انٹرویو محترم انس نضر صاحب ( منتظم اعلی )

[انس]

12۔کس چیز سے خوف زدہ ہو جاتے ہیں؟​

موجودہ حالات کو دیکھ کر۔ لڑائی جھگڑا، دنگا فساد، قتل وغارت سے ڈر لگتا ہے۔

 

[انس]

13۔مستقبل میں ایسا کیا کرنا چاہتے ہیں ، جو ابھی تک نہیں کیا؟

موجودہ مصروفیات اور سرگرمیوں کو مزید آگے بڑھانا چاہتا ہوں۔ دل کرتا ہے کہ کوئی ایسا کام کروں جس سے مرنے کے بعد بھی لوگ فائدہ اٹھائیں۔ لمبا عرصہ ۔۔۔ تا قیامت

 

[انس]

14۔ کسی کے ساتھ پہلی مُلاقات میں آپ سامنے والے میں کیا ملاحظہ کرتے ہیں ؟

سب سے پہلے مدّ مقابل کی ظاہری شخصیت (چہرہ، لباس، ازار وغیرہ) کا جائزہ لیتا ہوں کہ سنت کے مطابق ہے یا نہیں!

ظاہر ہے کہ جو کچھ برتن میں ہوتا ہے وہی باہر آتا ہے۔

 

[انس]

15. اِس پُرفتن دور میں دُنیا کے مجموعی حالات کو دیکھ کر آپ کیا سوچتے ہیں؟

ظاہر سی بات ہے کہ بڑی پریشانی ہوتی ہے۔ یہ سوچ سوچ کر ڈر لگتا ہے مزید حالات خراب ہوں گے تو کیا بنے گا؟ کیونکہ امام مہدی کا ظہور اسی وقت ہونا ہے کہ مسلمان ذلت وگمراہی کی ہر حد کراس کر چکے ہوں۔

 

[انس]

16۔محدث لائبریری اور فورم ، یہ سفر کیسے مکمل کیا ؟؟ آغاز میں کیسی مشکلات سامنے آئیں؟

محدث لائبریری وفورم کی تشکیل کے حوالے سے پوسٹ نمبر 8 ملاحظہ کریں!

محدث ویب سائٹس کے علاوہ ہمارے بہت سارے دیگر ادارے بھی ہیں۔ جن کی مالی ودوسری ذمہ داریاں والد صاحب، والدہ محترمہ اور دیگر بھائیوں پر مشترکہ طور پر ہے۔ویب سائٹس کا کام چونکہ میں نے اپنے شوق سے آگے بڑھایا ہے تو اس کی اصل ذمہ داری بھی مجھ پر ہے کیونکہ باقی کاموں کیلئے فنڈنگ پوری نہیں ہوتی کہ مشترکہ فنڈ سے ان ویب سائٹس سے رقم لی جائے۔ تو بنیادی یہی مشکل ہے جو آغاز سے اب تک موجود ہے۔ بہرحال اللہ کا شکر ہے کہ ساتھی تعاون کرتے ہیں کہ یہ کام جاری ساری ہے۔ میں یہاں شاکر بھائی کا ذکر ضرور کروں گا کہ ویب سائٹس کے ٹیکنیکل کام کی مکمل ذمہ داری کے علاوہ وہ فنڈنگ کے معاملے بھی وہ میرے ساتھ دامے درمے سخنے برابر کے شریک ہیں اور مجھے یہ کہنے میں کوئی باک نہیں کہ ویب سائٹس کیلئے ان کی مجموعی خدمات مجھ سے زیادہ ہی ہیں۔

علاوہ ازیں کام کے افراد کی بہت کمی ہے۔ جس معیار پر کام کرنا چاہتا ہوں اس کے لئے اہل افراد موجود ہیں لیکن ان کو ساتھ شامل کرنے کیلئے زیادہ وسائل کی ضرورت ہے۔ اور مسئلہ یہ بھی ہے کہ ایسے افراد اکثر کمپیوٹر انٹرنیٹ وغیرہ زیادہ استعمال نہیں کرتے۔ مثلاً میری شدید خواہش ہے کہ ہم محدث فتویٰ سائٹ کیلئے جامعہ رحمانیہ کے سینئر اساتذہ یا مولانا مبشر احمد ربانی حفظہ اللہ تعالیٰ جیسے علماء کی خدمات حاصل کر سکیں۔

علمی حضرات کے علاوہ ہمیں ٹیکنیکل افراد کی بھی اشد ضرورت ہے۔ اپنی جاب کے ساتھ ساتھ شاکر بھائی بہت وقت دیتے ہیں لیکن اب جہاں تک ویب سائٹس پہنچ گئی ہیں اور ہمارے زیر تکمیل پراجیکٹس اور آئندہ پراجیکٹس کیلئے صرف شاکر بھائی نا کافی ہیں۔ اگرچہ شاکر بھائی ان معاملات میں اپنے ساتھ اپنے آفس کے ساتھی عمیر صاحب کو مسلسل شریک رکھتے ہیں لیکن اس کے باوجود ہمیں پروگرامنگ کے ماہر (خاص طور پر پی ایچ پی، سب لوڈ جاننے والے) افراد کی شدید ضرورت ہے۔

 

[انس]

17۔ محدث فورم کے وہ کون سے رکن ہیں ، جن کی تحاریر سے آپ متاثر ہوئے اور آپ کو ان رکن سے دینی فائدہ حاصل ہوا؟

فورم کے بہت سارے ارکان ہیں جن کی تحریروں سے استفادہ کیا۔ سب کے نام تو فی الوقت ذہن میں نہیں جو فوری ذہن میں آئے ان کا نام لکھ رہا ہوں۔
ابوالحسن علوی، کفایت اللہ، خضر حیات، @شاکر، ابو عکاشہ، @عبدہ، یوسف ثانی، محمد علی جواد، ابو عبدالله، طالب نور

 

[انس]

18۔ مستقبل میں کیا کچھ کرنے کا عزم رکھتے ہیں ہمیں بھی اس سے آگاہ کیجئے ہوسکتا ہے آپ کو محدث فورم سے کوئی ہمنوا مل جائے ؟

دیکھئے پوسٹ نمبر 12، پوسٹ نمبر 15

 

[انس]

19۔ ہدایت اللہ کی طرف سے آتی ہے، مگر اللہ تعالی ایسے اسباب بنا دیتے ہیں ، جو ہدایت کا باعث بن جاتے ہیں ، آپ کی زندگی میں ان اسباب کا کیا کردار رہا؟؟

نیک وصالح والدین اللہ کی بہت بڑی نعمت ہیں۔ ہمیں اللہ کی اس عظیم رحمت سے وافر حصہ ملا۔ اللہ کے فضل وکرم کے بعد یہ ان کی تربیت اور محنت ہے کہ جب میں نے ہوش سنبھالا تو بفضلہٖ تعالیٰ اللہ کی کتاب کا حافظ ہونے کے ساتھ بہت حد قرآن کریم کے سادہ ترجمہ سے بھی واقف تھا اور زندگی کی لائن کسی حد تک واضح ہو چکی تھی۔

 

[انس]

20۔ زندگی کے اتنے ادوار گزار لینے کا بعد زندگی سے کیا سیکھا؟؟

ایک کام اپنے وقت پر ہی ہونا ہے لہٰذا بگٹٹ بھاگنے کی ضرورت نہیں۔ خلوص، محنت، صبر، حوصلہ اور تسلسل کے ساتھ ہی کام کرنا چاہئے۔
أحب الأعمال إلى الله أدومها وإن قل
اللہ کے ہاں محبوب ترین کام وہ ہے جو مسلسل ہو، اگرچہ تھوڑا ہی کیوں نہ ہو۔

اور یہ بھی کہ کوئی کام صرف مال یا اقتدار سے نہیں ہوتا، اسی طرح کوئی کام فنڈر کی وجہ سے نہیں رکتا۔ اصل اہمیت اخلاص، محنت اور اچھے ساتھیوں کی ہے۔ مخلص ساتھی ہوں گے تو وہ وسائل بھی لے آئیں گے۔ اسی لئے سیدنا موسیٰ علیہ السلام نے مال واقتدار کا مزہ چکھنے کے باوجود اللہ تعالیٰ سے مانگا تو صرف مخلص ساتھی!

 

[انس]

21۔ دین اسلام کی ترقی و بلندی کے لیے ، مسلمانوں میں کس چیز کی ضرورت محسوس کرتے ہیں؟؟

قرآن کی طرف رجوع کی۔

سیدنا عمر رضی اللہ عنہ نے فرمایا تھا:
إنا كنا أذلَّ قومٍ فأعزَّنا اللهُ بالإسلامِ فمهما نطلبُ العزَّ بغيرِ ما أعزَّنا اللهُ به أذلَّنا اللهُ

ہمیں دین تعلیم وتعلم، امر بالمعروف نہی عن المنکر، کائنات میں غور وفکر اور ایسی قوت تیار کرنے کا حکم دیتا ہے کہ دشمن کو ٹیڑھی آنکھ کرنے کی جرأت نہ ہو۔