تفسیر احسن البیان (تفسیر مکی)

[محمد نعیم یونس]

فَسَنُيَسِّرُ‌هُ لِلْعُسْرَ‌ىٰ ﴿١٠﴾
تو ہم بھی اس کی تنگی و مشکل کے سامان میسر کر دیں گے۔ (۱)
۱۰۔۱تنگی سے مراد کفر ومعصیت اور طریق شر ہے، یعنی ہم اس کے لیے نافرمانی کا راستہ آسان کر دیں گے، جس سے اس کے لیے خیر وسعادت کے راستے مشکل ہو جائیں گے، قرآن مجید میں یہ مضمون کئی جگہ بیان کیا گیا ہے کہ جو خیر و رشد کا راستہ اپناتا ہے اس کے صلے میں اللہ اسے خیر و توفیق سے نوازتا ہے اور جو شر و معصیت کو اختیار کرتا ہے اللہ اس کو اس کے حال پر چھوڑتا ہے یہ اس کی تقدیر کے مطابق ہوتا ہے جو اللہ نے اپنے علم سے لکھ رکھی ہے۔ (ابن کثیر)

 

[محمد نعیم یونس]

وَمَا يُغْنِي عَنْهُ مَالُهُ إِذَا تَرَ‌دَّىٰ ﴿١١﴾
اس کا مال اسے (اوندھا) کرنے کے وقت کچھ کام نہ آئے گا۔ (۱)
۱۱۔۱یعنی جب جہنم میں گرے گا تو یہ مال جسے وہ خرچ نہیں کرتا تھا، کچھ کام نہ آئے گا۔

 

[محمد نعیم یونس]

إِنَّ عَلَيْنَا لَلْـهُدَىٰ ﴿١٢﴾
بیشک راہ دکھا دینا ہمارا ذمہ ہے۔ (۱)
۱۲۔۱یعنی حلال اور حرام، خیر و شر، ہدایت وضلالت کو واضح اور بیان کرنا ہمارے ذمے ہے۔ (جو کہ ہم نے کر دیا)

 

[محمد نعیم یونس]

وَإِنَّ لَنَا لَلْآخِرَ‌ةَ وَالْأُولَىٰ ﴿١٣﴾
اور ہمارے ہی ہاتھ آخرت اور دنیا ہے (١)۔
١٣۔١ یعنی دونوں کے مالک ہم ہی ہیں، ان میں جس طرح چاہیں تصرف کریں اس لئے ان دونوں کے یا ان میں سے کسی ایک کے طالب ہم سے ہی مانگیں کیونکہ ہر طالب کو ہم اپنی مشیت کے مطابق دیتے ہیں۔

 

[محمد نعیم یونس]

فَأَنذَرْ‌تُكُمْ نَارً‌ا تَلَظَّىٰ ﴿١٤﴾
میں نے تو تمہیں شعلہ مارتی ہوئی آگ سے ڈرا دیا ہے۔
لَا يَصْلَاهَا إِلَّا الْأَشْقَى ﴿١٥﴾
جس میں صرف وہی بد بخت داخل ہوگا۔
الَّذِي كَذَّبَ وَتَوَلَّىٰ ﴿١٦﴾
جس نے جھٹلایا اور (اس کی پیروی سے) منہ پھیر لیا۔
وَسَيُجَنَّبُهَا الْأَتْقَى ﴿١٧﴾
اور اس سے ایسا شخص دور رکھا جائے گا جو بڑا پرہیزگار ہوگا۔ (۱)
۱۷۔۱یعنی جہنم سے دور رہے گا اور جنت میں داخل ہوگا۔

 

[محمد نعیم یونس]

الَّذِي يُؤْتِي مَالَهُ يَتَزَكَّىٰ ﴿١٨﴾
جو پاکی حاصل کرنے کے لئے اپنا مال دیتا ہے (١)
١٨۔١ یعنی جو اپنا مال اللہ کے حکم کے مطابق خرچ کرتا ہے تاکہ اس کا نفس بھی اور اس کا مال بھی پاک ہو جائے۔

 

[محمد نعیم یونس]

وَمَا لِأَحَدٍ عِندَهُ مِن نِّعْمَةٍ تُجْزَىٰ ﴿١٩﴾
کسی کا اس پر کوئی احسان نہیں کہ جس کا بدلہ دیا جا رہا ہو۔
إِلَّا ابْتِغَاءَ وَجْهِ رَ‌بِّهِ الْأَعْلَىٰ ﴿٢٠﴾
بلکہ صرف اپنے پروردگار بزرگ و بلند کی رضا چاہنے کے لیے۔
٢٠۔١ بلکہ اخلاص سے اللہ کی رضا اور جنت میں اس کے دیدار کے لئے خرچ کرتا ہے۔

 

[محمد نعیم یونس]

وَلَسَوْفَ يَرْ‌ضَىٰ ﴿٢١﴾
یقیناً وہ (اللہ بھی) عنقریب رضامند ہو جائے گا (١)
٢١۔١ یعنی جو شخص ان صفات کا حامل ہوگا، اللہ تعالٰی اسے جنت کی نعمتیں اور عزت و شرف عطا فرمائے گا۔ جس سے وہ راضی ہو جائے گا، اکثر مفسرین نے کہا ہے بلکہ بعض نے اجماع تک نقل کیا ہے کہ یہ آیات حضرت ابو بکر کی شان میں نازل ہوئی ہیں۔ تاہم معنی ومفہوم کے اعتبار سے عام ہیں جو بھی ان صفات عالیہ سے متصف ہوگا، وہ بارگاہ الہی میں ان کا مصداق قرار پائے گا۔

 

[محمد نعیم یونس]

سورة الضحى

(سورة الضحى ۔ سورہ نمبر ۹۳ ۔ تعداد آیات ۱۱)​

بِسْمِ اللّٰهِ الرَّحْمٰنِ الرَّحِيْمِ
شروع کرتا ہوں میں اللہ تعالٰی کے نام سے جو بڑا مہربان نہایت رحم والا ہے
وَالضُّحَىٰ ﴿١﴾
قسم ہے چاشت کے وقت کی (١)
١۔١ چاشت اس وقت کو کہتے ہیں، جب سورج بلند ہوتا ہے۔ یہاں مراد پورا دن ہے۔

 

[محمد نعیم یونس]

وَاللَّيْلِ إِذَا سَجَىٰ ﴿٢﴾
اور قسم ہے رات کی جب چھا جائے۔ (۱)
۲۔۱جب ساکن ہو جائے، یعنی جب اندھیرا مکمل چھا جائے، کیونکہ اس وقت ہرچیز ساکن ہو جاتی ہے۔