حضرت کی سواری کا طریقہ یہ نیا ہے ۔

[خضر حیات]

نامور مؤرخ مولانا اسحاق بھٹی صاحب حفظہ اللہ کی کتاب ’’ بزم ارجمنداں ‘‘ میں برسبیل تذکرہ مولانا ظفر علی کے چند اشعار کی صورت میں ایک لطیفہ قلم بند ہو گیا ہے ۔
اشعار سے پہلے ان کا پس منظر جو لکھا گیا اختصار کے ساتھ کچھ یوں ہے :
تحریک نمک کے سلسلے میں بہت سارے سیاسی قائدیں کی گرفتاریاں ہوئیں ان میں مولانا داؤدغزنوی رحمہ اللہ بھی تھے جب ان کی گرفتاری کے لیے پولیس والے آئے تو انہوں نےجانے سے انکا رکردیا پولیس والے اٹھا کر گاڑی میں بٹھا کر لے گئے جب وہاں پہنچے تو انہوں نے گاڑی سے اترنے کو کہا تو مولانا نےپھر انکار کردیا انہیں پھر مولانا کو خود اٹھا کر اتارنا پڑا ۔۔۔۔ مختصر یہ کہ عدالت وغیرہ اور اس کے بعد جیل تک جانے کے سارے مراحل سرکار کے کندھوں پر طے کیے تو اس صورت حال کو دیکھتے ہوئے مولانا ظفر علی خان نے مندرجہ ذیل ابیات کہے :

دی مولوی داؤد کوچڈی جو پولیس نے
احباب نے پوچھا بہ تعجب کہ یہ کیا ہے
کیوں لد کے چلے دوشِ حکومت پہ حضور آج
حضرت کی سواری کا طریقہ یہ نیا ہے
فرمانے لگے ہنس کے کہ میں عالم دین ہوں
اور مرتبہ سرکار میں عالم کا بڑا ہے
اس واسطے مَرکَب کے عوض فرط ادب سے
پیش اپنے تئیں آپ حکومت نےکیا ہے
ہے فخر یہ مجھ کو کہ میری ران کے نیچے
خود حضرت عیسی کی سواری کا گدھا ہے ​

اگر کوئی بھائی ( چڈی ) کا معنی اور ( حضر ت عیسی کی سواری کاگدھا) کے بارے میں جانتا ہے تو وضاحت کرکے مشکور ہو ۔

 

[خضر حیات]

اگر کوئی بھائی ( چڈی ) کا معنی اور ( حضر ت عیسی کی سواری کاگدھا) کے بارے میں جانتا ہے تو وضاحت کرکے مشکور ہو ۔

توجہ فرمائیں ۔۔۔ جزاکم اللہ ۔

 

[ابن قدامہ]

عیسی کی سواری کا گدھا ہے

گدھا

گدھا بڑا مشہور جانور ہے۔ گدھے دو طرح کے ہوتے ہیں،چار پاؤں والے اور دو پاؤں والے۔ سینگ ان میں کسی کے سر پر نہیں ہوتے۔ آج کل چار پاؤں والے گدھوں کی نسل گھٹ رہی ہے دو پاؤں والوں کی بڑھ رہی ہے۔

گھوڑے کی شکل ایک حد تک گدھے سے ملتی ہے، بعض لوگ گدھے گھوڑے کو برابر سمجھنے کی غلطی کر بیٹھتے ہیں۔ دونوں کہ ایک تھان پر باندھتے ہیں، یا ایک لاٹھی سے ہانکنا شروع کر دیتے ہیں۔ اگر گدھا اس پر اعتراض کرے تو کہتے ہیں، سنو ذرا اس گدھے کی باتیں۔ سوچنے کی بات ہے اگر گھوڑا کسی لائق ہوتا تو حضرت عیسی اس پر سواری نہ کرتے، گدھے کو کیوں پسند کرتے؟ شاعروں نے بھی گدھے کی ایک خوبی کی تعریف کی ہے۔ خرِ عیسٰی ہو یا کوئی اور گدھا اگر وہ مکہ بھی ہو آئے تو گدھا ہی رہتا ہے۔ دوسرے جانور بشمول آدمی تو اپنی اصل بھول جاتے ہیں، واپس آکر القاب کے دُم چھلے لگاتے ہیں۔

معلوم ہوتا ہے ایک زمانے میں گدھوں کی مشابہت گھوڑوں کی بجائے آدمیوں سے زیادہ ہوتی تھی۔ غالب اپنے محبوب کے دروازے پر کسی کام سے گئے اُس کا پاسبان یعنی دربان ان کو حضرت عیسی کی سواری کا جانور سمجھ کر بوجہ احترام چُپ رہا، لیکن جب اُنھوں نے کنوتیاں جھاڑ کر اس کے قدم لینے کی کوشش کی تو سمجھ گیا کہ یہ تو نجم الدولہ دبیرالُملک مرزا اسد اللہ خاں بہادر ہیں۔ چناچہ کماحقہ بد سلوکی کی۔
http://www.urdulife.com/kt/biyan_janwaroon_ka.html

 

[کنعان]

السلام علیکم

یہاں لفظ کوچڈی لکھا ہوا ھے اس کا مطلب: کندھوں پر اٹھانا

چڈی: بچوں کو پائجامہ کے نیچے جو نیکر پہنائی جاتی ھے اسے چڈی کہتے ہیں، چڈی کے اندر باریک پلاسٹک کی ایک تہہ ہوتی ھے جو بچہ کی پشاب کو باہر نہیں آنے دیتی کہ پائجامہ گیلا نہ ہو جس پر اب پیمپر استعمال ہوتے ہیں اور ایک زمانہ میں لنگوٹ استعمال کئے جاتے تھے۔

اشعار میں جو لفظ استعمال ہوا ھے وہ کوچڈی ھے، پولیس کا کندھوں پر اٹھانا

والسلام

 

[خضر حیات]

اشعار میں جو لفظ استعمال ہوا ھے وہ کوچڈی ھے، پولیس کا کندھوں پر اٹھانا

اس کا مطلب ہے شعر کے اس مصرعے میں لفظ ’’ کو ‘‘ ساقط ہے؟ :

دی مولوی داؤد کوچڈی جو پولیس نے