سعودی عرب: 88 مشتبہ دہشت گرد گرفتار

[کنعان]

سعودی عرب: 88 مشتبہ دہشت گرد گرفتار​

مشتبہ افراد اندرون اور بیرون ملک حملوں کی منصوبہ بندی کر رہے تھے

سعودی وزارت داخلہ کے ترجمان منصور الترکی نے کہا ہے کہ مشتبہ افراد دہشت گردی کے حملوں کی منصوبہ بندی کر رہے تھے۔

سعودی عرب میں سکیورٹی فورسز نے اٹھاسی مشتبہ افراد کو اندرون اور بیرون ملک دہشت گردی کے حملوں کی منصوبہ بندی اور دہشت گرد گروپوں کے ساتھ تعلق کے الزام میں گرفتار کر لیا ہے۔

سعودی وزارت داخلہ نے ایک بیان میں کہا ہے کہ ان اٹھاسی مشتبہ افراد کی گذشتہ کئی ماہ سے کڑی نگرانی کی جا رہی تھی اور خاص طور پر انتہا پسندانہ نظریات رکھنے والے افراد کی نگرانی کی جارہی تھی۔ بیان میں مزید کہا گیا ہے کہ گرفتار کیے گئے مشتبہ دہشت گردوں میں سے انسٹھ کو پہلے بھی حراست میں لیا گیا تھا۔

وزارت داخلہ کے ترجمان میجر جنرل منصور الترکی نے اس بیان کے بعد ایک نیوز کانفرنس کی ہے اور بتایا ہے کہ ''ان مشتبہ افراد کو سعودی مملکت سے باہر دہشت گرد گروپوں سے تعلق کے الزام میں گرفتار کیا گیا ہے اور ان میں بعض نے بیرون ملک اپنے بچوں کو لڑنے کے لیے بھیجا ہے''۔

انھوں نے کہا کہ ''مشتبہ افراد سعودی عرب اور بیرون ملک دہشت گردی کی کارروائیوں کے مرتکب ہونے والے تھے''۔ انھوں نے وضاحت کی کہ ان مشتبہ افراد کے انتہا پسندانہ نظریات اور نوجوانوں کو انتہا پسندی کی جانب راغب کرنے کے لیے تبلیغ کی وجہ سے نگرانی کی جارہی تھی۔

ان کا کہنا ہے کہ گرفتار افراد نے چھ مختلف سیل قائم کر رکھے تھے اور یہ مکہ مکرمہ اور حائل سمیت ملک کے چار مختلف علاقوں میں واقع تھے۔ ان سیلوں میں شخصیات کے قتل کی سازش کی گئی تھی اور ان میں سب سے بڑے سیل کے ارکان کی تعداد اکاون تھی۔

سعودی خبررساں ایجنسی (ایس پی اے) کی جانب سے جاری کردہ وزارت داخلہ کے بیان کے مطابق ''کئی ماہ کی مانیٹرنگ اور سکیورٹی نگرانی کے بعد مشتبہ افراد پر ہاتھ ڈالا گیا ہے اور ان کی اندرون اور بیرون ملک دہشت گردی کے حملوں کی سازش کو ناکام بنا دیا گیا ہے۔ وہ بہت جلد اس سازش کو عملی جامہ پہنانے والے تھے''۔

وزارت داخلہ کا کہنا ہے کہ ان اٹھاسی افراد کو سعودی عرب کے مختلف علاقوں سے چھاپہ مار کارروائیوں کے دوران پکڑا گیا ہے۔ ان میں چوراسی سعودی شہری اور تین یمنی ہیں۔ فوری طور پر ایک مشتبہ شخص کی قومیت معلوم نہیں ہو سکی ہے۔

العربیہ ڈاٹ نیٹ: منگل 7 ذیعقدہ 1435هـ - 2 ستمبر 2014م

 

[کنعان]

ریاض: دہشت گردی پر امریکی سمیت 24 ملزمان کو قید​

سعودی عرب میں انسداد دہشت گردی کے مقدمات کی سماعت کرنے والی خصوصی فوج داری عدالت نے 22 سعودی شہریوں، ایک امریکی اور ایک یمنی کو دو سے27 سال قید کی سزائوں کا حکم دیا ہے۔ ان پر دارالحکومت ریاض میں دہشت گردی کی کارروائیوں کی منصوبہ بندی کا الزام عائد کیا گیا ہے۔

العربیہ ڈاٹ نیٹ کے مطابق ملزمان کے خلاف دہشت گردی کی دفعات کے تحت مقدمہ چلایا گیا۔ ان پر اہم شخصیات پر حملوں، تیل پائپ لائنوں کو بم دھماکوں سے تباہ کرنے، اہم حکومتی اور ریاستی تنصیبات پر حملے، ولی الامر کے خلاف بغاوت، سعودی عرب اور بحرین میں دہشت گردی کے لیے خفیہ گروہ تشکیل دینے، غیر قانونی طور پر اسلحہ اور رقوم جمع کرنے اور عام شہریوں کو حکومت کے خلاف اکسانے جیسے الزامات عائد کیے گئے ہیں۔

ریاض ۔ العربیہ ڈاٹ نیٹ: جمعرات 9 ذیعقدہ 1435هـ - 4 ستمبر 2014م