دھنک رنگ

[اخت ولید]

مبارک سلامت)))

 

[اخت ولید]

"عورتوں کی ترقی ہو گئی جی۔۔۔ہم گھروں میں آٹا گوندتی،تھپ تھپ روٹیاں پکاتی ہمیشہ جاہل کی جاہل رہیں گی۔۔دنیا آسمان پر پہنچی اور ہم زمین پر ہی لڑتے رہے اور اب ان کو دیکھو جی۔۔یہ خواتین کیا سے کیا بن گئیں اور ہم رہے نرے بدھو۔۔ہائے قسمت!!"کتنے ہی کوسنے دے ڈالے،پر دسمبر کی سردی میں بھی دل کو ٹھنڈ نہیں پڑتی تھی۔
"اب کیا ہو گیا؟؟"ضمیر کو ایسی سن گن لینے کی قدیم عادت ہے،یہ تو اب آپ بھی بخوبی جان چکے ہوں گے۔
"ہو نا کیا؟؟تم جیسے ہمزاد ہوں تو زندگی کب ڈھنگ کی گزرے گی؟؟وہی ہانڈی روٹی کر کے زندگی کے دن بیت گئے"
"یہ تو مجھے پتا ہے۔۔اب نئے سرے سے ہانڈی روٹی کیوں سنائی جا رہی ہے؟؟اچھا آج باہر کا چکر لگا ہے ناں؟؟بس بس۔۔۔وہی اثرات!!"
سیر کو سوا سیر ٹکرا تو سب غصہ فنا ہو کر دکھ سکھ نے جگہ بنائی"اب تم ہی بتاؤ۔۔عورتوں کے کرنے کے سو کام۔۔اورہم کیا کرتی ہیں؟ایک سا معمول۔۔میں تو سخت بیزار ہو چکی"
"اچھا۔۔کیوں پولیو دفتر پتا کروں؟"اس نے ہمدردی سے پوچھا۔
"نہیں نہیں۔۔وہ تو پرانا ہو چکا۔۔وہ پتا کیا۔۔وہ آج وہ خواتین مردم شماری کر رہی تھیں۔۔سچ مزا آگیا۔"
"اچھا میں سمجھا۔۔اچھے حلیے میں مانگنے والیاں ہیں۔۔گھر گھر جاتی تھیں"وہ آرام سے بولا۔
"رزق حلال کما رہی ہیں۔۔کچھ گناہ ہے کیا؟؟"میں بھنا اٹھی۔
" رزق حلال تو تھا مگر کمانے کا طریقہ کیسا تھا؟؟حکومت کو کوئی ڈھنگ کا نسخہ نہیں ملتا خواتین کی مدد کو،،کبھی گلابی رکشے اور کبھی گھر گھر گھومنا۔۔پھر واویلا مچا نا کہ معاشرے کے حالات برے ہیں۔پھر تم جیسوں کو اسٹوریز کہاں سے ملیں خاندانی مسائل پر بات کرنے کو؟؟اس لیے تم لوگوں کو بھی برا نہیں لگتا۔عورت جب بھی بلا ضرورت باہر نکلی،اس کا گھر سے رشتہ ختم ہو گیا۔الا ماشاءاللہ!گھر والے اس کی کمائی بھی استعمال کرتے ہیں اور من من کے جوتے بھی رسید کرتے ہیں۔قصور اس میں صرف عورت کا ہی نہیں۔۔مرد حضرات کا بھی ہے۔کلمہ پڑھ کر مسلمان ہوئے اور ایک سنت پر عمل نہ کیا۔پھر حکومت چار ہاتھ آگے۔۔جہاں مردوں کی ضرورت وہاں خواتین کو بھرتی کیا اور جہاں خواتین ہونی چاہئیں ،وہاں مرد تشریف فرما ہیں۔۔آج مرد ڈریس ڈیزائینر،میک اپ آرٹسٹ ہیں اور عورتیں ٹریفک وارڈن ہیں۔ریسیپشن پر عورت چاہیے اور بال سنوارنے کو مرد چاہیے۔۔خیر کل سے شیونگ کریم کے بل بورڈ لگانے کے لیے خواتین کی بھرتیاں ہو رہی ہیں کہتی ہو تو بات کر دیکھتا ہوں۔۔اب میں اتنا بھی دقیانوس نہیں ہوں جتنا تم مجھے سمجھ بیٹھی ہو!!!"

 

[اخت ولید]

اور میں پناہ مانگتی ہوں ترجیحات کے بدل جانے سے۔۔۔۔۔​

 

[اخت ولید]

سامنے ایک تصویر نظر آ رہی تھی۔۔سفید لبادوں اور وجود کو روحوں سے تعبیر کیا گیا تھا۔ایک روح کہہ رہی تھی"نجانے نئی روحوں کو کیا ہے؟ہر وقت اپنے ہاتھوں میں کیا ڈھونڈتے رہتے ہیں؟"
تصویر ایک لمحے کو رکی اور زن کر کےگزر گئی۔
"وہ کیا ڈھونڈ رہے ہوتے ہیں؟"پوچھا گیا۔
"موبائل دیکھ رہے ہوتے ہیں۔"ہنسی مسکراہٹ اور بات آئی گئی ہو گئی۔
فراغت ہوئی تو پردہ دماغ پر وہی تصویر ابھری۔۔وجود لرز اٹھا"ہاں وہ اپنے ہاتھوں کو دیکھ رہے ہیں کہ ان ہاتھوں سے آگے کیا بھیجا تھا؟؟ان ہاتھوں پر حسرت کر رہے ہیں کہ یہ تو ہمارے اپنے ہاتھ تھے،آج ہمارے خلاف گواہی کیونکر دے رہے ہیں؟ان ہاتھوں پر گریاں کناں ہیں کہ جن کو ان کے مقصد تخلیق کے برعکس استعمال کیا گیا تھا۔۔وہ ان ہاتھوں کی کمائی پر رو رہے ہیں۔"

 

[اخت ولید]

حیا:جو صرف عورت کی نشانی نہیں سمجھی جاتی تھی ۔۔۔اب عورت میں بھی عنقا ہے!!​

 

[اخت ولید]

نفس کو نیکی کے راستے پر گامزن کرنے کے لیے جس قدر محنت درکار ہوتی ہے اس سے کئی گنا محنت نیکی کے راستے پر ہمیشہ گامزن رہنے میں کرنا پڑتی ہے۔​

 

[اخت ولید]

"سنا حلب میں کیا کیا قیامتیں گزر گئیں؟"میرا کلیجہ شق ہونے کو تھا۔
"بی بی! پرانی باتیں چھوڑیے۔۔کچھ نئی سنائیے؟"ضمیر نے لا پروائی سے دوسری ٹویٹ کرتے ہوئے میری طرف دیکھا۔
"تمہیں مسخریاں سوجھی ہیں۔۔امت کا کیا سے کیا حشر ہو گیا؟"میں نے موبائل چھین کر دور اچھالا۔
"لگتا ہے کہ آپ کا انٹرنیٹ کنکشن نہیں آرہا"وہ بغور دیکھتے ہوئے بولا۔
"ضمیر!!کیا حالات ہو گئے ہیں۔۔کب تک مسلمانوں کے ساتھ یہ ہوتا رہے گا؟کب تک؟"میں چیخ چیخ کر بول رہی تھی۔
"اچھا۔۔تو آپ نے اس ضمن میں کیا کیا؟؟۔۔کتنی دعائیں مانگیں؟کوئی رت جگا؟کوئی قنوت نازلہ؟"وہ سنجیدگی سے پوچھ رہا تھا۔
میرا رنگ فق ہو گیا"یہ ذاتی اعمال ہیں میرے۔۔تمہیں پوچھ گچھ کی ضرورت نہیں۔۔"دل میں آج رات دو نفل پڑھنے کا ارداہ باندھا۔
"اچھا تو محترمہ۔۔امت کے بھی ذاتی اعمال اور افعال ہیں۔۔آپ کو بھی پوچھ گچھ کی ضرورت نہیں۔۔لیکن یاد رکھیے گا کہ یہ معاشرہ اور یہ بے ضمیر امت آپ جیسے ہی افراد کےانہیں ذاتی اور انفرادی کی بدولت یہاں تک پہنچی ہے۔۔کچھ مزید کہنا ہے آپ کو؟"وہ سیلفی اسٹک گھماتا پوچھ رہا تھا۔
"نہیں۔۔"میں نے سر اٹھانے کی ناکام کوشش کی۔
"چلیے تو پھر ایک سیلفی ہی ہو جائے اس بے ضمیر امت کے ایک فرد کے ساتھ۔۔میں بھی حلب تحترق کاہیش ٹیگ استعمال کرنے کے قابل ہو سکوں۔۔"
چند لمحات کے بعد وہ انسٹا گرام پر کیپشن دے رہا تھا"جی ہاں!حلب کی تباہی کے ذمہ دار یہی بے ضمیر مسلمان ہیں۔۔#حلبـتحترق"

 

[اخت ولید]

فارقتھم جسدا و القلب بینھم​

 

[خضر حیات]

لیکن یاد رکھیے گا کہ یہ معاشرہ اور یہ بے ضمیر امت آپ جیسے ہی افراد کےانہیں ذاتی اور انفرادی کی بدولت یہاں تک پہنچی ہے

قابل توجہ نکتہ ۔

 

[اخت ولید]

کچھ افراد اپنے آپ کو جانے افلاطون سمجھتے ہیں بقراط یا سقراط۔۔بہرحال انہیں جائز حد تک خوش ہونے دیجیے۔۔اپنی ٹانگ اڑا کر ان کا مزا کرکرا کرنے سے حتی الامکان گریز کریں ۔ یاد رکھیےمسلمان کو خوش کرنا بھی صدقہ ہے))