ڈاکٹر اسرار صاحب اور سلف کا منہج تفسیر

[ابو جماز]

السلام علیکم ورحمۃ اللہ وبرکاتہ

ایک استاذ سے تفسیر پڑہتےہوئے یہ بات زیر بحث آئ کہ آیا ڈاکٹر اسرار صاحب کا منہج تفسیری ان اصولوں پر ہے جوکہ سلف نے بیان کیے ہیں مثلا شیخ الاسلام امام ابن تیمیۃ رحمہ اللہ نے اپنے مقدمۃ میں بیان کیے ہیں! جسپر یہی جواب ملا کا تفسیرمحمود کسی حد تک کہا جاسکتا ہے پر سلفی اصول کے مطابق نہیں کہا جاسکتا چونکہ ڈاکٹر صاحب فلسفہ سے متاثر تھے اور انکی تفسیر میں فلسفہ بنسبت تفسیر کے زیادہ عیاں ہے۔
اہل علم بمع دلائل اسکا جواب دیجیے کیونکہ کئ سلفی بھائ ناعلمی کی بنیاد پر انکو بہت ہی قابل مفسر قرآن کہتے ہیں!

جزاکم اللہ خیرا!

 

[ابوالحسن علوی]

راقم نے ڈاکٹر اسرار احمد رحمہ اللہ کی مکمل تفسیر سنی بھی ہے اور زمانہ طالب علمی میں اسے صفحہ قرطاس پر بھی منتقل کیا تھا۔ راقم کے خیال میں تقریبا 10 سے 15 مقامات ایسے ہیں کہ جن میں ڈاکٹر اسرار احمد رحمہ اللہ کی تفسیر کو سلفی منہج سے ہٹی ہوئی تفسیر کہا جا سکتا ہے جبکہ اکثر و بیشتر ان کا تفسیری منہج اپنے غالب پہلو کے اعتبار سے صالح اور محمود ہے۔ ان کی تفسیر کا اصل منہج تحریک یعنی عوام الناس میں دین پر عمل کے لیے موٹیویشن پیدا کرنا ہے۔

کبھی کبھار وہ جدید سائنس کی روشنی میں کچھ مقامات کی تفسیر سلف صالحین کے منہج سے ہٹ کر کرتے ہیں۔ لہذا میرے خیال میں فلسفہ کی بجائے اگر یہ کہا جائے کہ جدید سائنسی افکار سے ان کی تفسیر متاثر ہے تو یہ زیادہ بہتر بیان ہو گا کیونکہ وہ ڈاکٹر ہونے کے ناطے سائنس کے طالب علم بھی تھے جبکہ فلسفہ ان کا ذاتی ذوق تھا اور انہوں نے فلسفہ کہیں سے پڑھا نہیں تھا۔

باقی وہ اپنے آپ کو مفسر قرآن نہیں کہتے تھے، بلکہ قرآن کا طالب علم کہتے تھے اور اسی رتبے اور تعارف پر مصر تھے۔ ڈاکٹر صاحب کے حلقوں یا قائم کردہ تنظیم میں بھی کوئی بھی انہیں مفسر قرآن کے نام سے یاد نہیں کرتا ہے۔ رمضان میں جو وہ قرآن کی تشریح کیا کرتے تھے تو وہ اسے دورہ ترجمہ قرآن کا نام دیتے تھے اور ابھی تک ان کی قرآن کے بارے علمی خدمات کو تفسیر کے نام سے شائع نہیں کیا جاتا ہے بلکہ اسے ترجمہ قرآن یا بیان القرآن کے نام سے آڈیو، ویڈیو اور کتابی شکل میں شائع کیا جاتا ہے۔