سعودی عرب: مرس وائرس سے ہلاکتیں 282 ہو گئیں

[کنعان]

سعودی عرب: مرس وائرس سے ہلاکتیں 282 ہو گئیں​

سعودی عرب کے علاوہ تقریباً ایک درجن دیگر ممالک میں بھی مرس وائرس کی تصدیق ہو چکی ہے

سعودی عرب کے حکام کا کہنا ہے کہ سنہ 2012 سے اب تک مرس نامی کرونا وائرس کی زد میں آ کر ہلاک ہونے والوں کی تعداد 282 ہو گئی ہے۔

یہ تازہ اعداد و شمار ہسپتالوں کے ڈیٹا سے حاصل کیے گئے ہیں۔

یاد رہے کہ پیر کو نائب وزیر صحت کو معطل کردیا گیا ہے جن پر اس مرض پر قابو نہ پا سکنے کے سلسلے میں تنقید کی گئی تھی۔

سعودی عرب کے علاوہ تقریباً ایک درجن دیگر ممالک میں بھی مرس وائرس کی تصدیق ہو چکی ہے۔

سعودی حکام کا کہنا ہے کہ مرس (مڈل ایسٹرن ریسپائریٹری سنڈروم) وائرس سے متاثر ہونے والے افراد کی تعداد 688 ہے۔ اس سے قبل حکام نے ان مریضوں کی تعداد 575 بتائی تھی۔

سعودی وزارت صحت کے ترجمان طارق مدنی کا کہنا ہے کہ اگرچہ مریضوں کی تعداد میں اضافہ ہوا ہے لیکن اب کم لوگ اس مرض میں مبتلا ہو رہے ہیں۔

ترجمان کے مطابق جو افراد اس وائرس سے متاثر ہوئے ہیں ان میں سے 53 مریضوں کا علاج کیا جا رہا ہے۔

مرس سے متاثر ممالک

• سعودی عرب
• اردن
• قطر
• متحدہ عرب امارات
• فرانس
• جرمنی
• اٹلی
• تیونس
• مصر
• برطانیہ
• امریکہ

واضح رہے کہ ریاض، جدّہ اور دمام کے تین ہسپتالوں میں مرس کے علاج کے خصوصی انتظامات کیے گئے ہیں۔

واضح رہے کہ مرس نظام تنفس کو متاثر کرتا ہے جس کی وجہ سے بخار، سرسام یا نمونیا ہو جاتا ہے اور گردے ناکارہ ہو جانے کا خطرہ بڑھ جاتا ہے۔

کہا جاتا ہے کہ اس کے انفیکشن کی شرح میں اضافہ ہو رہا ہے۔ صحت کی عالمی تنظیم ڈبلیو ایچ او نے سعودی عرب سے انفیکشن کی جانچ میں امداد کی پیش کش کی ہے۔

جیسا کہ نام سے ظاہر ہے، مرس مشرق وسطیٰ کے علاقے سے مخصوص ہے۔

مبصرین کا کہنا ہے کہ سعودی باشندوں نے سوشل میڈیا پر اس سلسلے میں حکومت کی کارکردگی پر تشویش کا اظہار کیا ہے۔

مرس سے مرنے والوں کی تعداد میں آئے دن اضافے کے دوران گذشتہ پیر کو سعودی عرب کے وزیر صحت عبداللہ الربیعہ کو بغیر کسی وضاحت کے ان کے عہدے سے برخاست کر دیا گيا ہے۔

بدھ 4 جون 2014