شام سے امن کا کوئی عندیہ نہیں ملا: کوفی عنان

[ابوحتف]

اقوام متحدہ اور عرب لیگ کے مشترکہ مندوب کوفی عنان نے منگل کے روز سیکیورٹی کونسل کے نام ایک پیغام میں کہا ہے کہ شام نے بشار الاسد کی جانب سے ملک میں تشدد ختم کرنے کے معاہدے کی روشنی میں "امن کا کوئی اشارہ" نہیں دیا۔

فرانسیسی خبر رساں ادارے "اے ایف پی" کو ملنے والے کوفی عنان کے پیغام میں کہا گیا ہے شام کے بعض شہروں سے سرکاری فوج دس اپریل کی ڈیڈ لائن سے پہلے باہر نکل چکی ہے، لیکن اس اںخلاء کے بعد انہوں نے نئے اہداف کو نشانہ بنا لیا ہے۔ کوفی عنان کے مطابق بشار الاسد کو اپنا طریقہ شروع سے تبدیل کرنا ہو گا تاکہ جنگ بندی مکمل کی جا سکے۔

دوسری جانب ملک کے اندر باغی فوجیوں پرمشتمل فری آرمی کی مشترکہ قیادت نے شامی حکومت کو گولا باری مکمل بند کرنے اور فوجی لاؤ لشکر واپس بلوانے کے لئے 48 گھنٹوں کی مہلت دی ہے ورنہ اس کے بعد وہ سرکاری فوج کے خلاف اپنے حملے تیز کر دیں گے۔

مشترکہ کمان کے سربراہ کرنل قاسم سعد الدین نے اے ایف پی کو بتایا کہ ہمیں حکومت پر اعتماد نہیں اور نہ ہی میں یقین ہے کہ شہروں سے جنگی لاؤ لشکر واپس بلوائے جائیں گے، تاہم اس کے باوجود ہم اڑتالیس گھنٹے انتظار کریں گے۔ اس مدت کے دوران ہم دفاعی پوزیشن اختیار کئے رکھیں گے۔

اپنی بات جاری رکھتے ہوئے انہوں نے کہا کہ اگر گولا باری نہ رکی اور فوج کا انخلاء عمل میں نہ آیا تو ہم اپنی فوجی کارروائیوں میں تیزی لائیں گے۔ درایں اثنا شام کی قومی کونسل کی ترجمان بسمہ قضمانی نے کوفی عنان کے منصوبے پر عملدرآمد کی خاطر نئی شرائط کو مسترد کرتے ہوئے کہا ہے کہ ان پر عملدرآمد ممکن نہیں ہے۔

مس قضمانی نے جینوا میں ایک نیوز کانفرنس سے خطاب کرتے ہوئے کہا کہ ہمیں نئی شرائط میں غیر مقبولیت کی بو آ رہی ہے۔ مجھے سمجھ نہیں ہے کہ ان شرائط کو کوفی عنان کیسے قبول کرے گا۔
العربیہ ڈاٹ نیٹ