رمضان کی فکر

[نسرین فاطمہ]

فکر رمضان

رمضان المبارک ہمارے رب کی طرف سے رحمتیں برکتیں لئے پھر سایہ فگن ہونے کو ہے ،اس ماہ مبارک میں خیر و بھلائی حاصل کرنے کے اس قدر مواقع سمیٹے ہوئے ہیں کہ اگر ہر لمحہ سوچ کی درستگی ، نیت میں اخلاص اور حسن عمل کی سعی و جہد کی جائے تو ہم اتنا کچھ سمیٹ سکتے ہیں جتنا سال بھر کوششوں پر مشقت عبادتوں اور صبر و ضبط کے ساتھ حسن معاملہ نہیں کر پاتے کہ اس ماہ میں فرائض کا ستر گنا اور نوافل کا فرائض کے برابر اجر ہے اور جس کی ایک رات ہزار مہینوں کی عبادات سے بہتر ہوتی ہے جسے اللہ نے آخری پانچ طاق راتوں میں پوشیدہ کردیا ہے تاکہ اس کے چاہنے والے اس رات کے شوق میں رکوع وسجود کریں ،تسبیح و تہلیل میں وقت گزاریں اور اللہ کے حضور گڑ گڑ اکے دعا کریں اور پھر وہ ان عبادات کو شرف قبولیت بخشے،اور آخری شب میں اپنے فرشتوں کے سامنے اپنے بندے کی مغفرت و بخشش کا اعلان کردے اور بندہ اپنی بخشش پانے کے بعد انعام بھی حاصل کرے ۔۔۔عید کی صورت میں ملنے والا انعام ۔۔۔۔اور عید کی صبح فرشتے گلیوں کے کنارے کھڑے ہوکر نماز عید کے لئے اٹھنے والے قدموں کو دیکھا کرتے ہیں۔ ۔۔

یہ مبارک ماہ آج جن سروں پہ سایہ کر رہا ہے کل اس کے زیر سایہ اور بھی لوگ تھے جو آج ہمارے درمیاں نہیں ہیں ۔۔لہذا ہمارے لئے یہ چند یوم بڑے قیمتی اور انمول ہیں کہ کہ وقت کی تیز دھار نامعلوم ہمیں اگلے سال کہاں لے جائیگی ۔

اس لئے اس کے ہر لمحہ سے فائدہ حاصل کریں اپنی دعاؤں میں رب کی رحمت حاصل کرنے کے لئے اپنے گناہوں ۔خطاؤں سے استغفار کیجئے ۔

وہ فیاض حقیقی ہمیں اپنی رحمت عطا فرمائے۔آمین