واٹس ایپ گروپ اسلامیات میں کئے گئے سوالوں کے جواب

[مقبول احمد سلفی]

واٹس ایپ گروپ اسلامیات میں کئے گئے سوالوں کے جواب
ـــــــــــــــــــــــــــــــــــــــــــــــــــــــ
جواب از مقبول احمد سلفی​

سوال (1): میرا ایک سوال ہے جورمضان میں بھی پوچھا گیا تھالیکن اس کاجواب آیانہیں ,سوال یہ ہے کہ کچھ لوگ حج یاعمرہ کرنے کے لئے سائیکل پر سوار ہوکر ایک ملک سے دوسرا ملک ہوتے ہوئے مکہ پہونچتے ہیں، جبکہ آج کے دور میں آسانیاں موجود ہیں ۔اور پھر ہوتایہ ہیکہ مختلف مقامات کے لوگ ان کا استقبال بھی کرتے ہیں ۔ کیاآج کے دور میں آسانیاں ہونے کے باوجود سائیکل پر یا پیدل چل کر حج یا عمرہ کے لئے جانا درست ہے ، برائے مہربانی جواب دیں ؟
سائل :محمد مدثر بھوپال ایم پی
جواب : اسلام ترقی کے مخالف نہیں ہے ، آج کے دور کی جو سفری سہولیات اور ایجادات ہیں ان سے شرعی حدود میں رہ کر فائدہ اٹھانے میں کوئی حرج نہیں ہے ۔ترقی یافتہ زمانے میں پیدل یا سائیکل سے حج کرنا واقعی تعجب خیز امر معلوم ہوتا ہے جبکہ پہلے والوں نے پیدل اور جانوروں پر سفر کرکے ہی حج کیا کرتے تھے ۔ بعد میں بس، گاڑی ، پانی اور ہوائی جہاز کی ایجاد ہوئی ۔ ان سب سہولیات کی باوجود آج بھی کہیں کہیں سے خبریں آتی ہیں کہ فلاں نے سائیکل سے حج کا سفر کیا ، فلاں نے پیدل حج کے لئے سفر کیا۔ اور آج سوشل میڈیا کی وجہ سے یہ لوگ جہاں جہاں پہنچتے ہیں وہاں وہاں کی ساری خبریں لوگوں میں عام ہوتی رہتی ہیں ۔دیکھیں حج کے لئے سفر پیدل ہو یا سوار کوئی حرج نہیں ہے تاہم ایک بات کی توجہ ضروری ہے کہ حج عبادت ہے اور عبادت کے لئے اخلاص اور اتباع رسول ضروری ہے ۔ لہذا ایسے امور سے ہمیں بچنا ہے جن سے اخلاص ختم ہوتا ہے ۔ بہت سے لوگ حج کی تمنا رکھتے ہیں مگر سب کووافر مالی طاقت نصیب نہیں ہوتی ایسے قسم کے بعض لوگ کم سے کم خرچ والا سفر کرتے ہیں ، خلوص وللہیت کا جاننے والا اللہ ہے ،ہمیں کسی کے نیک عمل پہ بدظنی کا بھی شکار نہیں ہونا چاہئے بلکہ ایک مسلمان کے لئے ہمارے دل میں حسن ظن ہو۔
سوال (2):کچھوا، کیکڑا اور گھونگا کھا نا شریعت میں حرام ہے یا حلال؟
سائل : خورشید ، دربھنگہ، بہار
جواب : سعودی کی فتوی کمیٹی بنام "اللجنة الدائمة للبحوث العلمية والإفتاء" کے فتوی نمبر (11126) میں بحری کچھوے کو حلال کہا گیا ہے۔
کیکڑا جسے انگریزی میں کریب اور عربی میں سرطان کہتے ہیں اسے شیخ محمد صالح منجد نے سمندری جانور کی فہرست میں فتوی نمبر 1919 کے تحت کھانا جائز کہا ہے ۔
گھونگھا جسے انگریزی میں Snail اور عربی میں حلزون کہتے ہیں۔ دو قسم کے ہوتے ہیں ایک بری اور دوسری بحری شیخ محمد صالح منجد نے دونوں قسم کےگھونگھوں کو جائز کہا ہے ۔ دیکھیں فتوی نمبر 114855، حکم اکل الحلزون۔
سوال (3)سوال ہے کہ "عالج نفسک بماء زمزم"(مصنف دکتور خالد جاد)نامی کتاب زیر مطالعہ ہے جس میں زمزم کی فضیلت کے ضمن میں امام سیوطی کا قول لکھا گیا ہے کہ زمزم آب کوثر سے افضل ہے اس لئے کہ اس پانی سے نبی علیہ السلام کے قلب اطہر کو دھویا گیا تو کیا واقعی زمزم کوثر سے زیادہ افضل ہے ،قران و سنت کی روشنی میں جواب مرحمت فرما کر عنداللہ ماجور ہوں۔
سائل :محمد یوسف اصلاحی، ضلع سیونی مدھیہ پردیس
جواب :اس بات کا کئی جگہوں پر ذکر ملتا ہےمگر کوثر جنت کی ایک نہر ہے اور جنت کی اشیاء کا دنیاوی چیزوں سے مقابلہ نہیں کیا جاسکتا ہے اور زمزم کے بارے میں یہ کہا جائے گا روئے زمین پر سب سے اچھا پانی ہے جیساکہ صحیح حدیث میں اس کا ذکر ہے ۔ (دیکھیں سلسلہ صحیحہ : 1056)
سوال (4): کیا اجماع بھی دلیل کے طور پر تسلیم کیا جاتا ہے ؟
جواب : شیخ ابن باز رحمہ اللہ نے لکھاہے کہ اجماع یقینی ،قطعی طورپر حجت ہے اور یہ تین اصول میں سے ایک ہے ۔ وہ تین اصول قرآن، سنت صحیحہ اور اجماع ہیں۔ اجماع کی وضاحت کرتے ہوئے لکھتے ہیں کہ یہ نبی ﷺ کے اصحاب کا اجماع ہے ۔(مجموع فتاوى ومقالات الشيخ ابن باز: 427/8).
سوال(5): کیا موقوف روایات حجت ہیں؟
جواب : صحابہ کے اقوال وافعال اور تقاریر کو موقوف روایت کہتے ہیں ۔ اس کے کئی اقسام ہیں ۔ وہ موقوف روایات جن میں اجتہاد کی گنجائش نہ ہو مثلا غیبی امور ہوں تو وہ مرفوع حدیث کے حکم میں ہیں ان سے استدلال کیا جائے گا۔ اور وہ موقوف روایات جن میں اجتہاد کیا گیا ہو اور وہ کسی نص (قرآنی آیات وسنت صحیحہ) کے خلاف نہ ہو ، نہ ہی کسی صحابی کا اختلاف مروی ہو تو اس سے دلیل پکڑیں گے البتہ مختلف فیہ روایات میں ترجیح کے قابل روایت کو اخد کیا جائے گا۔

 

[طارق راحیل]

میرا نمبر 923350260259 پاکستان کے شہر کراچی سے تعلق ہے
گروپ میں شامل کر لیں