سمندری جہاز میں کام کرنے والوں کی نماز جمعہ

[مقبول احمد سلفی]

سوال : میں سمندرمیں کام کرتاہوں ۔ جہاز میں 28 دن میری ڈیوٹی ہوتی ہے اور 28 دن چھٹی ۔ ہم ایک جگہ تین مہینے رہتے ہیں پھر دوسری جگہ جاتے ہیں ۔ اس جہاز میں پانچ وقت اذان دی جاتی ہے اور نماز ادا کی جاتی ہے ۔ کیا ہم لوگوں پہ جمعہ کی نماز فرض ہے ؟

جواب : جمعہ کی نماز گاؤں یا شہر والوں پہ فرض ہے یعنی ان لوگوں کو جمعہ کی نماز ادا کرنی ہے جو کسی جگہ رہائش اختیار کئے ہوئے ہیں خواہ وہ قریہ(گاؤں) ہو یا مصر(شہر)۔اس لئے غیرآباد جگہوں پہ جمعہ کی نماز نہیں قائم کی جائے گی ۔
نبی ﷺ سے بستی کے علاوہ کسی غیررہائشی علاقے میں قولا یا عملا جمعہ کی نماز ادا کرنا ثابت نہیں ہے ۔
اگر سمندر کے قریب کوئی بستی ہوجہاں سے جمعہ کی اذان کی آواز سنائی دیتی ہو تو بستی والوں کے ساتھ جمعہ کی نماز ادا کرنا چاہئے ۔ اللہ کا فرمان ہے :
[يَا أَيُّهَا الَّذِينَ آمَنُوا إِذَا نُودِيَ لِلصَّلاةِ مِنْ يَوْمِ الْجُمُعَةِ فَاسَعَوْا إِلَى ذِكْرِ اللَّهِ وَذَرُوا الْبَيْعَ ](الجمعة: 9)
ترجمہ : اے ایمان والو! جب جمعہ کے دن نماز کے لیے پکارا جائے یعنی نماز کی اذان سنائی دے تو اللہ کی یاد کے لئے جلدی کرواور خرید وفروخت چھوڑدو۔

خلاصہ یہ ہے کہ سمندری جہاز میں ڈیوٹی کے دوران جمعہ کی نماز فرض نہیں ہے ، ایسے لوگوں کو ظہر کی نماز ادا کرنی ہے ۔

واللہ اعلم بالصواب

کتبہ
مقبول احمد سلفی