَدَمِہِ، قدِمَ بمعنی حَضَرَ، اور قدُم بمعنی قدیم ہوگیا۔حتی کہ حروف کی بھی الفاظ میں مناسبت ہوتی ہے مثلاً: حرف سین جس لفظ میں ہوگا وہ داخلی شے ہوگی۔ جیسے: نَفْس، نَفَس، حِسّ، أُنْس، لَمْس، ہَمْس، وَسْوَسَہ، سِرّ۔ جس میں غین ہو نظر سے دور شے کے معنی اس میں ہوتے ہیں جیسے: غائب، غِشّ، غِیبت، غَلاء۔ جس کلمہ میں راء ہو اس میں تتالی یعنی پے در پے اور تکرار فعل کے معنی ہوں گے جیسے: جَرّ، مَرّ، کَرّ، فَرّ۔ قاف جس میں ہو وہ ایک دوسرے کو مارنے یا مزاحمت کرنا کے ہوں گے جیسے: طَرَقَ، بَصَقَ ، لَصِقَ، غَرِقَ۔ یہ محاسن دیگر بدلتی زبانوں میں کہاں ہیں؟ اپنے مدعا کو مختصر اور جامع انداز میں بیان کرنا اس کا شیوہ ہے۔اس میں نرمی وشدت اور شعور وجذبات سے مکمل وابستگی کا عنصر غالب ہے۔ دوسری زبانوں میں ایساقطعاً نہیں۔ بلکہ اس کا عربی صوتی آہنگ دوسری مقدس کتابوں کی آواز کو نگل لیتا ہے۔

 

[محمد نعیم یونس]

٭…اگر دنیاوی منفعت کے لئے دیگر زبانیں سیکھی جاسکتی ہیں تو عربی زبان کیوں نہیں سیکھی جاسکتی۔ عربی زبان کی برکت ہے کہ وہ دنیا کی معیاری اور دائمی ادبی زبان بن گئی ہے ۔ مسلمان بھی بلارنگ ونسل آپس میں اس زبان کی برکت ومحبت کی وجہ سے جڑے ہوئے ہیں۔سپین میں عربی زبان کے رواج نے یورپین زبانوں کو بے شمارعربی الفاظ بخشے جو آج بھی ان زبانوں میں بخوبی جانے جا سکتے ہیں۔

 

[محمد نعیم یونس]

٭…ہم سب دنیا کے مسافر وراہی ہیں جو ہماری زندگی کو برف کی طرح پگھلارہی ہے اور اپنی منزل کی طرف رواں دواں ہیں۔ مقصد سے لگن اور منزل پر پہنچنے کی تڑپ ہی مسافر کو جگائے رکھتی ہے۔ قرآن پاک کی تعلیم ہمیں اسی ابدی منزل کی کامیاب وروشن راہیں دکھاتی ہے۔جس کی خواہش ہر انسان کی ہے۔بحیثیت ایک مسلمان کے ہمارا اپنی منزل سے واقف ہونا اور اس کے حصول کے لئے تگ ودو کرنا فرض ہے۔جو تعلیم قرآن پر ہی منحصر ہے۔

٭…اسلاف امت اس فرض کو جانتے اور نبھاتے تھے۔ وہ قرآن کریم کے الفاظ ومعانی سیکھتے سکھاتے تھے۔یہی ذریعہ تھا جس سے وہ اللہ تعالی کی مراد سمجھ سکتے تھے۔اس لئے تو یہ کتاب ان کی روح اور خون میں رچ بس گئی تھی۔مشہور تابعی ابو عبد الرحمن السلمی کہتے ہیں ہمیں سیدنا عثمان غنی اور عبد اللہ بن مسعود وغیرہ رضی اللہ عنہم نے بتایا۔۔ جن سے ہم نے قرآن پڑھنا سیکھا۔ جب تک ہم رسول اکرم ﷺ سے دس آیات کی تلاوت کرنا اور ان پر عمل کرنا نہ سیکھ لیتے ہم آگے نہ بڑھتے تھے ۔ وہ کہا کرتے : ہم نے قرآن پڑھنا سیکھا، اس کا صحیح ادراک کیا اور اس پر عمل کیسے کرنا ہے وہ بھی جانا۔

 

[محمد نعیم یونس]

٭…یہ صحابہ تاجر بھی تھے، مزدور بھی، کسان بھی تھے اور بڑھئی بھی، دانشور بھی تھے اور مدبر بھی۔ دیہاتی بھی تھے اور شہری بھی۔ روزگار و پیشے یا دیگر مصروفیات کی بناء پر انہوں نے تعلیم قرآن کو فراموش نہیں کیا۔بلکہ اسے ہر لحاظ سے مفید وبابرکت پاکر سیکھا۔ ہمیں بھی آج ایسا ہی کرنے کی ضرورت ہے۔یہ قرآن سبھی کے لئے اترا تھا ۔اور ہرایک کے لئے تھا اور اسے ہر دل میں اتارنے کا کہا گیا تھا۔ اس لئے اسے کسی کی پراپرٹی نہیں کہاگیا۔

٭…قرآن کا علم انتہائی محترم اور ارفع واعلی علم ہے۔ یہی وہ کورس ہے جو بندہ مومن کو شہادہ عالیہ بخشتا ہے۔اسے رب کے ہاں عزت دیتا اور فرشتوں کے ہاں معزز بناتا ہے۔اسے ہی عام کرنے اور امت کی دینی ودنیاوی تعلیم و تربیت دینے کے لئے رسول اللہ ﷺ کو یہ کام سونپا گیا۔اس کے مقابلہ میں سبھی علم ہیچ ہیں۔یا اس کی معرفت کے بغیردینی معرفت کا دعوی بے کار ہے۔مسلمان سے مطلوب یہی علم ہے۔ اگر وہ دین کے اس اہم مصدر سے ناواقف ہے تو پھر فخر کس بات پر؟ اس لئے ضرورت ہے کہ اسے کتاب اللہ اورعربیت کے صحیح ذوق رکھنے والے عالم ہی سے سیکھا جائے۔تاکہ قرآن فہمی ہو اور جذبہ خدمت قرآن بھی ماند نہ پڑے۔اس کورس کے موضوعات چار ہیں:
{یَتْلُو عَلَیْْہِمْ آیَاتِہِ وَیُزَکِّیْہِمْ وَیُعَلِّمُہُمُ الْکِتَابَ وَالْحِکْمَۃ۔۔۔}َ ( الجمعہ : ۲ )
وہ انہیں قرآن پڑھ سناتا ہے ا ور ان کا تزکیہ بھی کرتا ہے اور انہیں تعلیم کتاب وحکمت دیتا ہے ۔