جدہ کی تین تاریخی عمارتوں میں خوفناک آتشزدگی

[کنعان]

جدہ کی تین تاریخی عمارتوں میں خوفناک آتشزدگی
ریسکیو ٹیموں فوری کارروائی کر کے آگ پر قابو پالیا​

ابھا ۔ مریم الجابر
بدھ 16 اگست 2017م

سعودی عرب کے شہر جدہ میں تین تاریخی عمارتوں میں اچانک بھڑکنے والی آگ پر قابو پا لیا گیا ہے۔

العربیہ ڈاٹ نیٹ کے مطابق گذشتہ روز جدہ میں تین تاریخی عمارتوں کو اچانک آگ نے اپنی لپیٹ میں لے لیا تھا۔ تاہم ریسکیو ٹیموں اور فائر بریگیڈ کے عملے نے بروقت کارروائی کر کے عمارتوں کو بڑے نقصان سے بچا لیا۔

مکہ مکرمہ میں شہری دفاع کے ترجمان کرنل سعید سرحان نے بتایا کہ شہری دفاع کو جدہ کے وسط میں تین عمارتوں میں آتش زدگی کی اطلاع ملی تو اس پر فوری کارروائی کرتے ہوئے آگ پر قابو پانے کے لیے 10 ریسکیو ٹیمیں تشکیل دی گئیں۔

انہوں نے بتایا کہ ریسکیو آپریشن کے دوران احتیاطا اطراف میں مقیم شہریوں کو دوسرے مقامات پر منتقل کر دیا گیا تھا۔ تینوں عمارتوں میں لگنے والی آگ پر قابو پا لیا گیا ہے۔

ادھر جدہ میں محکمہ صحت کے ترجمان عبداللہ الغامدی نے بتایا کہ ایمرجنسی اور کرائسز سیل کے آپریشن کنٹرول روم کو شہرکی تین عمارتوں میں آتش زدگی کی اطلاع ملی جس پر فوری طور پر پانچ ریسکیو ٹیمیں جائے وقوعہ پر روانہ کی گئیں۔ انہوں نے بتایا کہ آتش زدگی کے بعد مقامی اسپتالوں میں ہنگامی حالت نافذ کر دی گئی تھی۔

جدہ بلدیہ کے میئر انجینیر سامی نوار نے بتایا کہ شہر میں تین تاریخی عمارتوں بیت القمصانی، بیت العشماوی اور بیت عبدالعال میں آتش زدگی کے واقعے کی تحقیقات شروع کر دی گئی ہیں۔ ان کا کہنا ہے کہ آتش زدگی کا شکار ہونے والی عمارتوں میں لوگ رہ رہے تھے تاہم انہیں بچا لیا گیا ہے۔ سامی نوار کا کہنا ہے کہ آتش زدگی کے نتیجے میں بیت القمصانی کا ایک حصہ منہدم ہونے کا خدشہ ہے۔

ح