ایک غزل

[سید طہ عارف]

سلمان گیلانی کی وجہ شہرت ان کی زعفران زار طنز و مزاح سے بھرپور شاعری ہے۔
لیکن آپ ان کی اس غزل کو پڑھ کر بھی بہت لطف اندوز ہوں گے

اندھیری راتوں میں آسماں پر اگر ستاروں کی روشنی ہے
تو میری تاریک زندگی میں تمھاری یادوں کی روشنی ہے

بہت دنوں سے وہ چاند سی شکل دیکھنے کو ترس گئے ہیں
بہت دنوں سے بجھی بجھی سی ھماری آنکھوں کی روشنی ہے

مسافروں اس اندھیری شب میں انہیں دعا دو
جو اہل ہمت جلا گئے ہیں یہ ان چراغوں کی روشنی ہے

یہ پیشہ ور رھنما ہیں سارے بھلا میں کیوں ان کا ہاتھ تھاموں
کہ مجھ کو رستہ دکھانے والی میرے عقیدوں کی روشنی ہے

میں شک و شبہات کے اندھیروں سے رک سکا ہوں نہ رک سکوں گا
کہ میرے ہر ہر قدم کے آگے مرے ارادوں کی روشنی ہے

یہی ہے بہتر ھم اپنے گھر میں چراغ اپنا جلا کے رکھیں
یہ کوئی تک ہے کہ گھر ھمارا اور پرایوں کی روشنی ہے

ادھر امیروں کے قصر و ایواں تو رات کو بھی چمک رہے ہیں
ادھر غریبوں کے جھونپڑوں میں بجھے چراغوں کی روشنی ہے

کہیں سے اس جوہری کو لاو جو ان کو ترکیب سے تراشے
نہاں ابھی تک کثافتوں میں ھمارے ہیروں کی روشنی ہے

مہک رہا ہے چمک رہا ہے جہان سلمان آ کے دیکھو
کہیں تبسم کی نکہتیں ہیں کہیں کتابوں کی روشنی ہے