تم ضرور اہل کتاب سے اور مشرکین سے ایذا کی بہت سی باتیں سنو گے۔ تفسیر السراج۔ پارہ:4

[محمد آصف مغل]

لَتُبْلَوُنَّ فِيْٓ اَمْوَالِكُمْ وَاَنْفُسِكُمْ۝۰ۣ وَلَتَسْمَعُنَّ مِنَ الَّذِيْنَ اُوْتُوا الْكِتٰبَ مِنْ قَبْلِكُمْ وَمِنَ الَّذِيْنَ اَشْرَكُوْٓا اَذًى كَثِيْرًا۝۰ۭ وَاِنْ تَصْبِرُوْا وَتَتَّقُوْا فَاِنَّ ذٰلِكَ مِنْ عَزْمِ الْاُمُوْرِ۝۱۸۶ وَاِذْ اَخَذَ اللہُ مِيْثَاقَ الَّذِيْنَ اُوْتُوا الْكِتٰبَ لَتُبَيِّنُنَّہٗ لِلنَّاسِ وَلَا تَكْتُمُوْنَہٗ۝۰ۡفَنَبَذُوْہُ وَرَاۗءَ ظُہُوْرِھِمْ وَاشْتَرَوْا بِہٖ ثَمَنًا قَلِيْلًا۝۰ۭ فَبِئْسَ مَا يَشْتَرُوْنَ۝۱۸۷

تم اپنے مالوں میں اور اپنی جانوں میں آزمائے جاؤگے اور تم ضرور اہل کتاب سے اور مشرکین سے ایذا کی بہت سی باتیں سنو گے اور اگر تم صبر کرو اور پرہیزگار رہو تو یہ ہمت کے کاموں میں سے ہے۔۱؎ (۱۸۶) اورجب خدا نے اہل کتاب سے عہد لیا تھا کہ تم اس کتاب کا بیان لوگوں سے کرو گے اور اسے نہ چھپاؤ۔ سو انھوں نے اس عہد کو اپنی پیٹھ کے پیچھے پھینک دیا اور اس کے مقابلہ میں حقیر قیمت خریدی۔ سو انھوں نے کیسی بری شے خرید کی۔۲؎ (۱۸۷)

۱؎ یعنی مال ودولت کا حصول گناہ نہیں، البتہ اللہ کے امتحانوں میں پورا نہ اترنا معصیت وکجروی ہے۔

تم ضرور اہل کتاب سے اور مشرکین سے ایذا کی بہت سی باتیں سنو گے

اللہ تعالیٰ ان آیات میں فرماتا ہے کہ مسلمان کے لئے کڑی مصیبتیں آئیں گی۔ وہ مجبور ہے کہ برداشت کرے۔ شرک وکفر کے حلقوں سے اسے دکھ پہنچے گا مگر وہ صبر اور استقامت سے کام لے۔ یہی بات اللہ کو پسند ہے اوریہی عزیمت ہے۔

۲؎ اس آیت میں بتایا گیا ہے کہ ہر اہل کتاب مکلف ہے کہ خدا کے احکام کو بالوضاحت دوسروں تک پہنچائے اور کسی قسم کی تحریف سے کام نہ لے مگر یہودیوں نے محض اس لیے حقائق کو بدل دیا کہ اس سے ان کا دنیوی مفاد متعلق تھا۔

ہر معاوضہ جو حق وصداقت کے بدلے قبول کیا جائے، قرآن مجید کی اصطلاح میں وہ ثمن قلیل ہے یعنی ایک ایسی حقیر رقم جو بمقابلہ اخروی انعام کے نہایت کم ہے ۔