• الحمدللہ محدث فورم کو نئےسافٹ ویئر زین فورو 2.1.7 پر کامیابی سے منتقل کر لیا گیا ہے۔ شکایات و مسائل درج کروانے کے لئے یہاں کلک کریں۔
  • آئیے! مجلس التحقیق الاسلامی کے زیر اہتمام جاری عظیم الشان دعوتی واصلاحی ویب سائٹس کے ساتھ ماہانہ تعاون کریں اور انٹر نیٹ کے میدان میں اسلام کے عالمگیر پیغام کو عام کرنے میں محدث ٹیم کے دست وبازو بنیں ۔تفصیلات جاننے کے لئے یہاں کلک کریں۔

مرض عشق کا علاج

کلیم حیدر

ناظم خاص
رکن انتظامیہ
شمولیت
فروری 14، 2011
پیغامات
9,748
ری ایکشن اسکور
26,379
پوائنٹ
995
مرض عشق کا علاج

شیخ الاسلام امام احمد بن عبدالحلیم بن تیمیہ رحمہ اللہ سے اس شخص کا علاج پوچھا گیا کہ جو شیطان کے مشہور ترین تیروں میں سے ایک تیر "عشق" کا شکار ہوگیا ہو؟
آپؒ نے جواب ارشاد فرمایا:
جو اس زہریلے زخم میں مبتلا ہوگیا ہو تو اسے چاہیے کہ مندرجہ ذیل کام کرے جس سے اس زہر کو کشید کیا جاسکے اور تریاق ومرہم کے ذریعہ زخم مندمل ہوجائے:
اول:
اسے چاہیے کہ اگر کنوارہ ہے تو نکاح کرے اور اگر شادی شدہ ہے تو اپنی بیوی سے تعلق قائم کرے، کیونکہ نبی اکرم صلی اللہ علیہ وسلم نے فرمایا:
’’ إذا نظر أحدكم إلى محاسن امرأة فليأت أهله ; فإنما معها مثل ما معها ‘‘ (1)
(جب تم میں سے کوئی کسی عورت کے محاسن دیکھ لے تو اسے چاہیے کہ اپنی بیوی کے پاس آئے (اور ضرورت پوری کرے)، کیونکہ اس کے پاس بھی وہی کچھ ہے جو دوسری کے پاس ہے) اور یہ بات اس کی شہوت کو توڑ دے گی اور عشق کو کمزور کردے گی۔
دوم:
پنج وقتہ نماز کی (وقت وجماعت) کے ساتھ پابندی کرے اور رات (تہجد) کے وقت اللہ تعالی سے دعاء والحاء وزاری کرے۔ لازم ہے کہ اس کی نماز حضورِقلب اور خشوع وخضوع کے ساتھ ہو۔ اور کثرت کے ساتھ یہ دعاء پڑھے:
’’ يَا مُقَلِّبَ الْقُلُوبِ، ثَبِّتْ قَلْبِي عَلَى دِينِكَ يا مصرف القلوب صرف قلبي إلى طاعتك وطاعة رسولك‘‘ (2)
(اے دلوں کو پھیرنے والے میرے دل کو اپنے دین پر ثابت قدم رکھ، اے دلوں کو پھیرنے والے میرے دل کو اپنی اور اپنے رسول صلی اللہ علیہ وسلم کی اطاعت کی طرف پھیر دے) پھر جب وہ دعاء کا عادی ہوجائے گا اور اللہ تعالی کے لئے تضرع والحاء وزاری کرے گا تو اللہ تعالی یقینا ًاس کا دل اس سے پھیر دے گا جیسا کہ یوسف علیہ السلام کے متعلق فرمایا:
’’ كَذَلِكَ لِنَصْرِفَ عَنْهُ السُّوءَ وَالْفَحْشَاءَ إِنَّهُ مِنْ عِبَادِنَا الْمُخْلَصِينَ ‘‘ (یوسف: 24)
(اسی طرح سے ہم نے ان سے برائی اور فحاشی کو پھیر دیا کیونکہ وہ ہمارے مخلص بندوں میں سے تھے)
سوم:
اس شخص (یعنی معشوق) کے مسکن وگھر سے اور جہاں ان کا جمع ہونا ممکن ہوتا ہے وہاں سے اس طور پر دوری اختیار کرلےکہ اس کی کوئی خیر خبر اس کے کانوں سے نہ ٹکرائے، نہ ہی اس کی نظر کبھی اس پرپڑے کہ اس کے دل پر کوئی اثر ہو۔ کیونکہ دوری اختیار کرنا جفا ہے ۔ اور جب اس کا ذکر ہی کم ہوجائے گا تو اس کا اثر دل پر کمزور ہوتا جائے گا۔
تو اسے چاہیے کہ ان امور پر عمل پیرا ہو اور دیکھے کہ پھر اس کا کیا حال ہوتا ہے۔ واللہ اعلم
(مجموع فتاوی ابن تیمیہ ج 32 کتاب النکاح کا پہلا سوال ص 5-6ط مجمع الملك فهدسن اشاعت: 1416ھ/1995م)
حوالہ جات
1۔صحیح ترمذی 1158 کے الفاظ ہیں
’’ إِنَّ الْمَرْأَةَ إِذَا أَقْبَلَتْ أَقْبَلَتْ فِي صُورَةِ شَيْطَانٍ، فَإِذَا رَأَى أَحَدُكُمُ امْرَأَةً فَأَعْجَبَتْهُ، فَلْيَأْتِ أَهْلَهُ فَإِنَّ مَعَهَا مِثْلَ الَّذِي مَعَهَا‘‘
(جب عورت آتی ہے تو بصورت شیطان آتی ہے، پس اگر تم میں سے کوئی ایسی عورت دیکھ لے جو اسے اچھی لگے، تو اسے چاہیے کہ اپنی بیوی کے پاس آئے (اور ضرورت پوری کرے) کیونکہ اس کے پاس بھی وہی چیز موجود ہے جو دوسری عورت کے پاس ہے)
2۔ صحیح ترمذی 3522 کے الفاظ صرف یہ ہیں:
’’ يَا مُقَلِّبَ الْقُلُوبِ، ثَبِّتْ قَلْبِي عَلَى دِينِكَ‘‘
 
Top