وقولوا للناس حسنا ۔۔۔

[shinning4earth]

"روح بلند ہو تو اس کی بلندی کو پانے کے لئے سخت محنت کرنا پڑتی ہے "​

ایک ایماندارا نسان صرف اللہ کی رضا کے لئے سب لوگوں سے یکساں حسن سلوک سے پیش آتا ہے ۔ اس کا یہ کریکٹر نہ دنیاوی منفعت کے لئے ہوتا ہے نہ کسی وقتی مادی فائدے کی خاطر ۔ وہ جیسا برتاؤ ایک مالدار شخص سے کرتا ہے ویسا برتاؤ نادار شخص سے کرتا ہے ۔ سڑک پر جھاڑو لگانے والے خاک روب کے لئے بھی وہ احترام کے وہی جذبات رکھتا ہے ۔ جو کسی اونچے ادارے کے ڈایرکٹر کے لئے رکھتا ہے ۔​

اس سلسلے میں رسول اللہ ﷺ کا اسوہ ہمارے سامنے ہے ۔اسلام نے انسان ہونے کے ناتے تمام ا انسانوں کو یکساں حقوق کا حقدارٹھہرایا ہے ۔ دیگر مذاہب و ادیان پر اسلام کی برتری کا ایک روشن پہلو یہ بھی ہے ۔​

رسول اللہ ﷺ نے فرما یا​

" روز قیامت میرے محبوب ترین اور نذدیک ترین لوگوں میں تمہارے وہ افراد بھی شامل ہوں گے جن کے اخلاق اچھے ہوں گے ۔(جامع ترمذی ۲۰۱۸)​

قبیلہ ٗ عبدالقیس کے زخم خوردہ آدمی سے کہا تھا ،​

"آپ میں دو خصلتیں ایسی ہیں جنہیں اللہ اور اس کا رسول پسند کرتے ہیں "​

وہ دو خصلتیں کیا تھیں ؟ رات کا قیام یا دن کے روزے ؟ نہیں ۔​

اس نے خوش ہوکر پوچھا ؛" اے اللہ کے رسول وہ کون سی خصلتیں ہیں ؟"​

فرمایا؛ "تحمل اور ٹھہراؤ"۔ (صحیح مسلم ۱۸)​

رسول اللہ ﷺ سے نیکی کے متعلق پوچھا گیا تو فرمایا؛​

"نیکی حسن اخلاق کا نام ہے "(صحیح مسلم ۲۵۵۳)

​

آپ سے استفسار کیا گیا اکثر لوگ کس چیز کے سبب جنت جایئں گے ؟​

آپ ﷺ نے جواب دیا ؛​

"اللہ کا تقوی اور حسن اخلاق"(جامع ترمذی ۲۰۰۴)

​

آپ نے فرمایا؛​

مؤمنین میں سے کامل ایمان والے لوگ وہ ہیں جن کے اخلاق اچھے ہیں ، جو نرم پہلو ہیں ، جو مانوس بناتے ہیں مانوس بنتے ہیں ۔ اور اس آدمی میں کوئی خیر نہیں جو نہ مانوس بنائے نہ مانوس بنے " (السلسلۃ الصحیحہ ؛۳۷۸/۲ حدیث ۷۵۱ و جامع ترمذی ۱۱۶۲)​

آپ نے فرمایا :​

"آدمی اپنے حسن اخلاق کی بدولت رات کو ہمیشہ نماز پڑھنے والے اور دن کو ہمیشہ روزہ رکھنے والے کا مرتبہ حاصل کرلیتا ہے "(سنن ابی داؤد ۴۷۹۸)​

ایک روز ام سلمہ ؓ رسول اللہ ﷺ کے ساتھ بیٹھی آخرت اور اس میں اللہ کی تیار کردہ نعمتوں کا تذکرہ کر رہی تھیں ۔ ام المؤمنین نے استفسار کیا : " اے اللہ کے رسول ! ایک عورت کے دنیا میں دو شوہر ہوں ۔ عورت اور وہ دونوں جنت میں چلے جائیں تو وہ عورت ان دونوں میں سے کسے ملے گی؟"​

فرمایا:​

"وہ اس شوہر کو ملے گی جس کا اخلاق زیادہ اچھا ہوگا"​

اس پر ام سلمہ کو تعجب ہوا آپ نے ان کی حیرت دیکھی توفرمایا :​

" ام سلمہ ! دنیا اور آخرت کی بھلائیاں حسن اخلاق کو حاصل ہیں" (مجمع الزوائد ۴۱۹/۱۰ حدیث ۱۸۷۵۵)​

جی ہاں دنیا و آخرت کی بھلائیاں​

دنیا کی بھلائی یہ ہے کہ حسن اخلاق کی وجہ سے سب لوگ اس سے محبت کرنے لگیں اور آخرت کی بھلائی سے مراد اجر عظیم ہے ۔ انسان کیسا ہی اعمال صالحہ پر کار بند ہو ،بد اخلاق ہے تو سارے اعمال ضائع ہوجاتے ہیں ۔​

اللہ تعالی نے قرآن میں رسول اللہ ﷺ کی تعریف کی جسے قیامت تک تلاوت کیا جاتا رہے گا، اللہ تعالی فرماتا ہے​

وانک علی خلق عظیم

​

​

"اور بلاشبہ آپ خلق عظیم پر فائز ہیں "(القلم ۴:۶۸)​

آپ ﷺ ہمارا قدوہ ہیں ۔ آپ کا راستہ ہی ہمارا راستہ ہے ۔ آپ ﷺ ع مو ما اللہ سے دعا کیا کرتے​

"الہی جیسی تو نے میری صورت اچھی بنائی ، سیرت بھی اچھی کردے "(مسند احمد)

​

​

آپ یہ بھی دعا کیا کرتے​

الہی مجھے بہترین اخلاق کی ہدایت دے کہ اس کی رہنمائی تیرے سوا کوئی نہیں کرسکتا ، اور مجھ سے بد اخلاق کو دور کردے کہ اسے بھی تیرے سوا کوئی دور نہیں کرسکتا" (صحیح مسلم ۷۷۱)

​