عقیدہ طحاویہ - امام ابو جعفر طحاوی

[محمد نعیم یونس]

اللہ کا غضب اور رضامندی

اللہ تعالی غصہ فرماتے ہیں اور خوش بھی ہوتے ہیں ، مگر اللہ کا غصہ اور رضامندی مخلوق کی طرح نہیں۔

 

[محمد نعیم یونس]

صحابہ رسول صلی اللہ علیہ و سلم اور خلفاء اربعہ

ہم صحابہ رسول سے محبت کرتے ہیں ، البتہ نہ کسی کی محبت میں غلو کرتے ہیں ، نہ کسی سے برأت کرتے ہیں ، اور جو کوئی ان سے بغض رکھے ، اور برائی سے ان کا ذکر کرے ، ہم ان سے بغض رکھتے ہیں۔
ہم تو صحابہ کا ذکر خیر ہی سے کریں گے۔ صحابہ سے محبت دین ، ایمان اور احسان ہے ، اور ان سے دشمنی کفر و نفاق اور سرکشی ہے۔
رسول اللہ صلی اللہ علیہ و سلم کے بعد اولا ہم حضرت ابوبکر رضی اللہ عنہ کے لیے خلافت مانتے ہیں ، اس لیے کہ آپ ہی پوری امت سے افضل اور مقدم ہیں۔ پھر حضرت عمر بن خطاب رضی اللہ عنہ کے لیے ، پھر حضرت عثمان رضی اللہ عنہ کے لیے ، پھر حضرت علی ابن طالب رضی اللہ عنہ کے لیے۔ یہی چار خلفاء راشدین اور ائمہ مہدیین ہیں۔

 

[محمد نعیم یونس]

عشرہ مبشرہ

جن دس صحابہ رضی اللہ عنہم کا نام لے کر نبی کریم صلی اللہ علیہ وسلم نے ان کو جنت کی بشارت دی ، ہم بھی ان کے حق میں جنت کی گواہی دیتے ہیں، جیسا کہ رسول اللہ صلی اللہ علیہ وسلم نے ان کے حق میں جنت کی گواہی دی ، اور نبی کریم صلی اللہ علیہ وسلم کی بات برحق ہے۔ یہ حضرات حسب ذیل ہیں.
ابوبکر رضی اللہ عنہ ،
عمر رضی اللہ عنہ ،
عثمان رضی اللہ عنہ ،
علی رضی اللہ عنہ ،
طلحہ رضی اللہ عنہ ،
زبیر رضی اللہ عنہ ،
سعد رضی اللہ عنہ ،
سعید رضی اللہ عنہ ،
عبد الرحمن بن عوف رضی اللہ عنہ ،
ابوعبیدہ بن جراح رضی اللہ عنہ۔

 

[محمد نعیم یونس]

بزرگان دین کو اچھے لفظوں یاد کرنا

جو شخص صحابہ رسول صلی اللہ علیہ وسلم اور ازواج مطہرات اور آل رسول صلی اللہ علیہ وسلم کے بارے میں گناہوں سے دور ہونے اور برائیوں سے پاک ہونے کی اچھی بات کرے ، وہ منافق نہیں ہو سکتا۔
علماء سلف ، ان کے متبعین نیک لوگ ، اور اہل فقہ اور اہل نظر کو اچھے لفظوں ہی سے یاد کیا جائے گا۔ اور جو ان کی برائی کرے وہ راہ راست پر نہیں۔
کسی ولی کو ہم کسی رسول سے افضل نہیں سمجھتے۔ بلکہ ہم یہ کہتے ہیں کہ فقط ایک نبی تمام اولیاء سے بڑھ کر ہے۔

 

[محمد نعیم یونس]

کرامات اولیاء

اولیاء کی کرامات کو ہم حق سمجھتے ہیں اور جو قصے معتبر حضرات سے مروی ہیں ، ان کو بھی درست سمجھتے ہیں۔

 

[محمد نعیم یونس]

علامات قیامت

اشراط ساعت (علامات قیامت) مثلاً خروج دجال ، حضرت عیسیٰ علیہ السلام کا آسمان سے نازل ہونا ، سورج کا مغرب سے طلوع ہونا ، اور ایک مخصوص چوپایہ جانور کا اس کی جگہ سے نکلنا وغیرہ پر ہم ایمان و یقین رکھتے ہیں۔

 

[محمد نعیم یونس]

دعوائے غیب کرنے والے کاہن اور نجومی

کسی کاہن اور نجومی کی ہم اس کی کہانت اور نجوم میں تصدیق نہیں کرتے۔ اسی طرح کتاب و سنت اور اجماع امت کے خلاف بات کرنے والے کسی کی ہم تصدیق نہیں کرتے۔

 

[محمد نعیم یونس]

جماعت کی شیرازہ بندی

جماعت مسلمین کی بات کو درست اور ان کی مخالفت کو گمراہی اور عذاب کا سبب سمجھتے ہیں ، اللہ کا دین آسمان و زمین میں ایک ہی ہے اور وہ "دین اسلام " ہے۔ اللہ تعالی فرماتے ہیں : " ان الدین عند اللہ الاسلام " (دین اللہ کے نزدیک اسلام ہی (معتبر) ہے)۔ " و رضیت لکم الاسلام دینا" ( تمہارے لیے میں نے دینِ اسلام کو پسند کیا۔)

 

[محمد نعیم یونس]

اسلام کی راہ اعتدال

دین اسلام افراط و تفریط کے درمیان ، تشبیہ و تعطیل کے ما بین ، جبر و قدر کے بیچ ، اطمینان و ناامیدی میں سے ایک راہ اعتدال فراہم کرتا ہے۔
یہ ہمارا مذہب اور عقیدہ ہے ، ظاہر میں بھی اور دل میں بھی۔
اور جو کوئی اس کا مخالف ہو ، ہم اللہ کے سامنے اس سے بری ہیں۔
ہم اللہ سے دعا کرتے ہیں کہ وہ ہمیں ایمان پر ثابت قدم رکھے اور ایمان پر خاتمہ فرمائے ، اور غلط خواہشوں پر چلنے سے ، جداگانہ رائے اختیار کرنے سے ، اور مشبہ ، معتزلہ ، جہمیہ ، جبریہ ، قدریہ ، وغیرہ غلط مسالک پر چلنے سے حفاظت فرمائے ، جنہوں نے سنت رسول اللہ کی اور جماعت مسلمین کی مخالفت کر کے گمراہی سے ناطہ جوڑ رکھا ہے۔ ہم ایسے گمراہوں سے بری ہیں ، اور یہ سب ہمارے نزدیک گمراہ اور بے راہ ہیں۔
اللہ ہی سب کو محفوظ رکنے والا ہے ، اور وہی توفیق بخشنے والا ہے۔

حوالہ

 

[کیلانی]

کچھ لوگوں نےامام ابوحنیفہ کو فقہ میں تو اپنامقتداتسلیم کیاہےلیکن عقیدےمیں نہیں کاش وہ امام صاحب کےعقیدےکو بھی تسلیم کرلیتے۔