(قسط:5)((سیدنا عمر بن خطاب رضی اللّٰہ عنہ کے حالات زندگی اور فضائل و مناقب)) (قبولِ اسلام کے اسباب ،حصہ سوم)

[ابن الياس آسي الكلائي]

سیدنا عمر فاروق رضی اللّٰہ عنہ کے حالات زندگی اور فضائل و مناقب

حافظ محمد فیاض الیاس الاثری دارالمعارف لاہور:0306:4436662

(حصہ:5)سیدنا عمر بن خطاب رضی اللّٰہ عنہ کے حالات زندگی اور فضائل و مناقب ؛قبولِ اسلام کے اسباب(حصہ سوم)

٤۔ قرآن کی تاثیر: حضرت عمر فاروق رضی اللّٰہ عنہ بیان کرتے ہیں کہ اسلام قبول کرنے سے قبل میں ایک دن رسول اللہ صلی اللّٰہ علیہ وسلم کی تلاش میں نکلا۔ میں نے دیکھا کہ آپ مجھ سے پہلے ہی کعبۃ اللہ میں تشریف فرما ہیں۔

میں آپ صلی اللّٰہ علیہ وسلم کے پیچھے کھڑا ہو گیا۔ آپ نے نماز میں سورہ حاقّہ کی تلاوت فرمائی۔ میں قرآن سن کر اس کی اثر آفرینی پر حیران رہ گیا۔ میں نے عالم حیرت میں سوچا: اللہ کی قسم! اسی لیے تو قریش کہتے ہیں کہ آپ شاعر ہیں۔

اسی دوران میں آپ صلی اللّٰہ علیہ وسلم نے یہ آیات تلاوت فرمائیں:( اِِنَّہ، لَقَوْلُ رَسُوْلٍ کَرِیْمٍ o وَمَا ہُوَ بِقَوْلِ شَاعِرٍ قَلِیْلًا مَا تُؤْمِنُوْنَ o )''یہ ایک رسولِ کریم کا قول ہے، کسی شاعر کا قول نہیں۔ تم لوگ کم ہی ایمان لاتے ہو۔''

آپ صلی اللّٰہ علیہ وسلم کی اس تلاوت سے مجھے خیال گزرا کہ آپ تو (نعوذباللہ) کاہن(میرے دل کی بات جانتے) ہیں۔ اسی دوران میں پھر آپ صلی اللّٰہ علیہ وسلم نے یہ آیات تلاوت فرمائیں:( وَ لاَ بِقَوْلِ کَاہِنٍ قَلِیْـلًا مَا تَذَکَّرُوْنَo تَنْزِیْلٌ مِّنْ رَّبِّ الْعٰـلَمِیْنَo وَ لَوْ تَقَوَّلَ عَلَیْنَا بَعْضَ الْاَقَاوِیْلِo لاََخَذْنَا مِنْہُ بِالْیَمِیْنِo ثُمَّ لَقَطَعْنَا مِنْہُ الْوَتِیْنَo فَمَا مِنْکُمْ مِّنْ اَحَدٍ عَنْہُ حَاجِزِیْنَo وَاِِنَّہ، لَتَذْکِرَۃٌ لِّلْمُتَّقِیْنَo وَاِِنَّا لَنَعْلَمُ اَنَّ مِنْکُمْ مُّکَذِّبِیْنَo وَاِِنَّہ، لَحَسْرَۃٌ عَلَی الْکٰفِرِیْنَo وَاِِنَّہ، لَحَقُّ الْیَقِیْنِo فَسَبِّحْ بِاسْمِ رَبِّکَ الْعَظِیْمِ o ) (الحاقہ :40/69-52)

''نہ یہ کسی کاہن کا قول ہے، تم لوگ کم ہی غور کرتے ہو۔ یہ رب العالمین کی طرف سے نازل ہوا ہے۔ اگر اس (نبی) نے خود گھڑ کر کوئی بات ہماری طرف منسوب کی ہوتی تو ہم ان کا دایاں ہاتھ پکڑ لیتے اور ان کی رگِ گردن کاٹ ڈالتے، پھر تم میں سے کوئی (ہمیں) اس کام سے روکنے والا نہ ہوتا۔ درحقیقت یہ پرہیز گار لوگوں کے لیے ایک نصیحت ہے۔ ہم جانتے ہیں کہ تم میں سے کچھ لوگ جھٹلانے والے ہیں۔ ایسے کافروں کے لیے یقینا یہ موجب حسرت ہے اور یہ بالکل یقینی حق ہے۔ پس اے نبی! اپنے رب عظیم کے نام کی تسبیح کرو۔''

سیدنا عمر رضی اللّٰہ عنہ یہ واقعہ بیان کر کے کہا کرتے تھے کہ اس کے بعد اسلام میرے دل میں جاگزیں ہو گیا۔(أحمد بن حنبل،المسند:١٠٧ و الہندی، کنز العمال:٣٥٧٣٩)