لائف انشورنس کمپنی کی جانب سے۔۔۔کیا کریں؟

[Abdul Rehman]

السلام علیکم ورحمتہ اللہ وبرکاتہ،
مجھے معلوم کرنا تھا کہ لائف انشورنس کی شرعی حیثیت کیا ہے؟ اور اگر میں خود لائف انشورنس نہیں کرواتا بلکہ جس کمپنی میں جاب کرتا ہوں وہ مجھے فیسلٹی کے طور پر لائف انشورنس کروا کر دے رہی ہو تو کیا مجھے قبول کر لینا چاہئے یا رد کر دینا چاہئے؟

کچھ اسی قسم کا مسئلہ ہیلتھ انشورنس میں بھی درپیش ہے۔ میری جاب کی نوعیت ایسی ہے کہ اس میں زخمی ہونے کے چانس رہتے ہیں، لہٰذا کیا میں یہ ہیلتھ انشورنس کمپنی کی جانب سے قبول کر سکتا ہوں؟

جبکہ کمپنی اس انشورنس کے متبادل اپنے ملازمین کو پیسے نہیں دیتے۔ یعنی اگر میں انکار کر دوں تو مجھے کوئی رقم نہیں ملے گی۔ جبکہ قبول کرنے کی صورت میں انشورنس کمپنی کو ہر ماہ ہر ملازم کی جانب سے رقم ادا کی جاتی ہے۔

 

[ابوالحسن علوی]

اگر تو کمپنی آپ کو انشورنس ایک فیسلٹی کے طور پر مہیا کرتی ہے یعنی آپ سے اس انشورنس کے بدلے کوئی چارجز وصول نہیں کرتی یا آپ کی تنخواہ سے کوئی کٹوتی نہیں ہوتی ہے تو پھر اس صورت میں اس فیسلٹی کا لینا جائز ہے کیونکہ کمپنی آپ کو آپ کی خدمات کے عوض ایک پیکج فراہم کر رہی ہے اور آپ کا اصل معاوضہ صرف تنخواہ نہیں ہے بلکہ وہ پیکج ہے جو تنخواہ اور سہولیات کا مجموعہ ہے۔ اب یہ کمپنی کا ہیڈیک ہے کہ جو پیکج یا معاوضہ وہ آپ کو آپ کی خدمت کے بدلے فراہم کرتی ہے، وہ اس کا انتظام کہاں سے یا کیسے کرتی ہے؟

مثلا اس بات کو یوں سمجھیں کہ آپ کا معاہدہ یا معاملہ یا نسبت کمپنی کے ساتھ ہے اور آپ کو جو معاملہ یا معاہدہ کمپنی کے ساتھ ہے وہ فیئر ہونا چاہیے اور وہ یہ ہے کہ متعین خدمات کے بدلہ میں تنخواہ اور میڈیکل کی سہولت۔ اور یہ معاہدہ فی نفسہ جائز ہے اور اس میں کوئی شرعی قباحت نہیں ہے۔ اب اگر کمپنی آپ کو جو تنخواہ دیتی ہے اس میں کمپنی کے سودی معالات اور منفعت کی رقم بھی شامل ہے تو آپ کے لیے یہ جائز ہے کیونکہ یہ کمپنی کا ہیڈیک ہے کہ اس نے وہ رقم کہاں سے کمائی یا حاصل کی ہے جو وہ آپ کو بطور تنخواہ دے رہی ہے۔ اللہ کے رسول صلی اللہ علیہ وسلم کے زمانہ میں صحابہ کرام رضی اللہ عنہم یہود کے پاس ملازمت کر لیا کرتے تھے جبکہ یہود کی سود خوری معروف تھی۔ اسی طرح اللہ کے رسول صلی اللہ علیہ وسلم یہود کی دعوت بھی قبول فرما لیا کرتے تھے جبکہ ان کا حرام کھانا معروف تھا۔ اسے فقہا کی اصطلاح میں کہتے ہیں کہ نسبت تبدیل ہونے سے حکم تبدیل ہو جاتا ہے۔ شاید کچھ وضاحت ہو گئی ہو۔

 

[خضر حیات]

اسپائلر: تازہ

کسی نے سوال کیا ، تو تلاش کرتے کرتے ، گوگل سے یہاں پہنچا ، میرے ذہن میں آیا کہ اب آئندہ بھی ایسے کیا کروں ، تاکہ تھریڈ تازہ ہو جائے ۔