بسم اللہ الرحمن الرحیم
عرض ناشر
بلاشبہ اسلام ایک مکمل دین اور جامع ضابطہ حیات ہے۔اسلام نے زندگی کے ہر شعبہ کے بارے میں احکامات نازل فرمائے اور بتادیا کہ اہلِ ایمان کی شان یہ ہے کہ وہ اللہ اور اس کے رسول کی اطاعت کرتے ہیں ۔
اِنَّمَا كَانَ قَوْلَ الْمُؤْمِنِيْنَ اِذَا دُعُوْٓا اِلَى اللہِ وَرَسُوْلِہٖ لِيَحْكُمَ بَيْنَہُمْ اَنْ يَّقُوْلُوْا سَمِعْنَا وَاَطَعْنَا۰ۭ وَاُولٰۗىِٕكَ ہُمُ الْمُفْلِحُوْنَ۵۱ (النور ۵۱)
''مومنوں کی شان تو یہ ہے کہ جب اللہ تعالیٰ اوراس کے رسول کی طرف فیصلے کے لیے بلا یاجائے تو ان کا جواب اس کے سوا کچھ نہ ہو کہ ہم نے حکم سنااور مانا یقیناایسے لوگ کامیاب ہیں۔''
معلوم ہوا کہ اطاعت صرف اللہ اور اس کے رسولﷺ کا حق ہے ۔بلکہ اللہ تعالی رسول اللہ ﷺ سے فرماتاہے:
وَاتَّبِعْ مَا يُوْحٰٓى اِلَيْكَ مِنْ رَّبِّكَ۰ (الاحزاب:2)
'' اوراس چیز کی پیروی کر جو تیرے رب کی طرف سے تجھ پر وحی ہوئی۔''
شیطان کی یہ خصلت ہے کہ وہ برائی کو خوبصورت کرکے پیش کرتاہے ۔یہ جمہوریت جو کفرہے شیطان اسے اسلامی کہہ کر مسلمانوں کے سامنے پیش کرتاہے ۔اسی لیے عام مسلمان یہ سمجھتے ہیں کہ جمہوریت وہ بری ہے جو مغرب میں ہے ۔پاکستان میں جہاں سب مسلمان ہیں جمہوریت اسلامی ہے ۔حالانکہ یہ بہت بڑادھوکہ ہے ۔جمہوریت سے مراد عوام کی حکومت ہے۔جب حکومت کا حق اللہ کی بجائے عوا م کو حاصل ہے تو یہ شرک کفرہے۔
ڈاکٹر سید شفیق الرحمان حفظہ اللہ نے علماء اہل سنت کے حوالوں سے ثابت کیا ہے کہ علماء اہل سنت اس بات پر متفق ہیںکہ جمہوریت کی بنیادیں اسلامی عقیدے کے الٹ ہیں ۔ ان شاء اللہ اہل توحید عقیدہ کو سمجھنے کے لیے اس کتاب کو مفید پائیں گے۔
اللہ تعالیٰ ان کی اس کاوش کو قبول فرمائے اور ہمارے اور عامتہ الناس کے لیے اسے فلاح دارین کا سبب بنائے ۔آمین
خادم کتاب وسنت
سید عبدالسلام
منبر التوحید والسنہ
40/A نورالحق کالونی بہاولپور