مصنف ابن ابی شیبہ میں تحریف اور ”تحت السرۃ “ کا اضافہ

[کفایت اللہ]

مصنف ابن ابی شیبہ میں تحریف

مصنف ابن ابی شیبہ میں تحریف کرتے ہوئے لکھا گیا:
حدثنا وکیع ، عن موسی بن عمیر ، عن علقمة بن وائل بن حجر ، عن أبیہ ، قال : رأیت النبی ۖ وضع یمینہ علی شمالہ فی الصلاة تحت السرة.
وائل بن حجررضی اللہ عنہ کہتے ہیں کہ میں نے اللہ کے نبیۖکو دیکھاآپ نے نمازمیں اپنے دائیں ہاتھ کو بائیں ہاتھ پرزیرناف رکھا[مصنف ابن ابی شیبہ:ج ١ص٣٩٠ بتحریف ادارہ القران والعلوم الاسلامیہ کراچی پاکستان ۔مصنف ابی ابی شیبہ :ج١ص٧ ٤٢ بتحریف طیب اکادمی بیرون بوہڑگیٹ ملتان پاکستان۔ مصنف ابن ابی شیبہ :ج١ص٤٢٧ بتحریف مکتبہ امداددیہ ملتان پاکستان۔مصنف ابن ابی شیبہ :ج١ص٣٢٠ رقم ٣٩٥٩بتحریف محمد عوامہ]

عرض ہے کہ اس روایت میں'' تحت السرة'' (زیرناف)کے الفاظ نہیں ہیں بلکہ حنفیوں نے اپنامسلک ثابت کرنے کے لئے اس حدیث میں تحریف کردی ہے اور اپنی طرف سے اس میں '' تحت السرہ''(زیرناف) کااضافہ کردیا ہے۔
یہ کام سب سے پہلے پاکستان کے ادارة القرآن و العلوم الاسلامیہ کراچی نے کیا ۔پھرانہیں کی دیکھا دیکھی پاکستان کے ایک دوسرے مکتبہ طیب اکادمی بیرون بوہڑگیٹ ملتان نے مصنف ابی شیبہ کے ایک دوسرے نسخہ میں یہی تحریف کی ۔اورانہیں کے نقش قدم پر چلتے ہوئے پاکستان کے ایک تیسرے مکتبہ ، مکتبہ امداددیہ ملتان نے بھی اسی نسخہ میں تحریف کی۔
پھرجب اہل علم نے ان کی گرفت کی تو بے چارے محمد عوامہ صاحب نے مصنف ابن ابی شیبہ کی پھرسے تحقیق کی اور بے بنیاد چیزوں کا سہارا لے کر اس نے بھی مصنف کی اس روایت میں تحت السرہ کا اضافہ کردیا ۔
اس کی تفصیل ہم آگے پیش کریں گے لیکن اس سے پہلے ہم مصنف ابن ابی شیبہ کے چند مطبوعہ اورقلمی نسخوں کا حوالہ دیتے ہیں جن میں یہ حدیث تحت السرہ (زیرناف) کی زیادتی کے بغیر ہے۔

 

[کفایت اللہ]

مصنف ابن ابی شیبہ : مطبوعہ ابوالکلام آزاد اکیڈمی ،ہندوستان،١٣٨٦ھ

 

[کفایت اللہ]

مصنف ابن ابی شیبہ : مطبوعہ الدار السلفیہ ممبئی،ہندوستان،١٣٩٩ھ

 

[کفایت اللہ]

مصنف ابن ابی شیبہ : بتحقیق حبیب الرحمان اعظمی حنفی مطبوعہ مکتہ امدادیہ مکہ مکرمہ،١٤٠٣ھ

 

[کفایت اللہ]

مصنف ابن ابی شیبہ : بتحقیق کمال یوسف الحوت مطبوعہ دارالتاج،بیروت١٤٠٩ھ

 

[کفایت اللہ]

مصنف ابن ابی شیبہ : بتحقیق سعید اللحام مطبوعہ دارالفکر،بیروت١٤٠٩ھ

 

[کفایت اللہ]

مصنف ابن ابی شیبہ : بتحقیق محمدعبدالسلام شاہین مطبوعہ دارالکتب العلمیہ،بیروت١٤١٦ھ

 

[کفایت اللہ]

مصنف ابن ابی شیبہ : بتحقیق حمدالجمعہ ومحمداللحیدان، مطبوعہ مکتبہ الرشد،ریاض١٤٢٥ھ

 

[کفایت اللہ]

مصنف ابن ابی شیبہ : بتحقیق اسامہ بن ابراہیم، مطبوعہ دارالفاروق،مصر١٤٢٩ھ

 

[کفایت اللہ]

قارئین ملاحظہ فرمائیں کہ دنیا بھر کے انصاف پسند محققین مصنف ابن ابی شیبہ کی تحقیق کررہے ہیں اور اسے شائع کررہے ہیں لیکن کوئی بھی اس کی زیربحث حدیث میں ''تحت السرہ''(زیرناف) کا اضافہ نہیں کررہا ہے کہ حتی کی ان میں سے بعض مطبوعات حنفی حضرات ہی کی شائع کردہ ہیں لیکن ان میں بھی ''تحت السرہ''(زیرناف) کااضافہ نہیں ہے۔

صرف مطبوعات ہی نہیں بلکہ مخطوطات کاذخیرہ بھی چھان مارئیے پوری دنیا میں یہ کتاب عام ہے اور پوری دنیا میں ا س کے مستند مخطوطات بھی ہیں مگر اس کے کسی بھی مستند مخطوطہ میں زیربحث حدیث کے اندر 'تحت السرہ''(زیرناف) کااضافہ نہیں ہے۔
صرف دومخطوطے میں یہ اضافہ ملتا ہے لیکن یہ مخطوطے مستند نہیں ہیں نیزکاتب نے غلطی سے یہ اضافہ کردیا ہے جیساکہ دیگرشواہد وقرائن اس پر دال ہیں جن کی تفصیل آگے رہی ہے۔

امام ابن عبد البر رحمہ اللہ (المتوفی٤٦٣)کے پاس بھی مصنف ابن ابی شیبہ کا ایک نسخہ تھا انہوں نے اپنی کتب میں اس سے کئی روایات نقل کہیں ہیں حتی کہ زیربحث روایت کے بعد ابراہیم نخعی کاجواثر ہے اسے بھی اجمالا ذکر کیا ہے لیکن اس سے قبل مرفوع حدیث کا کوئی ذکر نہیں کیا ہے ۔[التمہید لما فی الموطأ من المعانی والأسانید:٧٥٢٠]۔
اس سے معلوم ہواکہ اس قدیم ترین نسخہ میں بھی اس روایت کے اندر یہ اضافہ نہیں تھا۔

حنفیوں کے علامہ ابن الترکمانی (المتوفی٧٤٥) نے بھی مصنف ابی شیبہ کی کئی روایات نقل کی ہیں بلکہ ہاتھ باندھنے سے متعلق موصوف مصنف ابن ابی شیبہ ہی سے ابراہیم نخعی کااثر اپنی تائید میں نقل کیا ہے دیکھئے:[الجوہرالنقی :ج٢ص٣١]۔
لیکن اسی اثر سے پہلے موجود وائل بن حجررضی اللہ عنہ کی حدیث کو اپنی تائید میں نقل نہیں کیا یہ اس بات کی دلیل ہے کہ ان کے پیش نظر مصنف ابن ابی شیبہ کا جو نسخہ تھا اس میں بھی یہ اس حدیث میں یہ زیادتی نہیں تھی ۔

شیخ محمد حیاة سندھی حنفی رحمہ اللہ (المتوفی١١٦٣)بھی کہتے ہیں:
فی ثبوت زیادة تحت السرة نظر، بل ہی غلط، منشأہ السہو فنی راجعت نسخة صحیحة للمصنف فرأیت فیہا ہذا الحدیث بہذا السند، وبہذا الألفاظ، لا أنہ لیس فیہا تحت السرة
تحت السرہ کی زیادتی کا ثبوت محل نظرہے بلکہ یہ غلط اور سہو کانتیجہ ہے کیونکہ میں نے مصنف ابن ابی شیبہ کا صحیح نسخہ دیکھا ہے اس میں نے یہی حدیث انہیں الفاظ کے ساتھ دیکھی ہے اس میں یہ ''تحت السرہ'' (زیرناف) نہیں ہے۔[فتح الغفور فی وضع الأیدی علی الصدور:ص٥٢ تحقیق د ضیاء الرحمن الاعظمی]۔
یہاں شیخ محمدحیات سندی نے پوری صراحت کے ساتھ صحیح نسخہ کا حوالہ دیا ہے کہ اس میں یہ اضافہ نہیں ہے۔

محمدانورشاہ کشمیری حنفی رحمہ اللہ نے بھی مصنف ابن ابی شیبہ کے تین مخطوطے دیکھے لیکن انہیں ان میں سے کسی ایک میں بھی یہ ''تحت السرہ''(زیرناف) کااضافہ نہیں ملا۔چنانچہ محمدانورشاہ کشمیری حنفی (المتوفی١٣٥٣) رحمہ اللہ خود لکھتے ہیں:
ولاعجب أن یکون کذالک فانی راجعت ثلاث نسخ للمصنف فماوجت فی واحدة منھا
اورکوئی عجب نہیں کہ بات اسی طرح ہو کیونکہ میں نے مصنف ابن ابی شیبہ کے تین (قلمی)نسخے دیکھے ۔اوران تینوں میں سے کسی ایک میں بھی یہ زیادتی میں نے نہیں پائی [فیض الباری:ج٢ص٢٦٧].

علاوہ ازیں عصرحاضر کے محققین ،مصنف ابن ابی شیبہ کے جس قدر مستند مخطوطے جمع کئے ان میں سے کسی میں بھی یہ اضافہ نہیں ہے۔خودعوامہ نے اعتراف کیاہے کہ مصنف ابن ابی شیبہ کے چارنسخوں میں یہ اضافہ نہیں ہے دیکھیے:[مصنف ابی شیبہ بتحقیق عوامہ :ج٣ص٣٢١ حاشیہ]
ان تمام نسخوں تک فی الحال ہماری رسائی نہیں ہے ورنہ ان سب کی تصویرپیش کردی جاتی ۔تاہم ہماری کوشش جاری ہے جوں ہی ہمارے ہاتھ یہ نسخے لگے ہم ہرنسخہ سے متعلقہ صفحہ کا عکس پیش کردیں گے۔ان شاء اللہ۔
سردست ایک نسخہ سے متعلقہ صفحہ کاعکس ہمیں مل سکاہے اسے ہم پیش کررہے ہیںاس میں زیربحث حدیث کے اندر''تحت السرہ''(زیرناف)کالفظ نہیں ہے ۔ملاحظ ہو: