حرم شریف حادثے میں گرنے والی کرین کی تعمیراتی کمپنی "بن لادن" پر پابندی عائد

[کنعان]

حرم شریف حادثے میں گرنے والی کرین کی تعمیراتی کمپنی "بن لادن" پر پابندی عائد​

ایکسپریس نیوز
منگل 15 ستمبر 2015

کمپنی کے ارکان اور عہدیداروں پر ملک سے باہر جانے پر بھی پابندی عائد کر دی گئی ہے​

مکہ المکرمہ: سعودی حکومت نے حرم شریف کرین حادثے کی ابتدائی تحقیقات کے بعد گرنے والے کرین کی تعمیراتی کمپنی پر پابندی عائد کر دی۔

عرب ٹی وی کے مطابق حرمین شریف میں پیش آنے والے افسوس ناک حادثے کی ابتدائی تحقیقاتی رپورٹ جاری کر دی گئی ہے جس کے مطابق حادثہ مجرمانہ سازش کا نتیجہ نہیں تھا بلکہ کرین کی غلط پوزیشن کے باعث پیش آیا۔ سعودی شاہی دیوان کے مطابق تعمیراتی کام میں استعمال ہونے والی کرین بن لادن تعمیراتی کمپنی کی ملکیت تھی جس پر پابندی لگا دی گئی ہے جب کہ کمپنی کےارکان اور عہدیداروں پر ملک سے باہر جانے پر بھی پابندی عائد کر دی گئی ہے۔

واضح رہے کہ گزشتہ دنوں قبل حرم شریف میں کرین گرنے کے نتیجے میں 107 عازمین حج شہید اور 200 سے زائد زخمی ہو گئے تھے جب کہ شہید ہونے والوں میں 11 پاکستانی بھی شامل ہیں۔

ح

مسجد الحرام میں المناک حادثہ، گیارہ ستمبر اور بن لادن خاندان، حیران کن اتفاق

 

[خضر حیات]

مکمل خبر یہ ہے ۔
اسامہ بن لادن اور بن لادن کمپنی کا آپس میں ایسا کوئی اتفاق نہیں جس طرف بعض احباب کا ذہن جا سکتا ہے ، اگر ایسا معاملہ ہوتا تو بن لادن کمپنی کو حرمین شریفین کیا کسی دور دراز علاقے کے کسی گاؤں میں بھی کوئی سرگرمی سر انجام دینے کی اجازت نہ دی جاتی ۔

 

[کنعان]

مکہ کرین حادثہ: بن لادن گروپ معطل، سفری پابندی عاید

بن لادن گروپ کو سعودی عرب میں مزید تعمیراتی ٹھیکے نہیں ملیں گے: شاہی دیوان

سعودی بن لادن گروپ نے کرین حادثے کی ذمے داری قبول کرنے سے انکار کیا ہے۔​

الریاض ۔ العربیہ ڈاٹ نیٹ
منگل 15 ستمبر 2015م

سعودی عرب کے شاہی دیوان نے بن لادن گروپ کو مکہ مکرمہ میں مسجد الحرام میں کرین گرنے کے افسوس ناک حادثے کے بعد ملک میں تعمیراتی منصوبوں کے مزید ٹھیکے نہ دینے کا فیصلہ کیا ہے۔

شاہی دیوان نے سعودی بن لادن گروپ کے ارکان پر سفری پابندی بھی عاید کر دی ہے اور ان پر یہ پابندی واقعے کی تحقیقات مکمل ہونے تک برقرار رہے گی۔ شاہی دیوان کے مطابق ابتدائی تحقیقات سے پتا چلا ہے کہ یہ حادثہ کسی مجرمانہ ارادے یا نیّت کا نتیجہ نہیں تھا۔ ابتدائی تحقیقاتی رپورٹ کے مطابق شدید آندھی اور کرین کی تنصیب سے متعلق حفاظتی معیارات کی خلاف ورزی کی بنا پر یہ المناک واقعہ پیش آیا تھا۔

شاہی دیوان نے حادثے میں جاں بحق ہونے والے ہر فرد کے خاندان کو دس لاکھ سعودی ریال (قریباً 2 لاکھ 70 ہزار ڈالرز) معاوضے کے طور پر ادا کرنے کا فیصلہ کیا ہے اور حادثے میں زخمی ہو کر زندگی بھر کے لیے معذور ہو جانے والے ہر فرد کے لیے پانچ لاکھ ریال ادا کرنے کا حکم دیا ہے۔

شاہی دیوان نے وزارت خزانہ کو حکم دیا ہے کہ بن لادن گروپ کے تمام منصوبوں کا جائزہ لے اور تحقیقات کی تکمیل تک بن لادن خاندان کے تمام افراد پر سفری پابندی عاید کر دے۔

واضح رہے کہ گذشتہ جمعہ کو شدید آندھی کی وجہ سے تعمیراتی کام کے لیے استعمال ہونے والی ایک بڑی کرین مسجد الحرام میں اچانک گر گئی تھی۔ اس ناگہانی حادثے میں ایک سو سات افراد جاں بحق اور دو سو چالیس زخمی ہو گئے تھے۔

سعودی عرب کے فرمانروا شاہ سلمان بن عبدالعزیز نے اس افسوس ناک حادثے میں زخمی ہونے والوں کی عیادت کی ہے اور کہا ہے کہ وہ اس حادثے کی تہ تک پہنچیں گے۔ انھوں نے کہا کہ ہم اس واقعے کی وجوہ کا پتا چلانے کے لیے تحقیقات کریں گے اور اس کے نتائج عوام الناس کے سامنے لائیں گے۔ انھوں نے جاں بحق افراد کے لواحقین کے ساتھ تعزیت کا اظہار بھی کیا ہے۔

دوسری جانب کثیرالقومی سعودی بن لادن گروپ نے اس الزام کی تردید کی ہے کہ کرین کو مناسب طریقے سے نصب کیا گیا تھا اور اس کو حفاظتی تدابیر کا خیال رکھے بغیر چلایا جا رہا تھا۔

بھارتی اخبار ٹائمز آف انڈیا نے ایک انجنئیر کے حوالے سے لکھا ہے کہ ''کرین کو انتہائی پیشہ ورانہ انداز میں تعمیراتی کام کے دوران چلایا جا رہا تھا اور جو کچھ رونما ہوا ہے، یہ اللہ کی مرضی تھی''۔

سعودی بن لادن گروپ مکہ مکرمہ میں 27 ارب ڈالرز کی لاگت سے ترقیاتی منصوبوں کو پایہ تکمیل کو پہنچا رہا ہے۔ سعودی حکومت نے شہر میں نئے مکانات ، ایک رنگ روڈ ، پارکنگ کی جگہوں اور نئے میٹرو نظام کی تعمیر کے لیے یہ خطیر رقم مختص کی ہے۔

سعودی بن لادن گروپ بن لادن خاندان کا ملکیتی ہے۔ اس گروپ کو 11 ستمبر 2001ء کو امریکا پر طیارہ حملوں کے بعد عالمگیر شہرت ملی تھی کیونکہ اسی خاندان کے ایک اہم چشم وچراغ اسامہ بن لادن پر ان حملوں کا ماسٹر مائنڈ ہونے کا الزام عاید کیا گیا تھا۔ت اہم بن لادن خاندان کے ارکان اس واقعے سے قبل بھی خود کو اسامہ بن لادن سے الگ تھلگ کرنے کی کوشش کرتے رہے تھے۔

ح