ابھی وہ یاد تازہ ہے۔۔۔۔۔۔

[ماریہ انعام]

ابھی وہ یاد تازہ ہے
تمہی نے تو کہا تھا یہ
کہ دنیادرد دیتی ہے
غریبوں کے تنِ مردہ سے
خون کا آخری قطرہ
یہ دنیا چوس لیتی ہے

مگر تم دیکھنا اک دن
مسیحا بن کے زخموں کا
کروں گا درد کا درماں
پریشانی سے مرجھائے ہوئے
پژمردہ چہروں کو
تبسّم دے کے چھوڑوں گا


اور اب یہ آج کا دن ہے
بنے ہو ڈاکٹر اب تم
تمہارے مشورے کی فیس کا سن کر
غریبوں کی نگاہیں اک بے ہنگام شکوے سے
فضا کو تکنے لگتی ہیں
وہ اپنی بستیوں کو لوٹ جاتے ہیں
جہاں کی تنگ گلیوں میں
اگر اک روز جا نکلو
تو دم تک گھٹ کے رہ جائے
جہاں کا ایک لمحہ بھی
اگر سہہ لو تو مر جاؤ


تمہاری بات سچّی تھی
تمہی نے تو کہا تھا یہ
کہ دنیا درد دیتی ہے
غریبوں کے تنِ مردہ سے
خون کا آخری قطرہ
یہ دنیا چوس لیتی ہے!!!!