کفار کے ساتھ حسن سلوک ۔ ۔ اہلسنت کا منہج تعامل

[محمد آصف مغل]

کفار کے ساتھ حسن سلوک

ان تمام امور کے باوجود اسلام ہمیں اُن کفار کے ساتھ حسن سلوک کرنے کی اجازت دیتا ہے جو مسلمانوں کے ساتھ جنگ نہیں کرتے۔البتہ ان سے دلی محبت حرام ہے۔ موالات(دلی محبت) کا تعلق دل سے ہے اور حسن سلوک ایک خارجی عمل ہے۔یعنی جس کے ساتھ حسن سلوک کیا جا رہا ہے اس کا یہ مطلب نہیں ہے کہ اس سے موالات بھی کی جارہی ہے۔

امام ابن حجر  فرماتے ہیں :

''البر والصلۃ والاحسان لا یستلزم التحابب والتواددالمنھي عنہ '
کفارکے ساتھ اچھا سلوک ، صلہ رحمی اور نیکی کرنا ان سے اُس محبت اور دوستی کو مستلزم نہیں کرتا ہے کہ جس سے منع کیا گیا ہے ۔'[فتح الباری ۵/۲۳۳]

کفار کے ساتھ حسنِ سلوک نہ صرف جائز بلکہ بسا اوقات مستحب اور تاکیدی ہو جاتاہے ۔خصوصاً ایسے وقت میں جب یہ امید ہو کہ ایسا کرنے سے کافر دین اسلام کی طرف مائل ہوگا۔اور اگر کفار و مشرکین عزیز واقارب میں سے ہوں تو اس چیز کی اہمیت اور بڑھ جاتی ہے ۔

﴿ لَا يَنْہٰىكُمُ اللہُ عَنِ الَّذِيْنَ لَمْ يُقَاتِلُوْكُمْ فِي الدِّيْنِ وَلَمْ يُخْرِجُوْكُمْ مِّنْ دِيَارِكُمْ اَنْ تَبَرُّوْہُمْ وَتُقْسِطُوْٓا اِلَيْہِمْ۝۰ۭ اِنَّ اللہَ يُحِبُّ الْمُقْسِطِيْنَ۝۸ اِنَّمَا يَنْہٰىكُمُ اللہُ عَنِ الَّذِيْنَ قٰتَلُوْكُمْ فِي الدِّيْنِ وَاَخْرَجُوْكُمْ مِّنْ دِيَارِكُمْ وَظٰہَرُوْا عَلٰٓي اِخْرَاجِكُمْ اَنْ تَوَلَّوْہُمْ۝۰ۚ وَمَنْ يَّتَوَلَّہُمْ فَاُولٰۗىِٕكَ ہُمُ الظّٰلِمُوْنَ۝۹﴾[الممتحنۃ :۸،۹]
'' جن لوگوں نے تم سے دین کے بارے میں لڑائی نہیں لڑی اور نہ ہی تمہیں جلا وطن کیا ان کے ساتھ حسن سلوک و احسا ن کرنے اور منصفانہ برتائو کرنے سے اللہ تعالیٰ تمہیں نہیں روکتا' بلکہ اللہ تعالیٰ تو انصاف کرنے والوں سے محبت کرتا ہے ۔اللہ تعالیٰ تمہیں صرف ان لوگوں کی محبت سے روکتا ہے جنہوں نے تم سے دین کے بارے میں لڑائیاں لڑی ہیں اورتمہیں جلا وطن کیا اور جلا وطن کرنے والوں کی مدد کی ۔جو لوگ ایسے کفار سے محبت کریں وہ واقعی ظالم ہیں ''۔

 

[محمد آصف مغل]

پہلی صورت :عیادت کرنا

کسی کافر کی عیادت کے لئے جایا جا سکتا ہے ' خصوصاً جبکہ اس عیادت کے پیچھے کوئی مقصد پوشیدہ ہو۔ رسول اللہ ﷺ ایک یہودی لڑکے کی عیادت کے لئے گئے جب وہ بیمار پڑ گیا اور وہ آپ ﷺ کی خدمت بھی کیا کرتا تھا۔آپ ﷺ نے اس سے فرمایا کہ اسلام لے آئو 'اس نے آپ ﷺ کی بات مان لی اور اسلام لے آیا۔[بخاری :۵۶۵۷]

اللجنۃ الدائمہ نے کافر کی تعزیت کے بارے میں فتویٰ دیا ہے کہ :

'' اگر کافر کی تعزیت سے مقصد ان کو اسلام کی طرف راغب کرنا ہے تو یہ جائز ہے اور یہ شریعت کے مقاصد میں سے ہے اوراسی طرح اپنے آپ کو یا مسلمانوں کو ان کے شر سے بچانا مقصود ہوتو یہ جائز ہے کیونکہ عام مسلمانوں کی مصلحتیں جزئی نقصان پر حاوی ہوتی ہیں ۔ (فتاویٰ اللجنۃ الدائمۃ للبحوث العلمیہ والافتاء ۹/۱۳۲)

 

[محمد آصف مغل]

دوسری صورت :ہدیہ وصدقہ دینا

﴿ لَيْسَ عَلَيْكَ ھُدٰىھُمْ وَلٰكِنَّ اللہَ يَہْدِيْ مَنْ يَّشَاۗءُ۝۰ۭ وَمَا تُنْفِقُوْا مِنْ خَيْرٍ فَلِاَنْفُسِكُمْ۝۰ۭ وَمَا تُنْفِقُوْنَ اِلَّا ابْتِغَاۗءَ وَجْہِ اللہِ۝۰ۭ وَمَا تُنْفِقُوْا مِنْ خَيْرٍ يُّوَفَّ اِلَيْكُمْ وَاَنْتُمْ لَا تُظْلَمُوْنَ۝۲۷۲﴾(البقرۃ: ۲۷۲)
''لوگوں کو راہ راست پر لانا آپ کی ذمہ داری نہیں بلکہ اللہ ہی جسے چاہتا ہے ہدایت دیتا ہے اور جو تم خرچ کرتے ہو وہ اللہ کی رضا کے حصول کے لیے کرتے ہو۔اور جو بھی مال و دولت تم خرچ کرو گے اس کا پورا پورا اجر تمہیں دیا جائے گا اور تمہاری حق تلفی نہیں کی جائے گی۔''

عبد اللہ بن عبّاس؄ فرماتے ہیں:'' صحابہ اپنے مشرک رشتہ داروں کے ساتھ حسن سلوک کرنا نا پسند کرتے تھے پھر رسول اللہ ﷺسے سوال ہوا اور یہ آیت اتری اور انہیں رخصت دی گئی۔( تفسیر ابن کثیر )

رحمت عالم ﷺ نے حنین کے مال غنیمت میں سے صفوان بن امیہ کو سو بکریاں دیں پھر سو بکریاں دیں پھر سو بکریاں دیں حالانکہ وہ مشرک تھا کہتا ہے کہ آپ مجھے دیتے رہے۔ حتیٰ کہ آپ میری نگاہ میں سب سے زیادہ محبوب ہو گئے ۔ جب کہ آپ سے مجھے سخت نفرت تھی۔' ' (مسلم:۲۳۱۳،ترمذی:۶۶۶)

شیخ محمد بن صالح عثیمینفرماتے ہیں''کافروں کو ہدیہ و تحفہ دینا جائزہے اور اگر اس کا مقصد انہیں دین اسلام کے قریب کرنا ہے یا ان کا ہدیہ قبول کر کے انہیں اپنے سے مانوس کر کے مذہبی باتیں ان تک پہنچانا ہے تو یہ چیز مستحب ہو گی ۔البتہ کسی مذہبی تہوار کے موقع پر ان کا ہدیہ قبول کرنے سے دل میں ان کی محبت پیدا ہوتی ہو یا ان کے مذہبی تہوار کی تعظیم ہو تو ایسا کرناقطعاً حرام ہے ۔''[مجموع الفتاویٰ الشیخ ابن عثمین ۳/۳۳]

 

[محمد آصف مغل]

تیسری صورت :زیارت کرنا

شیخ عبدالعزیز بن عبداللہ بن باز فرماتے ہیں:اگر کسی مسلمان کا کوئی قریبی رشتہ دار کافر ہے اور اس کے ہاں آمد و رفت کا سلسلہ رکھنے میں دین کا کوئی نقصان نہیں ہے تو یہ جائز ہے 'ورنہ ناجائز ۔لیکن اگر کافر رشتہ دار نہیں تو اس کے یہاں بے مقصد آمد ورفت کا سلسلہ رکھنا' خصوصاً وقت گزارنے اور گپ شپ کے لئے جانا جائز نہ ہو گا۔[مجموع الفتاویٰ شیخ ابن باز ۳/۱۰۵۱]

چوتھی صورت :دعوت قبول کرنا

رسول اللہ ﷺ یہودو نصاریٰ کی دعوت قبول فرمایا کرتے تھے ۔ایک یہودی عورت نے آپ کی دعوت کی اور کھانے میں زہر ملا دیا ۔

پانچویں صورت :خریدو فروخت کرنا

نصوص ِ کتاب و سنت اور سلف کے معمول سے یہ واضح ہوتا ہے کہ کسی کافر کی دکان سے خرید و فروخت کرنا اور ان کے پاس دعوت کی نیت سے بیٹھنا جائز ہے ۔خود رسول اللہﷺ کے پاس یہود و مشرکین آکر بیٹھا کرتے تھے اور آپ ﷺ ان سے خرید و فروخت کیا کرتے تھے ۔

چھٹی صورت :اچھے اخلاق سے پیش آنا

ام المومنین عائشہ؅ روایت کرتی ہیں کہ ایک شخص نے خدمت نبویﷺ میں بار یابی کی اجازت چاہی اور میں آپ ﷺ کے پاس موجود تھی ۔ آپ ﷺ نے فرمایا : ((بئس اخو العشیرۃ او ابن العشیرۃ))'' یہ اپنے قبیلہ کا بہت برا آدمی ہے''۔ اتنا کہنے کے بعد آپ ﷺ نے اسے اندر آنے کی اجازت دے دی اور اس سے بڑی نرمی سے بات کی ۔پھر جب وہ چلا گیا تو ہم نے کہا: اے اللہ کے رسول ﷺ !آپ نے اس کے بارے میں یہ کچھ فرمایا تھاپھر اس سے اس طرح نرمی سے کیوں پیش آئے ؟تو آپﷺ نے جواب دیا:

[اے عائشہ ! انَّ شرَّ النَّاس منزلۃً عند اللہ یوم القیامۃ من ودعہ النَّاس اتِّقاء فحشہ]
'' سب سے برا آدمی وہ ہے کہ لوگ اس کی فحش گوئی سے بچنے کے لیے اس کو چھوڑ دیں۔''[صحیح البخاری :۶۰۵۶]

 

[محمد ارسلان]

جزاک اللہ خیرا

 

[کلیم حیدر]

جزاکم اللہ خیرا۔

 

[محمد عامر یونس]

جزاک اللہ خیرا

 

[محمد شاہد]

​

​