نکاح نصف ایمان

[محمد موسی]

السلام علیکم ! اس روایت کی تحقیق چاہیے ۔
"" اِذَا تَزَوَّجَ الْعَبْدُ فَقَدِ اسْتَکْمَلَ نِصْفَ الدِّیْنِ فَلْیَتَّقِ اللّٰہَ فِی النِّصْفِ الْبَاقِیْ ""
حضرت انس رضی اللہ عنہ کہتے ہیں رسول اللہ ﷺ نے فرمایا ’’جب کوئی شخص نکاح کر لیتا ہے تو اپنا آدھا دین مکمل کر لیتا ہے لہٰذا اسے چاہیے کہ باقی آدھے دین کے معاملے میں اللہ سے ڈرتا رہے ۔‘‘اسے بیہقی نے روایت کیا ہے۔

 

[کفایت اللہ]

اس حدیث کے سارے طرق ضعیف ہیں علامہ البانی رحمہ اللہ نے سب کو یکجا کرنے کے بعد روایت کو حسن لغیرہ بنایا ہے لیکن اس تحسین کی کوئی گنجائش نہیں ہے کیونکہ اول تو ضعیف کو ضعیف سے ملاکر علی الاطلاق تحسین کا اصول ہی محل نظر ہے دوم اس روایت کے تین طرق میں سے دو طریق میں سخت ضعف واقع ہے لہذا حسن لغیرہ کے باب میں بھی یہ روایات غیر مقبول ہیں ۔

علامہ البانی رحمہ اللہ کی تحسین پر اعتماد کرنے ہوئے ہم نے اس حدیث کو بہت سی جگہوں پر سنایابھی ہے اور بہت سی جگہوں پر لکھا بھی ہے لیکن اب ہماری نظر میں اس کا ضعف واضح ہوچکا ہے ، اللہ ہماری لغزشوں کو معاف کرے ۔