تقلید اور فضیلۃ الشیخ عبداللہ ناصر رحمانی حفطہ اللہ

[محمد فیض الابرار]

(۶) موطا امام مالک، مسند احمد ، اور الرسالہ للشافعی وغیرہ میں ہے:
’ ’ امیر معاویہؓ نے سونے کا ایک برتن ، اس سے زیادہ وزن کے سونے کے عوض فروخت کر دیا صحابی رسولﷺ ابوالدرداء رضی اللہ عنہ کو اس سودے کی خبر ہوگئی تو آپ نے فرمایا :
رسول اللہﷺ نے اس قسم کے سودے سے منع فرمایا ہے الا یہ کہ وہ برابری کی بنیاد پر ہو ۔
امیر معاویہ نے فرمایا: اس میں کوئی حرج نظر نہیں آتا ۔
توابو الدرداء رضی اللہ عنہ نے فرمایا :
معاویہ کی طرف سے کون میری عذر خواہی کریگا؟ جسے میں رسول اللہﷺ کی حدیث بتلا رہا ہوں اور وہ اس کے مقابلے میں اپنی رائے بیان کر رہا ہے۔ اے معاویہ! جس سرزمین میں تم رہتے ہو میں وہاں قیام کرنے کا سوچ بھی نہیں سکتا۔
جناب ابو الدرداء رضی اللہ عنہ نے اس پر اکتفا نہیں کیا بلکہ امیر المؤمنین عمر بن خطاب رضی اللہ عنہ کوا س واقعہ کی خبردے دی تو امیر المؤمنین نے باقاعدہ خط لکھ کر انہیں اس اقدام سے روکا اورفرمایا آئندہ اس قسم کا سودہ وزن کی برابری کی بنیاد پر کرنا ۔

 

[محمد فیض الابرار]

(۷) مروان بن الحکم رضی اللہ عنہ فرماتے ہیں :
میں عثمان غنی اور علی بن ابی طالب رضی اللہ عنہ کے پاس بیٹھا تھا، عثمان رضی اللہ عنہ نے اپنے ایک آرڈر کے ذریعہ حج تمتع اور قران سے منع فرما دیا۔ جب میقات آیا تو علی رضی اللہ عنہ نے
حج اور عمرہ کا اکٹھا احرام باندھ لیا اور فرمایا :
{ ما کنت لادع سنۃ النبیﷺ لقول احد}
یعنی میں کسی کے قول پر سنت رسول ﷺ نہیں چھوڑ سکتا۔

 

[محمد فیض الابرار]

(۸) ایک بار امیر المؤمنین عمربن خطاب رضی اللہ عنہ نے فرمایا:
جب تم دس ذوالحج کو رمی جمار ، قربانی او ر حلق سے فارغ ہو چکو تو تمہارے لئے عورت اور خوشبو کے علاوہ ہرچیز حلال ہو جائے گی۔ یہ بات ام المؤمنین عائشہ صدیقہ رضی اللہ عنہ کو معلوم ہوئی تو فرمایا ۔
خوشبو کیسے حلال نہیں ہوگی؟ میں نے خود رسول اللہﷺ کو رمی جمار کے بعد اور طواف زیارت سے قبل خوشبو لگائی تھی اس موقع پر سالم (عائشہ کے شاگرد ) نے کہا:
{فسنۃ رسول اللہﷺ احق ان نأخذ بہا من قول عمر}
یعنی عمر کے قول کی بجائے سنتِ رسولﷺ کی پیروی ہم پر فرض ہے۔

 

[محمد فیض الابرار]

(۹) ایک موقع پر عبداللہ بن عباس رضی اللہ عنہ نے فرمایا :
رسول اللہ ﷺ نے حج تمتع کیا تھا۔
عمرو بن زبیر نے کہا : لیکن ابو بکر اور عمر رضی اللہ عنہا نے تو حج تمتع سے روکا ہے تو عبداللہ بن عباس ؓ نے غضب ناک ہو کر فرمایا:
لگتا ہے تمہاری بربادی کے دن قریب آچکے ہیں میں تمہیں رسول اللہﷺ کا فرمان سنا رہا ہوں اور تم مقابلے میں ابوبکر و عمر کا قول پیش کر رہے ہو!

 

[محمد فیض الابرار]

(۱۰) سید التابعین سعید بن المسیب رحمہ اللہ نے مسجد میں ایک شخص کو دیکھا کہ وہ فجر کی اذان کے بعد مسلسل نفل پڑھ رہا ہے تو آپ نے اسے کنکری مار کے اپنی طرف متوجہ کیا اور فرمایا:
اگر مسئلہ معلوم نہ ہوتو پوچھ لینا چاہئیے۔ فجر کی اذان کے بعد رسول اللہﷺ سے صرف فجر کی سنتیں ثابت ہیں اور کوئی نفل ثابت نہیں۔
اس شخص نے جواب دیا : زیادہ نوافل پڑھنے سے ثواب ہی ملے گا۔
تو سعید بن مسیب نے فرمایا: ہرگز نہیں! ! بلکہ مخالفت سنت پر تمہیں اللہ کا عذاب ملے گا ۔

 

[محمد فیض الابرار]

(۱۱) ابو السائب فرماتے ہیں۔
ہم عظیم محدث وکیع کے پاس بیٹھے تھے، انہوں نے فرمایا:
رسول اللہ ﷺ نے اپنی حج کی قربانی کا اشعار کیا تھا لیکن اما م ابو حنیفہ اسے مثلہ قرار دیتے ہیں اس پر ایک شخص نے کہا : اشعار کو تو امام ابراہیم نخعی نے بھی مثلہ کہا ہے؟
اس پر امام وکیع کو شدید غصہ آگیا اور فرمایا:
میں تمہیں رسول اللہﷺ کا فرمان بتلا رہا ہوں اور تم اس۔ کے مقابلے میں ابراہیم نخعی کا قول پیش کررہے ہو تمہیں تو عمر بھر کیلئے جیل میں بند کر دینا چاہئیے یہ کہ توبہ کرلو!! امام وکیع نے ایک موقع پر فرمایا تھا:
{لا تنظروا الی قول اہل الراے فی ہذا فان الاشعار سنۃ وقولہم بدعۃ}
یعنی اشعار کے بارہ میں اہل الراے کے قول پر کوئی توجہ نہ دو کیونکہ اشعار رسول اللہ ﷺ کی سنت ہے اور اہل الرائے کا قول بدعت ہے۔

 

[محمد فیض الابرار]

(۱۲) حکم بن عتیبہ فرماتے ہیں ، کسی نے امام زہری سے ام ولد کی عدت کے بارہ میں پوچھا، تو آپ نے فرمایا : سنت رسول سے چار ماہ دس دن کی عدت ثابت ہے ، اس پر حکم بن عتبیہ نے کہا : ہمارے علماء تو اس کے مطابق فتویٰ نہیں دیتے ؟
امام زہری غصہ میں آگئے اورفرمایا:
تمہیں اللہ کے نبی کی حدیث بتائی جا رہی ہے اور تم اس کے مقابلے میں اپنی رائے لئے بیٹھے ہو ، نبی ﷺ کے دور میں بریرہ رضی اللہ عنہا کو آزاد کیا گیا تو آپ ﷺ نے اسے آزاد عورت کی عدت گزارنے کا حکم دیا تھا۔
سامعین حضرات! یہ تمام مثالیں اور اس قسم کی پجاسوں مثالوں سے یہ بات نکھر کر سامنے آرہی ہے کہ صحابہ و تابعین کے دور میں تعامل امت کیا تھا؟ اختلاف کے وقت ان کا مرجع و مستند کیا تھا؟
اور اگر کسی کی بات رسول اللہﷺ کی حدیث کے خلاف ہوتی تو خواہ ابو بکر و عمر ہی کیوں نہ ہوتے ان کا رویہ کیا ہوتا تھا؟
اور صحابہ و تابعین کے دور کو رسول اللہﷺ نے خیر القرون یعنی امت کا سب سے بہترین دور قرار دیا تھا۔
آج فکر اہل حدیث اور منہج اہل حدیث بھی یہی ہے اور الحمد للہ یہ عظیم اور پاکیزہ فکر اللہ تعالیٰ نے صرف جماعت اہل حدیث ہی کو عطا فرمائی ہے باقی مذاہب و فرق تقلید باتعصب کی بناء پر اس انتہائی پاکیزہ منہج سے یکسر محروم ہیں۔
حالانکہ دنیوی اور اخروی فلاح اور کامیابی کا یہی راستہ ہے ۔ اگر پوری امت اس جاوئہ مستقیم اور منہج قیم کو اپنا لے تو اللہ تعالی تمام پریشانیاں ختم کردے۔
میرے اہل حدیث بھائیو! اور بالخصوص نوجوان ساتھیو! تم اس پاکیزہ منہج نبوی کے وارث ہو تم پر اللہ نے بڑی بھاری ذمہ داری عائد کر دی ہے لہذا اس منہج کے داعی بن جاؤ، عقیدہ و عملا و اعمالا و نشرا و بلاغاً
اللہ تعالیٰ ہم سب کا حامی و ناصر ہو۔
اقول قولی ہذا واستغفر اللہ لی ولکم و اصلی و اسلم علی نبیہ محمد وعلی آلہٖ وصحبہ واہل طاعتہ اجمعین
وکتبہ/عبداللہ ناصر الرحمانی

 

[عکرمہ]

جزاک اللہ خیرا

 

[محمد عامر یونس]

جزاک اللہ خیرا