ملحوظات حج + بہترین زاد راہ۔ تفسیر السراج۔ پارہ:2

[محمد آصف مغل]

اَلْحَجُّ اَشْہُرٌ مَّعْلُوْمٰتٌ۝۰ۚ فَمَنْ فَرَضَ فِيْہِنَّ الْحَجَّ فَلَا رَفَثَ وَلَا فُسُوْقَ۝۰ۙ وَلَا جِدَالَ فِي الْحَجِّ۝۰ۭ وَمَا تَفْعَلُوْا مِنْ خَيْرٍ يَّعْلَمْہُ اللہُ۝۰ۭؔ وَتَزَوَّدُوْا فَاِنَّ خَيْرَ الزَّادِ التَّقْوٰى۝۰ۡوَاتَّقُوْنِ يٰٓاُولِي الْاَلْبَابِ۝۱۹۷

حج کے چند مہینے ہیں معلوم ۔ سو جس نے ان میں اپنے اوپر حج فرض کرلیا تو حج میں جماع اور گناہ اور جھگڑا نہیں چاہیے اور جو نیکی تم کروگے اللہ کو معلوم ہوگی اور راہ کا خرچ لے کر آیا کرو۔ اچھا راہ کا خرچ گناہ سے بچنا ہے اور اے عقل مندو! مجھ سے ڈرتے رہو۔۱؎(۱۹۷)

ملحوظات حج

۱؎ ان آیات میں بتایا کہ حج تطہیر روحانیات کا بہترین ذریعہ ہے اس لیے اس میں لغویات وممنوعات سے بالکلی احتراز لازم ہے، اس لیے اس میں نہ تو رفث درست ہے ۔ یعنی مقاربت وتعلقات جنسی۔ نہ فسوق درست ہے ۔یعنی حدود شرعی سے تجاوز۔ نہ جدل وبغض بلکہ کوشش کرنا چاہیے کہ روحانی حالت نہایت بہتر رہے۔ زیادہ سے زیادہ رضائے الٰہی کو تلاش کیا جائے اور حاصل کیا جائے۔

بہترین زاد راہ

بعض لوگ بلازاد راہ کے حج کے لیے روانہ ہوجاتے ہیں، وہ کہتے ہیں ہم متوکل ہیں اور اس کے بعد دوسرے حجاج کے لیے تکلیف کا موجب ثابت ہوتے ہیں۔ اللہ تعالیٰ نے فرمایا۔ یہ حرکت خلاف تقویٰ ہے ۔جب تک زاد ِراہ میسر نہ ہو حج فرض نہیں۔ نہ توکل اس طرح کا جو تعطل کے مترادف ہے باعث فضیلت نہیں ہے بلکہ تقویٰ باعث اجر ہے اور یہی بہترین زاد راہ ہے ۔

حل لغات

{اَشْھُرٌ} جمع شَھْرٌ۔ مہینہ{رَفَثَ}ہروہ حرکت جو عورتوں سے متعلق ہو{ فُسُوْقَ} حدود اصلیہ سے تجاوز۔ {جدال}۔ بے سود جھگڑا۔ لڑائی۔ جنگ۔ {زاد}۔ راستے کا خرچ۔