دیں کا جزوِ اکبر ہے حدیثِ سرورِ عالمؐ

[محمد آصف مغل]

حدیث سرورِ عالم ﷺ

نویدِ روح پرور ہے حدیثِ سرورِ عالمؐ
قرارِ قلبِ مضطر ہے حدیثِ سرورِ عالمؐ​

سکوں ملتا ہے اِس سے تشنہ کامانِ محبت کو
کلامِؐ میرِ کوثر ہے حدیثِ سرورِ عالمؐ​

حقیقت ہے پئے اہلِ بصیرت اے مسلمانو!
اِک اعجازِ پیمبرؐ ہے حدیثِ سرورِ عالمؐ​

نہ آئے گا نظر یہ ملحدِ خفاش کو ہرگز
اگرچہ مہرِ خاور ہے حدیثِ سرورِ عالمؐ​

کرے آخر کہاں تک وسعتیں خامہ بیاں اس کی
کہ حکمت کا سمندر ہے حدیثِ سرورِ عالمؐ​

اِدھر آ لوٹ کر اے رہروِ بیگانہِ منزل!
رہِ ایماں میں رہبر ہے حدیثِ سرورِ عالمؐ​

بتا دو تم یہ راسخؔ منکرِ شانِ نبوت کو
کہ دیں کا جزوِ اکبر ہے حدیثِ سرورِ عالمؐ​

(راسخؔ عرفانی)​