اللہ ہے بس پیار ہی پیار

[محمد شاہد]

پیار بھرا ہر ایک اشارہ

پیارا اس کا ہر نظارہ

جس نے زمیں پر پیار اتارا

وہ خود ہو گا کتنا پیارا

پیار کا اس کے نہیں شمار،

اللہ ہے بس پیار ہی پیار

اللہ ہے بس پیار ہی پیار


پھول بنائے پیارے پیارے

تتلی جگنو اور فوارے

جگمگ کرتے چاند ستارے

اور کہا یہ سب ہیں تمہارے

پیار کا اس کے نہیں شمار

اللہ ہے بس پیار ہی پیار

اللہ ہے بس پیار ہی پیار


برسایا پانی کا دھار

ہم کو دی فصلوں کی بہار

گندم ،چاول، مکئی، جوار،

سیب، خوبانی،آم، انار،

پیار کا اس کے نہیں شمار،

اللہ ہے بس پیار ہی پیار

اللہ ہے بس پیار ہی پیار


بادل،بارش،دریا ،بستی

لہر لہر موجوں کی مستی

رواں دواں چھوٹی سی کشتی

سب کی مالک ایک ہی ہستی

پیار کا اس کے نہیں شمار

اللہ ہے بس پیار ہی پیار

اللہ ہے بس پیار ہی پیار


شاعر: خلیل اللہ فاروقی​