ولی اللہ

[عمر السلفی۔]

کبھی کسی ایسے شخص کا علم ہو یا اس سے ملاقات ہو جس کے اندر خاموشی کا طوفان بھرا ہو، اس کی عاجزی سے کبھی یہ علم نہ ہونے پائے کہ وہ کس مقام پہ کھڑا ہے، اس کی کیا حیثیت ہے۔ اپنی تمام تر بلندیوں کے ساتھ جھکا رہے۔ اس کے کاموں کی خبر صرف اللہ کو ہو۔ متقی ہو، اس کے الفاظ اس کے لہجے سے تقوی جھلکتا ہو۔ اس کے مقاصد میں رفعت پائی جاتی ہو۔ اس کی زندگی خواھشات کے گرد نہ گھومتی ہو تو کوشش کیجیے گا اس کے ساتھ جڑے رہیں۔ اس کی عزت کریں، محبت کریں وہ ان شاءاللہ اللہ کا ولی ہے اور ایمان والے اللہ کے ولیوں کے دشمن نہیں ہوتے۔ بہت پیارے دوست ہوتے ہیں۔
اس کی موت کے بعد جب ہمارے سامنے اعمال کی وہ لسٹیں کھلیں جو وہ کر گیا تھا تو ہم دانتوں میں انگلیاں داب لیں تب رہ رہ کے اس کا زندہ ہونا یاد آتا ہے۔ اس کی باتوں سے ہمیں جو ایمان کی چاشنی ملا کرتی تھی وہ یاد آتی ہے، اس کے جانے سے زندگی میں جو عجیب سا خلا بھر جاتا ہے اس کی چبھن احساس دلاتی ہے کہ کیسی بڑی نعمت تھی۔ اللہ ہمیں ایسے ساتھی، ایسی مجالس، ایسے گھر والے، ایسے اساتذہ، ایسا معاشرہ عطا کریں جس میں رحمتوں کی برکھا ہو۔
گئے دنوں کا سراغ لے کر کدھر سے آیا کدھر گیا وہ
عجیب مانوس اجنبی تھا مجھے تو حیران کر گیا وہ