نغمہ بیداری

[محمد آصف مغل]

نغمہ بیداری

بیدار ہو اے قومِ مسلم! غفلت کی ردا کو دور ہٹا
چھائی ہوئی ہے اس دنیا پر بے دینی کی تاریک گھٹا​

احکامِ الٰہی کے ہوتے ہوئے قبروں کی پرستش ہوتی ہے
اس ظلمتِ شرک و بدعت میں آ پھر شمعِ ایمان جلا​

میدانِ عمل میں داخل ہو، یہ وقت نہیں ہے سونے کا
تُو بازوئے زورِ حیدر ہے کردار کی اب قوت دکھلا​

جو دین پہ اپنی کم علمی کے باعث حملے کرتے ہیں
یہ عقل و خرد سے عاری ہیں، بے چاروں کو آداب سکھا​

اسلام آفاقی مذہب ہے اسلام ہی دین فطرت ہے
تُو اس کا مفسر ہے، سب کو اس مذہب کے نکتے سمجھا​

ہر آن ہو اے مردِ مسلم! تبلیغِ شریعت شیوہ ترا
تجھ پہ جو فریضہ عائد ہے تُو اس کو ادا کرکے دکھلا​

تُو اپنے کو مسلم کہتا ہے، تیرے لیے لازم ہے شاہدؔ
اللہ کی اس دنیا میں نکل اور روشنیِ ایماں پھیلا​

(شاہدؔ اثری)​