کن چیزوں سے وضو ٹوٹ جاتا ہے؟(تیسری قسط)

[محدث میڈیا]

4- نشے کی وجہ سےعقل کے زائل ہونے سے ، بے ہوشی سے، پاگل ہوجانےسے بالاجماع وضو ٹوٹ جائےگا، کیونکہ یہ تمام امور نیندسے بڑھ کر ہیں۔ (دیکھیں: الاوسط از ابن المنذر، جلد نمبر: 1، صفحہ نمبر 155)

5- کپڑوں کے بغیر شرمگاہ کوچھونےسے وضو ٹوٹ جاتا ہےچاہے شہوت کےساتھ چھویا جائے یا بغیرشہوت کے

شرمگاہ کو چھونے سے وضو ٹوٹنے کے حوالے سے علماء کرام کے چار قول ہیں:

1- شرمگاہ کو چھونے سے وضو نہیں ٹوٹتا، یہ امام ابوحنیفہ رحمہ اللہ اور چند صحابہ کرام کا موقف ہے۔

2- شرمگاہ کو چھونے سے ہر حال میں وضو ٹوٹ جاتا ہے، یہ امام مالک، امام شافعی، امام احمد، امام ابن حزم اور اکثر صحابہ کرام رضوان اللہ علیہم کاموقف ہے۔

3- اگر شہوت کے ساتھ چھویاجائے تو بھر وضو ٹوٹ جائےگا ورنہ نہیں ٹوٹے گا۔، یہ امام مالک رحمہ اللہ کا ایک قول ہے اور امام البانی رحمہ اللہ نےبھی اسی قول کو اختیار کیا ہے۔

4- شرمگاہ کو چھونے سے وضو کرنا مستحب ہے واجب نہیں ہے، یہ امام احمد کا ایک قول ہے اسی کو شیخ الاسلام ابن تیمیہ اور ابن عثیمین رحمہما اللہ نے اختیار کیا ہے

پہلے قول کی دلیل:

طلق بن علی ؓ سے روایت ہے انھوں نے کہا: ہم وفد کی صورت میں اپنے علاقے سے نکلے حتیٰ کہ رسول اللہ ﷺ کے پاس پہنچے، چنانچہ ہم نے آپ کی بیعت کی اور آپ کے ساتھ نماز پڑھی۔ نماز ختم ہونے کے بعد ایک بدوی سا آدمی آیا اور کہنے لگا: اے اللہ کے رسول! اس آدمی کے بارے میں کیا حکم ہے جو نماز میں اپنے عضو تناسل کو چھو بیٹھتا ہے۔ آپ نے فرمایا: ’’وہ بھی تیرے جسم کا ایک ٹکڑا ہی تو ہے۔‘‘ (سنن نسائی: 165)

دوسرے قول کی دلیل:

بسرہ بنت صفوان ؓ نے بتایا، وہ کہتی ہیں کہ میں نے رسول اللہ ﷺ سے سنا، آپ ﷺ فرماتے تھے: ”جو کوئی اپنے ذکر کو ہاتھ لگائے اسے چاہیے کہ وضو کرے۔“ (سنن ابی داود: 181)

تیسرےقول کی دلیل:

انہوں نے سابقہ دونوں احادیث کو جمع کرتے ہوئے استدلال کیا ہے کہ بسرہ بنت صفوان رضی اللہ عنہا والی کامطلب ہے: جب شہوت کے ساتھ چھوئے تو وضو کرے اور طلق بن علی رضی اللہ عنہ والی روایت کا مطلب ہے: اگر شہوت کے بغیر چھوئے تو وضو نہیں ہے۔

چوتھے قول کی دلیل:

انہوں نے سیدہ بسرہ والی روایت میں شرمگاہ کے چھونے سے وضو کرنے کے حکم کو استحباب پر محمول کیا ہے ۔