تمام خلیجی ممالک، ایک ویزا! مگر کب سے؟ آپ بھی جانئے

[کنعان]

تمام خلیجی ممالک، ایک ویزا! مگر کب سے؟ آپ بھی جانئے​

روزنامہ پاکستان، 11 اکتوبر 2015 (19:53)

ریاض (مانیٹرنگ ڈیسک) آسٹریا، بیلجیئم، ڈنمارک، فن لینڈ، فرانس، جرمنی، یونان، اٹلی اور سوئٹزرلینڈ سمیت متعدد یورپی ممالک نے آپس میں ”شینجن ویزہ“ کے نام سے ایک معاہدہ کر رکھا ہے جس کے تحت بارڈر چیک پوسٹس کا خاتمہ اور شہریوں کی ان ملکوں کے درمیان آزادانہ نقل و حرکت کو یقینی بنایا گیا ہے، اس ویزہ سسٹم کے تحت غیرملکی سیاحوں کو بھی ایک ملک سے دوسرے میں جانے کی سہولت فراہم کی گئی ہے۔

اسی معاہدے کی طرز پر ”گلف کوآپریشن کونسل“ (GCC) نے بھی اپنے 6 رکن ممالک کے درمیان معاہدہ کرنے کا فیصلہ کر لیا ہے۔ معاہدہ ہوجانے کے بعد یہ 6 ممالک غیرملکیوں کو ایک ہی ویزہ جاری کریں گے اور کوئی بھی غیرملکی یہ ویزہ لے کر ان 6 ممالک میں سے جس میں چاہے جا سکتا ہے۔

گلف کوآپریشن کونسل کے 6 رکن ممالک میں سعودی عرب، کویت، متحدہ عرب امارات، قطر، بحرین اور عمان شامل ہیں۔ عرب میڈیا کے مطابق گلف کوآپریشن کونسل کا جنرل سیکرٹریٹ اس ویزے پر کام کر رہا ہے اور توقع کی جا رہی ہے کہ آئندہ سال کے درمیان میں یہ ویزہ خواہش مند حضرات کی دسترس میں ہو گا اور وہ کم یا زیادہ یورپی ممالک ے شینجن ویزے کی طرح ان 6 عرب ممالک میں سفر کر سکیں گے۔ گلف نیوز کے مطابق حکام کا کہنا ہے کہ رکن ممالک کے وزرائے سیاحت کی آئندہ ہفتے عمان میں ہونے والی ملاقات میں اس ویزے کے متعلق معاملات کو حتمی شکل دے دی جائے گی۔ یہاں یہ امر قابل ذکر ہے کہ یہ ویزہ روزگار کے خواہشمندوں کے لیے نہیں ہے بلکہ صرف سیاحت کی غرض سے جانے والوں کو دیا جائے گا۔

 

[کنعان]

غیرملکی شہری مقیم کارڈ پر ویزے کے بغیر تمام گلف ممالک کا سفر نہیں کرسکتے : سعودی عرب نے واضح کر دیا​

روزنامہ پاکستان، 15 اکتوبر 2015 (13:26)

ریاض (مانیٹرنگ ڈیسک) سعودی پاسپورٹ ڈیپارٹمنٹ نے غیر ملکیوں کے لیے نئے مقیم کارڈ جاری کرنا شروع کر دیئے ہیں تاہم واضح کیا ہے کہ مقیم کارڈ پر تمام گلف ممالک میں ویزے کے بغیر سفر نہیں کیا جا سکتا۔

عرب میڈیا کے مطابق پاسپورٹ ڈیپارٹمنٹ کے ترجمان میجر طلال الشلہوب نے ان رپورٹس کی تردید کی جن کے مطابق غیرملکی ویزے کے بغیر ہی مقیم کارڈ پر گلف ممالک میں سفر کر سکتے ہیں ۔ ہیڈ کوارٹرمیں پاسپورٹ ڈیپارٹمنٹ کے ڈی جی سلیمان الیحیٰ کی موجود گی میں نئے کارڈ جاری کرنے کا افتتاح ہو گیا ہے جو پانچ سالوں کیلئے قابل استعمال ہو گا لیکن ہرسال آن لائن ہی تجدید کرانا ہو گی ۔

ترجمان نے بتایا کہ کارڈ پر نام ، نمبر ، تاریخ پیدائش ، پیشہ ، قومیت، ورک پرمٹ نمبر ، مذہب اور کفیل کا نام درج ہو گا۔ اُنہوں نے کہا کہ اگر میڈیکل انشورنس اور ورک پرمٹ رکھنے والے غیرملکیوں کی طرف سے ادائیگی کی گئی تو کارڈ جاری کیے جائیں گے جس سے نہ صرف وقت کی بچت ہو گی بلکہ دھوکہ دہی سے بھی نجات ملے گی لیکن تارکین وطن کو مستقل کارڈ جانے کا کوئی منصوبہ نہیں۔