ریمنڈ ڈیوس کی آخری پیشی

[محمد نعیم یونس]

ریمنڈ ڈیوس کی آخری پیشی
ظفر سید
بی بی سی اردو ڈاٹ کام، اسلام آباد

• 30 جون 2017

امریکی کنٹریکٹر ریمنڈ ڈیوس نے حال ہی میں شائع ہونے والی سنسنی خیز آپ بیتی 'دا کنٹریکٹر' میں اپنی گرفتاری، مختلف اداروں کی جانب سے تفتیش، مقدمے، اور بالآخر رہائی کا ذکر بڑے دلچسپ انداز میں کیا ہے۔

اس دوران سب سے ڈرامائی دن مقدمے کا آخری دن تھا جب لاہور کی کوٹ لکھپت جیل میں قائم کردہ خصوصی سیشن کورٹ میں ریمنڈ ڈیوس پر قتل کی فردِ جرم عائد ہونا تھی۔ ڈیوس لکھتے ہیں کہ انھیں اس رات نیند نہیں آئی۔

عدالت میں پنجرہ
عدالت میں اس دن معمول سے زیادہ بھیڑ تھی۔ ڈیوس کو سٹیل کے پنجرے میں بند کر کے جج کے سامنے پیش کیا گیا۔ وہ کہتے ہیں کہ 'مجھے معلوم نہیں تھا کہ اس کا مقصد مجھے لوگوں سے بچانا ہے یا پھر لوگوں کو مجھ سے محفوظ رکھنا۔'
کتاب کے مطابق مائیکل ملن اور جنرل کیانی کے درمیان اومان میں خفیہ ملاقات ہوئی جس میں ریمنڈ ڈیوس کی رہائی پر غور کیا گیا
اس دوران وہاں موجود لوگوں کے رویے سے انھیں لگا جیسے وہ سبھی لوگ جج کی جانب سے ان کے قصوروار ہونے کا فیصلہ سنائے جانے کے منتظر ہیں تاکہ ’اس کے بعد وہ مجھے گھسیٹ کر کسی قریبی درخت سے لٹکا کر پھانسی دے دیں۔‘

عمان میں ٹاپ سیکرٹ ملاقات
ڈیوس کو عدالت میں ایک حیران کن بات یہ نظر آئی کہ اس دن وکیلِ استغاثہ اسد منظور بٹ غیر حاضر تھے جنھوں نے اس سے قبل خاصی سخت جرح کر رکھی تھی اور ان کا دعویٰ تھا کہ ڈیوس نے فیضان حیدر کو بغیر کسی وجہ کے ہلاک کیا ہے۔

کتاب کے مطابق بعد میں منظور بٹ نے کہا کہ جب وہ اس صبح عدالت پہنچے تو انھیں پکڑ کر کئی گھنٹوں تک قید رکھا گیا اور کارروائی سے دور رکھنے کے ساتھ ساتھ اپنے کلائنٹس سے بھی ملنے نہیں دیا گیا۔

'دا کنٹریکٹر' کے مطابق یہ معاملہ اس قدر اہمیت اختیار کر گیا کہ 23 فروری 2011 کو پاکستانی اور امریکی فوج کے سربراہان جنرل کیانی اور ایڈمرل مائیک ملن کے درمیان عمان میں ایک ٹاپ سیکرٹ ملاقات ہوئی جس کا بڑا حصہ اس بات پر غور کرتے ہوئے صرف ہوا کہ پاکستان عدالتی نظام کے اندر سے کیسے کوئی راستہ نکالا جائے کہ کسی نہ کسی طرح ڈیوس کی گلوخلاصی ہو جائے۔

موبائل فون پر مسلسل رابطہ
16 مارچ کی دوپہر کو جب عدالت کی کارروائی شروع ہوئی تو جج نے صحافیوں سمیت تمام غیر متعلقہ لوگوں کو باہر نکال دیا۔ لیکن ایک شخص جو کارروائی کے دوران کمرۂ عدالت میں موجود رہے اور وہ تھے پاکستانی خفیہ ادارے آئی ایس آئی کے اس وقت کے سربراہ جنرل شجاع پاشا۔
جنرل احمد شجاع پاشا نے ریمنڈ ڈیوس کی رہائی میں اہم کردار ادا کیا
اس وقت ڈیوس کو معلوم نہیں تھا لیکن اسی دوران پسِ پردہ خاصی سرگرمیاں ہو رہی تھیں۔ ان سرگرمیوں کے روحِ رواں جنرل پاشا تھے، جو ایک طرف امریکی سی آئی اے کے سابق سربراہ لیون پنیٹا سے ملاقاتیں کر رہے تھے تو دوسری جانب اسلام آباد میں امریکی سفیر کیمرون منٹر سے ان کی رابطے میں تھے۔

ڈیوس لکھتے ہیں کہ عدالت کی کارروائی کے دوران جنرل صاحب مسلسل کیمرون منٹر کو لمحہ بہ لمحہ کارروائی کی خبریں موبائل فون پر میسج کر کے بھیج رہے تھے۔

شرعی عدالت
عدالتی کارروائی چونکہ اردو میں ہو رہی تھی کہ ڈیوس کو پتہ نہیں چلا لیکن درمیان میں لوگوں کے ردِ عمل سے پتہ چلا کہ کوئی بڑی بات ہو گئی ہے۔ ڈیوس کے ایک امریکی ساتھی پال وکیلوں کا پرا توڑ کر پنجرے کے قریب آئی اور کہا کہ جج نے 'عدالت کو شرعی عدالت میں تبدیل کر دیا ہے۔'

'یہ کیا کہہ رہی ہو؟' ڈیوس نے حواس باختہ ہو کر کہا۔ 'میری کچھ سمجھ میں نہیں آ رہا۔'

کتاب کے مطابق مقدمے کو شرعی بنیادوں پر ختم کرنے کے فیصلے کے منصوبہ سازوں میں جنرل پاشا اور کیمرون منٹر شامل تھے۔ پاکستانی فوج بھی اس سے آگاہ تھی جب کہ صدر زرداری اور نواز شریف کو بھی بتا دیا تھا کہ کیا کھچڑی پک رہی ہے۔

ڈیوس لکھتے ہیں کہ جنرل پاشا کو صرف دو دن بعد یعنی 18 مارچ کو ریٹائر ہو جانا تھا اس لیے وہ سرتوڑ کوشش کر رہے تھے کہ یہ معاملہ کسی طرح نمٹ جائے۔ اور جب یہ معاملہ نمٹا تو ان کی مدتِ ملازمت میں ایک سال کی توسیع کر دی گئی اور مارچ 2011 کی بجائے مارچ 2012 میں ریٹائر ہوئے۔

'دا کنٹریکٹر' کے مطابق یہ جنرل پاشا ہی تھے جنھوں نے سخت گیر وکیلِ استغاثہ اسد منظور بٹ کو مقدمے سے الگ کرنے میں اہم کردار ادا کیا جو یہ مقدمہ مفت لڑ رہے تھے۔

گن پوائنٹ پر
ریمنڈ ڈیوس لکھتے ہیں کہ جب دیت کے تحت معاملہ نمٹانے کا فیصلہ کیا گیا تو اس میں ایک اڑچن یہ آ گئی کہ مقتولین کے عزیزوں نے اسے ماننے سے انکار کر دیا، چنانچہ 14 مارچ کو آئی ایس آئی کے اہلکار حرکت میں آئے اور انھوں نے تمام 18 عزیزوں کو کوٹ لکھپت جیل میں بند کر دیا، ان کے گھروں کو تالے لگا دیے گئے اور ان سے موبائل فون بھی لے لیے گئے۔

کتاب میں دعویٰ کیا گیا ہے کہ جیل میں ان لواحقین کے سامنے دو راستے رکھے گئے: یا تو وہ ایک لاکھ 30 ہزار ڈالر کا خون بہا قبول کریں ورنہ۔۔۔ کتاب میں لکھا ہے کہ عدالتی کارروائی کے دوران ان لواحقین کو عدالت کے باہر گن پوائنٹ پر رکھا گیا اور انھیں کہا گیا کہ وہ میڈیا کے سامنے زبان نہ کھولیں۔

یہ لواحقین ایک ایک کر کے خاموشی سے جج کے سامنے پیش ہوتے، اپنا شناختی کارڈ دکھاتے اور رقم کی رسید لیتے رہے۔

یہ بات بھی خاصی دلچسپ ہے کہ یہ رقم کس نے دی؟ اس وقت کی امریکی وزیرِ خارجہ ہلیری کلنٹن نے اس بات سے صاف انکار کیا تھا کہ یہ خون بہا امریکہ نے ادا کیا ہے۔ تاہم بعد میں خبریں آئیں کہ رقم آئی ایس آئی نے دی اور بعد میں اس کا بل امریکہ کو پیش کر دیا۔

جونھی یہ کارروائی مکمل ہوئی، ریمنڈ ڈیوس کو ایک عقبی دروازے سے نکال کر سیدھا لاہور کے ہوائی اڈے پہنچایا گیا جہاں ایک سیسنا طیارہ رن وے پر ان کا انتظار کر رہا تھا۔

اور یوں پاکستان کی عدالتی، سفارتی اور سیاسی تاریخ کا یہ عجیب و غریب باب بند ہوا۔

 

[محمد فیض الابرار]

باقی سب باتیں ایک طرف رہیں صرف یہ دیکھیں کہ ان خرافات کو کس وقت منظر عام پر لایا گیا ہے
میں نواز شریف کا حمایتی نہیں ہوں اور نہ ہی اس کا دفاع کرتا ہوں لیکن ایک بات ضرور ہے کہ یہ تمام داخلی اور خارجی عناصر اس کے خلاف جس طرح اکٹھے ہو کر میدان میں اترے ہوئے ہیں وہ اس معاملہ کو مشکوک بنا رہے ہیں

 

[خضر حیات]

اور یوں پاکستان کی عدالتی، سفارتی اور سیاسی تاریخ کا یہ عجیب و غریب باب بند ہوا۔

اسے عجیب وغریب کی بجائے ’ سیاہی ‘ سے تعبیر کرنا چاہیے ، جو ریمنڈ ڈیوس پورے پاکستان کے منہ پر مَل کے چلتا بنا۔

باقی سب باتیں ایک طرف رہیں صرف یہ دیکھیں کہ ان خرافات کو کس وقت منظر عام پر لایا گیا ہے
میں نواز شریف کا حمایتی نہیں ہوں اور نہ ہی اس کا دفاع کرتا ہوں لیکن ایک بات ضرور ہے کہ یہ تمام داخلی اور خارجی عناصر اس کے خلاف جس طرح اکٹھے ہو کر میدان میں اترے ہوئے ہیں وہ اس معاملہ کو مشکوک بنا رہے ہیں

ریمنڈ ڈیوس ایک ٹکے کا ہو کہ دو چار ٹکے کا ، ایجنٹ روز مرتے ہیں ، لیکن امریکہ کا اس کو بچانے کے لیے یہ سب کچھ کرنا ، اور پھر اس کو منظر عام پر بھی لانا ، اور پھر قاتل کا رہا ہونے کے بعد آپ بیتی میں ان سب باتوں کو کھول کھول کر بیان کرنا ، یہ پاکستانی حکومت اور عوام کے منہ پر تھپڑ مارنے والی بات ہے ۔ آپ یہ کہہ لیں ان واقعات میں بہت کچھ سچ کی بجائے جھوٹ بھی ہوسکتا ہے ، لیکن بہرصورت ان کا جھوٹ کو بھی یوں نشر کرنا ، اس بات کی دلیل ہے کہ یہ کمینے پاکستانیوں کو نفسیاتی طور پر ہرانا چاہتے ہیں ، ورنہ اگر کسی کے ساتھ ہمدردی کا معاملہ ہو ، تو انسان سچی باتیں بھی چھپا کر رکھتا ہے ۔

 

[محمد نعیم یونس]

اصل کتاب سے کوئی مستفید ہونا چاہے تو پی ڈی ایف ربط پیش خدمت ہے۔

 

[ابو عبدالله]

السلام علیکم ورحمۃ اللہ وبرکاتہ!

ایک واٹس ایپ گروپ میں شیئر ہونے والا میسج، جس سے کافی حد تک اتفاق کیا جاسکتا ہے.... واللہ اعلم

کنٹریکٹر ، پروپیگینڈے کی جدید شکل:
ایک ایسے وقت میں جبکہ پاک آرمی آپریشن ضرب عضب اور آپریشن رد الفساد کے بعد پارا چنار میں امن قائم کرنے میں کامیاب ہونے جا رہی ہے عین اسی وقت آرمی کی کامیابیوں سے دنیا کی نظریں ہٹانے کےلئے پاک فوج کے خلاف زہر آلود پروپیگینڈا کے طور پہ اس کتاب کو لانچ کیا گیا ہے ذرا ٹائمنگ چیک کریں آپ
عالمی ذرائع ابلاغ سے باخبر رہنے کی وجہ سے ہم یہ بھی جانتے ہیں کہ پاکستان سے ریمنڈ ڈیوس کو گرفتار کرنے کے بعد اس وقت تک رہا نہیں کیا گیا تھا جب تک پاکستان میں موجود بلیک واٹر کی تمام صلاحیتوں بارے اس کے ٹھکانوں بارے اس کے اہداف اور مقاصد بارے تمام تر معلومات حاصل نہیں کر لی گئی تھیں
امریکی سفارت خانے نے ریمنڈ ڈیوس کو امریکی کھانے کھلانے کی درخواست کی تھی اور ساتھ یہ بھی کہا تھا کہ یہ کھانا ہم خود پہنچا دیا کریں گے لیکن آئی ایس آئی نے ریمنڈ ڈیوس کو زہر دینے کے بُو سونگھ کی تھی اور امریکی سفارت خانے کے عزائم کو بھانپ لیا تھا اور امریکی سفارت خانے کی اس پیش کس کو رد کر دیا تھا
پھر کب ایک خاص مدت کے بعد ریمنڈ ڈیوس کو رہا کیا گیا تو اس سے پہلے پہلے پاکستان نے بلیک واٹر کا بوریا بستر یہاں سے گول کر دیا ہوا تھا
اور پھر کیا ہوا ، ریمنڈ ڈیوس کو امریکہ میں ایک خاتون کے ساتھ بدتمیزی کرنے کے جرم میں جیل بھیج دیا گیا اور وہاں وہ کئی سال قید رہا
یہ کتاب ریمنڈ ڈیوس کی لکھی ہوئے نہیں ہے بلکہ اسے امریکی سی آئی اے نے ترتیب دیا ہے تاکہ پاکستان آرمی اور دفاعی ادارے آئی ایس آئی کو خوب بدنام کیا جا سکے
اور ان دونوں اداروں کی کامیابیوں پہ پردہ ڈال کر عوام کو ان کے خلاف کیا جا سکے
صحافت کا طالب علم رہ چکنے کے سبب ہم یہ بھی جانتے ہیں کہ انفارمیشن ٹیکنالوجی اور میڈیا کیسے پروپیگینڈے کی شکل اختیار کرکے عوام کی رائے کو بدلنے میں کردار ادا کرتے ہیں
اور کتاب بھی تو پروپیگینڈے کی ایک شکل ہے
اور یاد رکھیئے کتاب ہمیشہ کہانی کی شکل میں لکھی جاتی ہے
کیونکہ کہانی شعور کی گہرائیوں کو ہِٹ کرتی ہے
والسلام


منقول

 

[محمد فیض الابرار]

ایک ایسے وقت میں جبکہ پاک آرمی آپریشن ضرب عضب اور آپریشن رد الفساد کے بعد پارا چنار میں امن قائم کرنے میں کامیاب ہونے جا رہی ہے عین اسی وقت آرمی کی کامیابیوں سے دنیا کی نظریں ہٹانے کےلئے پاک فوج کے خلاف زہر آلود پروپیگینڈا کے طور پہ اس کتاب کو لانچ کیا گیا ہے ذرا ٹائمنگ چیک کریں آپ

اقتصادی راھدری کا معاملہ بھی سامنے رکھیے گا
جیسا کہ بیان کیا گیا کہ یہ کتاب من حیث المجموع ایک طمانچہ ہے ہمارے قومی مزاج اور نظام پر

 

[ابو حمزہ]

دنیا میں شاید ہی کوئی ایسا ملک ہوگا جس کے خفیہ ادارے کے لوگ ریٹائر ہونے کے بعد پھر دوسرے ملک کے خفیہ ادارئے میں ملازمت کرنے لگ جاتے ہوں
یہ کارنامہ ہمارے خفیہ ادارے کے لوگ سر انجام دیتے ہین اور ہمارے ملک کے ٹاپ سیکرٹ ان کو بتا دیتے وہ بھی امریکہ مین گھر اور چند آسائشوں کے خاطر ، اس کا سبب یہ ہے کہ ہم نے 70 سال سے اپنی فوج کا احتساب نہیں کیا کہ یہ کس کے کھنے پر ویتنام میں گھستی ہے کس کھنے پر ، فلسطین میں قتل عام کرتی ہے اور کس کے کہنے پر اپنے مسلمانوں کو مارتی
ریمنڈ دیوس کے مطابق تو جنرل پاشا ایک بھاڑے کا ٹٹو ہے جو اپنے ہی لوگوں کو گن پواینٹ پر رکھتا ہے صرف چند ڈالر کے لیے ۔۔۔۔۔۔۔۔۔ اس آدمی سے حساب لینا چاہئے
یہ پاکستان کے وقار کے لئے ضروری ہے