شذوذات اور تفردات

[ابوالحسن علوی]

اہل علم نے علماء کی شاذ آراء اور تفردات سے عدم تعرض کا حکم دیا ہے لیکن ایک سوال یہ پیدا ہوتا ہے کہ شاذ قول ہے کیا؟ تفردات کی تعریف کیا ہو گی؟

علم قراء ات، علم حدیث اور علم فقہ میں شاذ کی اصطلاح مختلف معانی میں استعمال ہوئی ہے۔ ہم یہاں فقہ اور اصول فقہ کی روشنی میں اس اصلاح پر گفتگو کر رہے ہیں۔

جمہور اہل علم خیال ہے کہ شاذ ہونے کا تعلق قائل سے ہے جبکہ بعض کا کہنا ہے کہ اس کا تعلق قول سے ہے۔

جمہور کہتے ہیں کہ شاذ قول وہ ہے کہ جس کا قائل جماعت کے مقابلے میں تنہا یا اکیلا ہو۔ یعنی علماء کی ایک جماعت کی رائے کچھ ہے جبکہ ایک عالم دین کی رائے ان جمہور کے برعکس ہے۔

امام ابن حزم رحمہ اللہ کہتے ہیں کہ شاذ قول وہ ہے جو حق کے خلاف ہو، چاہے وہ جماعت کا ہی کیوں نہ ہو۔ چونکہ ابن حزم رحمہ اللہ کے اقوال پر عموما شذوذات اور تفردات کے فتوے لگائے گئے تو انہیں یہ مسئلہ پیش آیا۔ انہوں نے کہا کہ اگر اکیلے کا قول حق کے موافق اور دلیل پر مبنی ہے تو یہ شاذ نہیں ہے اور جمہور یا جماعت علماء کا قول اگر حق کے خلاف یا کمزور دلیل پر ہے تو یہ شاذ قول ہو گا۔ واللہ اعلم بالصواب

اگر تو ابن حزم رحمہ اللہ کی بات مان لی جائے تو مسئلہ واضح ہو جاتا ہے لیکن اگر جمہور کی بات کو لیا جائے تو اس پر یہ سوال پیدا ہوتا ہے کہ کیا صرف اکیلا ہونا کسی کے غلط ہونے کی دلیل بن سکتا ہے؟ یہ بھی ذہن میں آتا ہے کہ امام ابن تیمیہ رحمہ اللہ، امام ابن حزم رحمہ اللہ، امام بخاری رحمہ اللہ اور دیگر ائمہ کے بعض اقوال جو کہ ان کے تفردات شمار ہوتے تھے لیکن بعد میں عوام کی ایک جماعت نے ان پر عمل شروع کر دیا یا علماء نے اس کے مطابق فتوی دے دیا تو کیا اس کے بعد ایک عرصہ اس قول کو شاذ یا تفرد شمار کرنے کے بعد اس پر علماء کے فتوی یا عوام کے عمل سے وہ شاذ یا متفرد قول کی تعریف سے نکل جاتا ہے۔

 

[طاہر اسلام]

ما شاءاللہ برادرم علوی صاحب نے بہت عمدہ موضوع شروع کیا ہے اور بہت اچھی معلومات پیش کی ہیں؛فجزاہ اللہ خیراً
میرا خیال ہے کہ شاذ کا تعلق اصلاً قول سے ہے اور شاذ اسے کہا جائے گا جو اجماع کے مخالف ہو ؛اگر کسی مسئلے پر اجماع نہیں بل کہ اکثریت کا ایک موقف ہے تو وہاں دلیل کو دیکھا جائے گا ؛اگر دلیل قوی ہو تو وہ موقف درست ہو گا خواہ اس کے قائلین کم ہوں یا ایک ہی ہو۔دلیل کی قوت کا اندازہ استدلال کے مسلمہ اصولوں کی روشنی میں ہو گا،مثلاً حدیث ہے تو دیکھا جائے گا کہ وہ صحیح ہے یا ضعیف،پھر یہ بھی دیکھنا ہو گا لغت کی رو سے وہ استدلال درست ہے یا نہیں،علاوہ ازیں دیگر دلائل سے تعارض تو پیدا نہیں ہو رہا ،یا تعمیم و تخصیص کے قواعد کی رو سے وہ صحیح ہے یا نہیں؟وغیرہ
ایک نکتہ یہ بھی ہے کہ شذوذ اور تفرد میں کوئی فرق ہے یا نہیں؟
میری راے میں فرق کرنا چاہیے اور اس کا تعلق قائل سے ہے؛اگر تو بدعتی آدمی ہے تو اس کا مخالف دلیل قول شاذ ہو گا اور اگر اہل سنت عالم ہے تو اس کا مرجوح موقف تفرد شمار ہو گا اور اسے بدعتی قرار نہیں دیا جائے گا کیوں کہ اصلاً وہ اہل سنت کے طریق استدلال پر ہے لیکن اس مسئلے میں فہم کی غلطی کی بنا پر غلط موقف اپنا لیا ہے۔
یہ ایک توجیہ ہے؛دیگر اہل علم سے تبصرے اور رہ نمائی کی درخواست ہے۔

 

[محمد فیض الابرار]

اچھا موضوع ہے اس سے اس امر میں مدد ملے گی کہ آیا تفردات علی الاطلاق مردود ہیں یا کچھ شروط کے ساتھ انہیں قبول کیا جائے گا یا اس کے بارے میں خاموش رہا جائے گا تاوقتیکہ ان کے بارے میں مکمل وضاحت ہو جائے اور یہ کہ کیا کسی شخص کی علمی اور تحقیقی آراء اگر علماء کے عمومی موقف سے الگ ہوں تو اس پر کیا حکم لگایا جائے گا ؟
ابو الحسن بھائی اللہ آپ کو جزائے خیر دے