شیخ المقری علامہ علی محمد الضبّاع

[ساجد]

(٤) چوتھی شرط: طباعت مصحف سے تلف ہوجانے والے اجزاء کو طاہر اور مقدس مقام پر محفوظ کرلیا جائے یا انہیں جلا دیا جائے اور کسی تاجر کو فروخت نہ کئے جائیں اورنہ وہ کسی ایسے کام میں لائیں جائیں جن سے کتاب اللہ کی توہین ہوتی ہو۔
مذکورہ بالا تمام امو رپر عمل درآمد ہونے سے قبل مصحف مکمل ہونے کے بعد شیخ المقاری کو پیش کیا جائے تاکہ وہ مصحف کو حرف بحرف پڑھے تاکہ مصحف صحت و سقم کا اندازہ ہونے کے بعد اس کی ہر طرح سے اصلاح کرے اور آخر پر اپنی مہر تصدیق ثبت کرے اور مصحف طبع ہوجانے کے بعد ان میں سے ۲۵ نسخے لے کر شیوخ القراء کی خدمت میں پیش کئے جائیں جو از سر نو ان کی تحقیق کریں۔مزید تاکید کے بعد ان کو مختلف بلاداسلامیہ میں تقسیم کیا جائے تاکہ لوگ ان سے خوب استفادہ کرسکیں۔

 

[ساجد]

طباعت مصحف کے دیگر مراحل اور علامہ علی محمدالضبَّاع﷫کا کردار
وہ شخص جس کے ہاتھوں سے مصاحف ہو کرجائے اور جو تمام مصاحف کی مراجعت کرتے رہے، اس عظیم المرتبت ہستی کا اسم گرامی علامہ علی محمد الضبَّاع﷫ ہے۔ جب ان کے سوانح عمری لکھے گئے تو اس وقت ان کی عمر ۶۸ برس تھی اور انہیں۵۲ برس مصاحف کی قراء ات اور مراجعت کرتے ہوئے بیت چکے تھے۔ موصوف کی دین اسلام کے لیے بے لوث خدمات کا اندازہ اس سے ہوتا ہے کہ وہ اپنی آخری علالت میں بستر پر لیٹے ہوئے بھی مصاحف کی مراجعت کررہے ہوتے تھے اور مراجعت مصاحف کے بعد اس کی تصدیق بھی فرماتے تھے۔

 

[ساجد]

علامہ علی محمدالضبَّاع﷫ کے آخری ایام
علامہ علی محمدالضبَّاع﷫ کے آخری ایام میں یہ واقعہ پیش آیا کہ بعض شیوخ القراء ’ولا الضالین‘ کو مشابہ بالظاء پڑھتے تھے اور اس اداء پر قراء کے درمیان بحث و مباحثہ کا میدان گرم ہوگیا تو ایسے وقت میں علامہ علی محمد الضبَّاع﷫ کو دعوت دی گئی کہ اس موضوع پر بحث فرمائیں۔ انہوں نے اس موضوع پر دومہینوں میں۱۷۳ کتب کا مطالعہ فرمایا، اس کے بعد’ولا الضالین‘ کو مشابہ بالدال پڑھنے کے حق میں فیصلہ دیا۔ اسکی تفصیل مجلَّۃ الإسلام ۱۳۵۷ھ ماہ شعبان کے شمارہسے دیکھی جاسکتی ہے۔
علامہ علی محمدالضبَّاع﷫ بعض مصاحف کی ایک سال میں مراجعت فرماتے جیسا کہ حمزہ کی مراجعت ایک سال میں فرمائی اور بعض دفعہ تمام مصروفیات ترک کر کے مراجعت مصاحف میں مستغرق ہوجاتے اور کچھ مہینوں میں مراجعت فرماتے جیسے ’مصحف نافع‘ کی آٹھ مہینوں میں مراجعت فرمائی۔ اس طرح ڈیڑھ لاکھ مصاحف موصوف کی مراجعت سے طبع ہوئے۔

 

[ساجد]

وفات
علامہ علی محمدالضبَّاع﷫ کتاب اللہ العزیز کی بے شمار خدمات کے بعد ۷۵ برس کی بابرکت عمر پاکر ماہ شعبان المعظم ۱۳۸۰ھ بمطابق ۱۹۶۱ء جنوری کے مہینے میں اپنے خالق حقیقی سے جاملے۔اناﷲ وانا الیہ راجعون

ہم اللہ تعالیٰ کی بارگاہ میں دعاگو ہیں کہ اللہ تعالیٰ علامہ علی محمدالضبَّاع﷫ کی خدمات قرآنیہ کو شرف قبولیت سے نوازے اور موصوف کے لیے ذریعہ نجات بنائے۔ آمین

٭_____٭_____٭