احادیث کے متعلق سوالات و جوابات

[محمد ارسلان]

سوال: حدیث کسے کہتے ہیں؟
جواب: (اصطلاح میں) "حدیث سے مراد ہر وہ خبر ہے جو رسول اللہ صلی اللہ علیہ وسلم سے منسوب کی گئی ہو۔"

 

[محمد ارسلان]

سوال: نوعیت کے اعتبار سے حدیث کی کتنی قسمیں ہیں؟
جواب: نوعیت کے اعتبار سے حدیث کی تین قسمیں ہیں۔
1۔ حدیث قولی
2۔ حدیث فعلی
3۔ حدیث تقریری

 

[محمد ارسلان]

سوال: حدیث قولی کسے کہتے ہیں؟
جواب: "حدیث قولی اس حدیث کو کہتے ہیں جو رسول اللہ صلی اللہ علیہ وسلم کے قول یعنی (زبانی ارشاد مبارک) پر مبنی ہو"۔
مثال:
رسول اللہ صلی اللہ علیہ وسلم نے فرمایا: "تم اسی طرح نماز پڑھنا جیسے تم نے مجھے نماز پڑھتے ہوئے دیکھا ہے۔" (صحیح بخاری)

 

[محمد ارسلان]

سوال: حدیث فعلی کسے کہتے ہیں؟
جواب: "حدیث فعلی اس حدیث کو کہتے ہیں جو رسول اللہ صلی اللہ علیہ وسلم کے عمل مبارک پر مبنی ہو۔"
مثال:
نعمان بن بشیر رضی اللہ عنہ فرماتے ہیں جب ہم نماز کے لئے کھڑے ہوتے تو رسول اللہ صلی اللہ علیہ وسلم صفیں درست فرماتے، جب ہم سیدھے کھڑے ہو جاتے تو "اللہ اکبر" کہہ کر نماز شروع فرماتے۔" (ابوداؤد)

 

[محمد ارسلان]

سوال: حدیث تقریری کسے کہتے ہیں؟
جواب: "حدیث تقریری اس حدیث کو کہتے ہیں جونہ تو رسول اللہ صلی اللہ علیہ وسلم کا قول ہو اور نہ فعل، بلکہ وہ قول اور عمل ہے، جو آپ صلی اللہ علیہ وسلم کے سامنے کیا گیا ہو، اور جس پر آپ صلی اللہ علیہ وسلم نے خاموشی اختیار کی،جس کی نہ تو تردید کی اور نہ انکار کیا۔ ایسا قول اور عمل جائز ہوتا ہے، اگر یہ ناجائز ہوتا تو آپ منع فرما دیتے"۔
مثال:
سیدنا قیس بن عمرو رضی اللہ عنہ کہتے ہیں، نبی اکرم صلی اللہ علیہ وسلم نے ایک آدمی کو صبح کی نماز کے بعد دو رکعتیں پڑھتے دیکھا تو فرمایا : "صبح کی نماز تو دو رکعت ہے" اس آدمی نے جواب دیا میں نے فرض نماز سے پہلے کی دو رکعتیں نہیں پڑھی تھیں ، لہذا اب پڑھی ہیں۔ رسول اللہ صلی اللہ علیہ وسلم یہ جواب سن کر خاموش ہو گئے۔ (یعنی اس کی اجازت دے دی)(ابوداؤد)

 

[محمد ارسلان]

سوال: حدیث کی اقسام جان لینے کے بعد حدیث کی ایک اور تعریف کیسے کی جائے گی ؟
جواب: "حدیث سے مراد ہر وہ خبر ہے جو
رسول اللہ صلی اللہ علیہ وسلم کے قول، فعل، یا تقریر پر مبنی ہو"۔

 

[محمد ارسلان]

سوال: سنت کسے کہتے ہیں؟
جواب: "سنت کا مطلب ہے طریقہ یا راستہ، شرعی اصطلاح میں سنت کا مطلب رسول اللہ صلی اللہ علیہ وسلم کا طریقہ ہے"۔
مثال:
سیدنا انس بن مالک رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا:
"جس نے میرے طریقہ پر چلنے سے گریز کیا وہ مجھ سے نہیں"۔(صحیح بخاری)

 

[محمد ارسلان]

سوال: صحابی کسے کہتے ہیں؟
جواب: "صحابی انہیں کہا جاتا ہے جن کو ایمان کی حالت میں نبی اکرم صلی اللہ علیہ وسلم سے شرف ملاقات یا آپ کا دیدار نصیب ہوا ہو، اور ایمان ہی پر ان کی وفات ہوئی ہو"۔

 

[محمد ارسلان]

سوال: تابعی کسے کہتے ہیں؟
جواب: "تابعی انہیں کہا جاتا ہے جن کی بحالت ایمان صحابی سے
ملاقات یا ان کا دیدار حاصل ہوا ہو، اور ایمان ہی پر ان کی وفات ہوئی ہو"۔

 

[محمد ارسلان]

سوال: تبع تابعی کسے کہتے ہیں؟
جواب: "تبع تابعی انہیں کہا جاتا ہے جن کو بحالت ایمان تابعی سے ملاقات یا ان کا دیدار حاصل ہوا ہو"۔