حضرت سعد بن عبادة ؓ کا قتل

[محمد فراز]

السلام عليكم
میری گزارش ہے اہل علم سے کے مجھے اس روایت کا ترجمہ اور صحت بتائیں اور یہ درست ہے کہ حضرت سعد بن عبادةؓ کا قتل جنوں نے کیا تھا اگر درست نہیں تو کیا صحیح بات ہے؟
روایت ملاحظہ ہوں
5103 - أَخْبَرَنَا مُحَمَّدُ بْنُ عَلِيٍّ الصَّنْعَانِيُّ بِمَكَّةَ، ثنا إِسْحَاقُ بْنُ إِبْرَاهِيمَ بْنِ عَبَّادٍ، أَنَا عَبْدُ الرَّزَّاقِ، عَنْ مَعْمَرٍ، عَنْ قَتَادَةَ قَالَ: " أَقَامَ سَعْدُ بْنُ عُبَادَةَ لَا يَبُولُ ثُمَّ رَجَعَ فَقَالَ: إِنِّي لَأَجِدُ فِي ظَهْرِي شَيْئًا، فَلَمْ يَلْبَثْ أَنْ مَاتَ، فَنَاحَتِ الْجِنُّ فَقَالُوا:
[البحر السريع]
نَحْنُ قَتَلْنَا سَيِّدَ الْخَزْرَجِ ... سَعْدَ بْنَ عُبَادَةْ
وَرَمَيْنَاهُ بِسَهْمَيْنِ ... فَلَمْ تُخْطِ فُؤَادَهْ
الكتاب: المستدرك على الصحيحين

 

[خضر حیات]

و علیکم السلام ورحمۃ اللہ وبرکاتہ
ترجمہ :
قتادۃ کہتے ہیں حضرت سعد بن عبادہ رضی اللہ عنہ پیشاب کرنے کی کوشش میں کھڑے ہوئے ، پھر لوٹ کر کہنے لگے ، مجھے پشت میں کچھ تکلیف محسوس ہورہی ہے ، اور پھر چند لمحات بعد وفات پا گئے ، جنوں نے بآواز بلند کہا :
خزرج کے سردار سعد بن عبادۃ کو ہم نے قتل کیا ہے ، انہیں دل پر دو تیر مارے ہیں ، اور نشانہ خطا نہیں ہوا ۔
یہی روایت محمد ابن سیرین سے بھی مروی ہے ، لیکن اس کے الفاظ یہ ہے کہ حضرت سعد ایک کوڑا کرکٹ والی جگہ پر آئے ، اور وہاں کھڑے ہو کر پیشاب کیا ہے ۔
روایت کی استنادی حیثیت :
یہ دونوں روایتیں آگے پیچھے مستدرک حاکم میں موجود ہیں ، طبرانی نے المعجم الکبیر وغیرہ بھی ان کو ذکر کیا ہے ۔ حافظ ہیثمی نے دونوں روایات کو منقطع قرار دیا ہے ، کیونکہ ابن سیرین اور قتادۃ دونوں نے سعد بن عبادہ رضی اللہ عنہ کا زمانہ نہیں پایا ۔ ( دیکھیے : مجمع الزوائد للہیثمی ج 1 ص 206 )
شیخ البانی رحمہ اللہ نے اس واقعے کو غیر صحیح قرار دیا ہے ، اور فرمایا :
لم أجد له إسنادا صحيحا على طريقة المحدثين
محدثین کے اصولوں کے مطابق اس کی کوئی صحیح سند مجھے نہیں مل سکی ۔ ( إرواء الغليل في تخريج أحاديث منار السبيل (1/ 95)
البتہ بعض اہل علم نے مجموع طرق ، اور مختلف مراسیل کو ملا کر اس واقعے کو حسن قرار دیا ہے ۔ ( دیکھیے : التکمیل لما فات تخریجہ من إرواء الغلیل ص 14 )