محدثین

[کلیم حیدر]

محدثین

گروہ ایک جو یا تھا علم نبیؐ کا
لگایا پتا جس نے ہر مفتری کا

نہ چھوڑا کوئی رخنہ کذبِ خفی کا
کیا قافیہ تنگ ہر مدعی کا

کئے جرح و تعدیل کے وضع قانوں
نہ چلنے دیا کوئی باطل کا افسوں

اسی دھن میں آساں کیا ہر سفر کو
اسی شوق میں طے کیا بحر و بر کو

سنا خازنِ علم دیں جس بشر کو
لیا اس سے جاکر خبر اور اثر کو

پھر آپ اس کو پرکھا کسوٹی پہ رکھ کر
دیا اور کو خود مزا اس کا چکھ کر

کیا فاش راوی میں جو عیب پایا
مناقب کو چھانا، مثالب کو تایا

مشائخ میں جو قبح نکلا جتایا
ائمہ میں جو داغ دیکھا، بتایا

طلسم وَرع ہر مقدس کا توڑا
نہ ملا کو چھوڑا، نہ صوفی کو چھوڑا

رجال اور اسانید کے ہیں جو دفتر
گواہ ان کی آزادی کے ہیں یکسر

نہ تھا ان کا احساں یہ اِک اہل دین پر
وہ تھے اسمیں ہر قوم و ملت کے رہبر

لبرٹی میں جو آج فائق ہیں سب سے
بتائیں کہ لبرل بنے ہیں وہ کب سے​