طلاق کے بارہ میں ایک سوا ل۔

[ابو عقاشہ]

السلام علیکم ورحمتہ اللہ

محترم سوال یہ ہے کہ
بکر کا نکاح ٹیلوفون کے ذریعے قرار پاتا ہے ۔
کچھ عرصہ کے بعد بکر (بغیر ہم بستری کے) اپنی بیوی کو طلاق دے دیتا ہے۔
اب اس سلسلے میں حق مہر کہ کیا معاملہ ہو گا؟
کیا حق مہر پورا ادا کرنا ہوگا؟
یا کہ آدھا؟
قرآن و حدیث کہ روشنی میں وضاحت فرمائیں۔
جزاک اللہ خیراً کثیراً

 

[ابوالحسن علوی]

اگر منکوحہ کو خلوت صحیحہ اور مباشرت سے پہلے طلاق دے دی جائے تو اس صورت میں مقرر شدہ حق مہر کا نصف دینا ہو گا۔اور اگر عورت اس نصف حق مہر کو معاف کردے تو اس کا بھی اسے اختیار ہے اور اگر خاوند پورا حق مہر دے دے تویہ حسن سلوک ہے اور مستحب امر ہے۔ ارشاد باری تعالیٰ ہے:
{وَإِن طَلَّقْتُمُوهُنَّ مِن قَبْلِ أَن تَمَسُّوهُنَّ وَقَدْ فَرَضْتُمْ لَهُنَّ فَرِيضَةً فَنِصْفُ مَا فَرَضْتُمْ إَلاَّ أَن يَعْفُونَ أَوْ يَعْفُوَ الَّذِي بِيَدِهِ عُقْدَةُ النِّكَاحِ وَأَن تَعْفُواْ أَقْرَبُ لِلتَّقْوَى وَلاَ تَنسَوُاْ الْفَضْلَ بَيْنَكُمْ إِنَّ اللّهَ بِمَا تَعْمَلُونَ بَصِيرٌ }البقرة237
اور اگر تم ان عورتوں کو چھونے سے پہلے طلاق دے دو اور تم نے ان کا حق مہر مقرر کیا ہوتو تم پر مقرر کردہ حق مہر کا نصف ہے سوائے اس کے کہ وہ عورتیں معاف کردیں(یعنی نصف حق مہر) یا وہ معاف کر دے(یعنی پورا دے دے) جس کے ہاتھ میں نکاح کی گرہ ہے۔ اور اگر تم معاف کر دو(یعنی پورا حق مہر ادا کر دو) تو یہ تقوی کے زیادہ قریب ہے۔ اور آپس کی فضیلت کو مت بھولو(یعنی جو اللہ تعالیٰ نے مردوں کو عورتوں پر دی ہے)، بے شک اللہ تعالی جو تم عمل کرتے ہو اسے دیکھ رہا ہے۔
واللہ اعلم بالصواب

 

[انس]

جزاکم اللہ خیرا علوی بھائی!
اور اگر حق مہر مقرر نہیں گیا تو اس کی وضاحت بھی فرما دیں!

 

[ابوالحسن علوی]

اگر تو کسی منکوحہ کا حق مہر مقرر نہ ہوا ہو اور اسے خلوت صحیحہ ا ور مباشرت سے پہلے طلاق دے دی جائے تو اس کے حق مہر کے بارے ارشاد باری تعالیٰ ہے:
{لاَّ جُنَاحَ عَلَيْكُمْ إِن طَلَّقْتُمُ النِّسَاء مَا لَمْ تَمَسُّوهُنُّ أَوْ تَفْرِضُواْ لَهُنَّ فَرِيضَةً وَمَتِّعُوهُنَّ عَلَى الْمُوسِعِ قَدَرُهُ وَعَلَى الْمُقْتِرِ قَدْرُهُ مَتَاعاً بِالْمَعْرُوفِ حَقّاً عَلَى الْمُحْسِنِينَ }البقرة236
تم پر کوئی گناہ نہیں ہے اگر تم اپنی ان عورتوں کو طلاق دے دو جنہیں تم نے نہ چھوا ہو یا ان کا حق مہر نہ مقرر کیا ہو۔ اور تم ان عورتوں کو کچھ نہ کچھ دے دیا کرو۔ وسعت و فراخی والا اپنی حیثیت کے مطابق اور تنگدست اپنی حیثیت کے مطابق، یہ دینا ہے معروف طریقہ سے اور حق ہے احسان کرنے والوں پر۔