تین دن سے زیادہ بول چال چھوڑنا حلال نہیں

[ماریہ انعام]

السلام علیکم ورحمۃ اللہ وبرکاتہ

باب البر والصلۃ کی آٹھویں حدیث کے الفاظ کچھ یوں ہیں
وعن ابی ایوب رضی اللہ عنہ ان رسول اللہ ﷺ قال :
لا یحل لمسلم ان یھجر اخاہ فوق ثلاث لیال یلتقیان فیعرض ھذا ویعرض ھذا وخیرھما الذی یبدا بالسلام
(متفق علیہ)
ابو ایوب رضی اللہ عنہ سے روایت ہے کہ رسول اللہ ﷺ نے فرمایا
کسی مسلم کے لیے حلال نہیں کہ وہ اپنے بھائی کو تین راتوں سے زیادہ چھوڑے ۔۔۔وہ دونوں ملیں تو یہ اس طرف منہ پھیر لے اور وہ (اس طرف) منہ پھیر لے اور ان دونوں میں سے بہتر وہ ہے جو سلام میں پہل کرے
متفق علیہ

 

[اسحاق]

جزاک الله خیرا

 

[ماریہ انعام]

السلام علیکم ورحمۃ اللہ وبرکاتہ

تین راتوں سے زیادہ حلال نہ ہونے سے صاف ظاہر ہے کہ تین راتوں سے زیادہ آپس میں بول چال چھوڑ دینا حرام ہے۔۔۔۔کیونکہ بات چیت چھوڑ دی تو سارے حقوق ہی ضائع کر دیئے جو ایک دوسرے پر واجب تھے ۔۔۔مثلا سلام‘ قبولِ دعوت ‘ عیادت وغیرہ
تین راتوں تک باہمی گفتگو چھوڑنا جائز ہے کیونکہ ناراضگی اور غصہ انسانی فطرت ہے ۔۔۔اسے مدِّ نظر رکھتے ہوئے اتنی رعایت دی گئی ہے تاکہ پہلے دن غصے میں ٹہراؤ آ جائے ‘ دوسرے دن انسان کچھ سوچے ‘ تیسرے دن واپس لوٹ آئے ۔۔۔عموما تین دنوں میں غصہ ختم یا کم ضرور ہو جاتا ہے ۔۔۔۔اس سے زیادہ قطع تعلق کرے گا تو قطع حقوق لازم آئے گا

 

[ماریہ انعام]

قطع تعلق جو حرام ہے سلام کہنے سے ختم ہو جاتا ہے ۔۔۔۔حضرت عائشہ رضی اللہ عنہا سے روایت ہے کہ رسول اللہ ﷺ نے فرمایا

لا یکون لمسلم ان یھجر مسلما فوق ثلاثۃ فاذا لقیہ سلم علیہ ثلاث مرات کل ذالک لا یرد علیہ فقد باء باثمہ ( صحیح ابی داؤد)
کسی مسلمان کے لیے یہ جائز نہیں کہ کسی مسلمان کو تین دن سے زیادہ چھوڑے ۔۔۔پس جب وہ اسے ملے تو اسے تین دفعہ سلام کہے اگر (دوسراآدمی) ہر دفعہ اسے جواب نہیں دیتا تو وہ اس کے گناہ کے ساتھ لوٹے گا

امام احمد نے فرمایا کہ اگر دوسرے آدمی کو اس کے بات نہ کرنے سے تکلیف ہوتی ہو تو صرف سلام سے قطع تعلق ختم نہ ہو گا بلکہ پہلے جیسے تعلقات بحال کرنے سے ختم ہو گا ۔۔۔۔۔مگر اوپر والی حدیث سے معلوم ہوتا ہے کہ حرام وہ صورت ہے جس میں دونوں ملتے ہیں اور منہ پھیر لیتے ہیں ‘ سلام تک نہیں کرتے ۔۔البتہ اس میں شک نہیں کہ اخوت دینی جس تعلق کا تقاضا کرتی ہے وہ پہلے تعلقات مکمل بحال کرنے سے ہی حاصل ہو سکتا ہے

 

[ماریہ انعام]

اللہ کی نافرمانی کی وجہ سے کسی سے بول چال بند کر دینا جائز ہے ۔۔۔جیسا کہ رسول اللہ ﷺ نے کعب بن مالک اور ان کے ساتھیوں کے غزوۃ تبوک سے پیچھے رہ جانے کی وجہ سے مسلمانوں کو ان کے ساتھ بات چیت کرنے سے منع کیا تھا ۔۔۔۔معلوم ہوتا ہے کہ یہ قطع تعلقی مخلص ساتھیوں کے ساتھ ان کی اصلاح کے لیے جائز ہے تاکہ ان پر قطع کلام اثر انداز ہو اور وہ جق کی طرف پلٹ آئیں۔۔۔۔ورنہ آپﷺ اور مسلمانوں نے منافقین سے بات چیت ترک نہیں فرمائی ۔۔۔۔ منافقین سے قطع تعلق دل سے ہوتا ہے زبان سے نہیں ۔۔۔البتہ مخلص مسلمانوں سے ظاہری عتاب ترک کلام سے ہوتا ہے دل سے قطع تعلقی نہیں ہوتی ۔