"پول پرائس" کی شرعی حیثیت !

[رفیق طاھر]

بسم اللہ الرحمن الرحیم
السلام علیکم ورحمۃ اللہ وبرکاتہ
أحمد إلیکم اللہ الذی لا إلہ إلا ھو ، وبعد !
آج ہمارے جامعہ میں ایک سوال پیش کیا گیا جسکا تعلق اسی زمرہ سے ہے سوچا کہ افادہ عام کی غرض سے یہاں بھی شیئر کر دیا جائے
ملاحظہ فرمائیں :

سوال: آجکل مختلف کمپنیوں کی طرف سے انکی مصنوعات کا ریٹ مقرر شدہ ہوتا ہے , اور اس پر حلف لیا جاتا ہے کہ کوئی دوکاندار بھی پول پرائس سے کم قیمت پر انکی مصنوعات فروخت نہ کرے اور نہ ہی وہ گاہک کو اسکے علاوہ انکی مصنوعات کے ساتھ کوئی تحفہ وغیرہ دے ۔ اور اس پر دوکانداروں سے حلف بھی لیا جاتا ہے ۔ کیا ایسا کرنا شریعت اسلامیہ میں جائز ہے ؟

الجواب بعون الوھاب ومنہ الصدق والصواب وإلیہ المرجع والمآب​

اشیاء کی قیمتیں مقرر کرنا شریعت اسلامیہ میں ممنوع ہیں ۔ ایک مرتبہ مدینہ میں مہنگائی ہوگئی تو لوگوں نے رسول اللہ صلى اللہ علیہ وسلم سے عرض کیا کہ ہمارے لیے کنٹرول ریٹ متعین فرما دیں تو آپ صلى اللہ علیہ وسلم نے فرمایا :إِنَّ اللَّهَ هُوَ الْمُسَعِّرُ الْقَابِضُ الْبَاسِطُ الرَّازِقُ وَإِنِّي لَأَرْجُو أَنْ أَلْقَى اللَّهَ وَلَيْسَ أَحَدٌ مِنْكُمْ يُطَالِبُنِي بِمَظْلَمَةٍ فِي دَمٍ وَلَا مَالٍ

[سنن أبی داود کتاب البیوع باب فی التسعیر (3451)]​

یقینا اللہ تعالى ہی بھاؤ متعین کرنے والا , تنگی اور وسعت پیدا کرنیوالا اور رزق عطا فرمانے والا ہے ۔ اور میں یہ چاہتا ہوں کہ جب میں اللہ تعالى کے حضور پیش ہوں تو کوئی بھی مجھ سے خون یا مال میں ظلم کی وجہ سے مطالبہ کرنیوالا نہ ہو۔
یعنی رسول اللہ صلى اللہ علیہ وسلم نے ریٹ کو متعین فرمانے سے احتراز فرمایا اور اسے ظلم قرار دیا ہے ۔ لہذا کسی بھی شخص کے لیے یہ جائز نہیں ہے کہ وہ کسی چیز کا ریٹ متعین کر دے ۔
اور اگر کوئی کمپنی اس طرح کی شرط عائد کرتی ہے تو وہ شرط باطل ہے ۔ کیونکہ رسول اللہ صلى اللہ علیہ وسلم نے فرمایا ہے :مَا بَالُ أُنَاسٍ يَشْتَرِطُونَ شُرُوطًا لَيْسَ فِي كِتَابِ اللَّهِ مَنْ اشْتَرَطَ شَرْطًا لَيْسَ فِي كِتَابِ اللَّهِ فَهُوَ بَاطِلٌ وَإِنْ اشْتَرَطَ مِائَةَ شَرْطٍ شَرْطُ اللَّهِ أَحَقُّ وَأَوْثَقُ

[صحیح بخاری کتاب البیوع باب البیع والشرء مع النساء (2155)]​

لوگوں کو کیا ہے کہ وہ ایسی شرطیں لگاتے ہیں جو کتاب اللہ میں (جائز ) نہیں ۔ جو بھی کوئی ایسی شرط لگائے جو کتاب اللہ میں (جائز) نہ ہو تو وہ شرط باطل ہے , خواہ وہ سوشرطیں ہی لگا لے ۔ اللہ تعالى کی شرط زیادہ حقدار ہے اور زیادہ پختہ ہے ۔
درج بالا ادلہ کی روشنی میں یہ بات ثابت ہوتی ہے کہ "پول پرائس" پر دکاندار کو مجبور کرنا شرعا حرام ہے ۔ اور اگر کوئی دکاندار اس بات کا حلف اٹھا چکا ہے تو وہ اسے توڑ سکتا ہے کیوں کہ یہ شرط اللہ کے دین میں ناجائز ہے ۔

ھذا واللہ تعالى أعلم , وعلمہ أحکم وأبرم , ورد العلم إلیہ أسلم , والشکر والدعاء لمن نبہ وأرشد وقوم
وکتبہ
أبو عبد الرحمن محمد رفیق الطاھر مدرس جامعہ ھذا​

 

[رفیق طاھر]

ویسے یہ بھی عجیب بات ہے کہ پہلے کنٹرول ریٹ مقرر کیا جاتا تھا کہ اس سے زائد قیمت وصول نہ کی جائے اور اب ریٹ متعین کیا جاتا ہے کہ اس سے کم قیمت نہ لی جائے !

 

[رانا اویس سلفی]

jzk shiek rafiq bahi