افغانستان کے مختلف علاقوں میں طالبان کے حملے کابل اور جلال آباد میں ایک درجن سے زائد دھماکے' متعدد افراد زخمی' 2 حملہ آور گرفتار کرلئے گئے۔ دہشتگردوں نے روسی اور امریکی سفارتخانے پر راکٹوں سے حملہ کیا۔ افغان پارلیمنٹ اور فائیوسٹار ہوٹل پر قبضہ کرلیا۔ میڈیا رپورٹس کے مطابق اتوار کے روز افغان طالبان نے افغان پارلیمنٹ ہائوس میں گھس کر عمارت پر قبضہ کرنے کی کوشش کی اور قریبی ہوٹل امریکی اور روسی سفارتخانے پر راکٹوں سے حملہ کیا جس کے نتیجے میں متعدد افراد زخمی ہوگئے۔ حملے کے بعد امریکی حکام نے سفارتخانے میں الارم بجائے اور تمام عملے کو چھپ جانے کی ہدایات جاری کیں۔ دوسری جانب افغان حکام نے دعویٰ کیا ہے کہ کابل میں افغان پارلیمنٹ میں دہشتگردی کی بڑی کوشش ناکام بنادی گئی ہے اور کچھ دہشت گردوں کو گرفتار بھی کرلیاگیا ہے۔ کابل کے بعد جلال آباد ایئرپورٹ پر خودکش حملہ آور نے اپنے آپ کو اُڑا لیا جس سے متعدد افراد زخمی ہوگئے۔ علاوہ ازیں گردیز اور لوگر میں بھی مختلف مقامات پر حملوں کی اطلاعات مل رہی ہیں اور صوبائی پولیس چیف کے مطابق حملہ آوروں اور پولیس کے درمیان جھڑپیں جاری ہیں۔ دوسری جانب افغان طالبان نے افغانستان کے مختلف علاقوں میں حملے کی ذمہ داری قبول کرتے ہوئے کہا ہے کہ وہ اس طرح کے مزید حملے بھی کریں گے۔