غصے کے احکام و مسائل

[ابو عکاشہ]

غصے کے احکام و مسائل​

الَّذِينَ يُنفِقُونَ فِي السَّرَّاءِ وَالضَّرَّاءِ وَالْكَاظِمِينَ الْغَيْظَ وَالْعَافِينَ عَنِ النَّاسِ وَاللَّـهُ يُحِبُّ الْمُحْسِنِينَ ﴿آل عمران: ١٣٤﴾​

​

جو لوگ آسانی میں سختی کے موقع پر بھی اللہ کے راستے میں خرچ کرتے ہیں، غصہ پینے والے اور لوگوں سے درگزر کرنے والے ہیں، اللہ تعالیٰ ان نیک کاروں سے محبت کرتا ہے (134)سورة آل عمران​

(1)​

صحیح بخاری> کتاب الأ دب​

باب : غصے سے پرہیز کرنا​

حدیث نمبر : 6116​

سیدنا ابوہریرہ رضی اللہ عنہ سے روایت ہے کہ ایک شخص نے رسول اللہ صلی اللہ علیہ وسلم سے عرض کی کہ مجھ کو نصیحت فرمائیے۔ آپ صلی اللہ علیہ وسلم نے فرمایا: " غصہ نہ کیا کر۔" اس نے کئی مرتبہ دریافت کیا (لیکن) آپ صلی اللہ علیہ وسلم نے یہی فرمایا: " غصہ نہ کیا کر۔"​

(2)​

عن سهل بن معاذ عن أبيه أن رسول الله صلی الله عليه وسلم قال من کظم غيظا وهو قادر علی أن ينفذه دعاه الله عز وجل علی روس الخلاق يوم القيامة حتی يخيره الله من الحور العين ما شا ء​

سیدنا سہل بن معاذ رضی اللہ تعالیٰ عنہ اپنے والد سیدنا معاذ رضی اللہ تعالیٰ عنہ سے روایت کرتے ہیں کہ نبی صلی اللہ علیہ وآلہ وسلم نے فرمایا کہ جس شخص نے غصہ کو پی لیا حالانکہ وہ اسے نافذ کرنے پر قادر تھا تو اللہ تعالیٰ روز قیامت ساری مخلوقات کے سامنے اسے بلائیں گے اور اسے اختیار دیں گے جو حور تو چاہے پسند کرلے ۔​

سنن ابوداؤد:حدیث نمبر 4777 تخریج : (اسنادہ حسن )أخرجه ابن ماجه ،الزھد،باب الحلم ،ح : 4186 من حدیث عبداللہ بن وھب والترمذی ،ح : 2021 من حدیث سعید بن أ بی ایوب به ، وقال '' حسن غریب''

​

فائدہ (ابوعمار عمر فاروق سعیدی حفظہ اللہ ) :​

قران مجید میں اللہ تعالٰی نے( وَالْكَاظِمِينَ الْغَيْظَ وَالْعَافِينَ عَنِ النَّاسِ) ﴿آل عمران: ١٣٤﴾​

کے الفاظ سے غصہ پی جانے کو اھل ایمان کی اہم صفات میں سے شمار کیا ہے ۔​

(3)​

صحیح بخاری> کتاب الأ دب​

باب : غصے سے پرہیز کرنا​

حدیث نمبر : 6114​

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: " پہلوان وہ نہیں ہے جو (کشتی لڑنے میں) اپنے مقابل کو گرا دے بلکہ پہلوان وہ ہے جو غصے کے وقت اپنے آپ کو قابو میں رکھے۔"​

غصہ کو ختم کرنے والے بعض شرعی طریقے :​

(1) أعوذ باللہ من الشیطان الرجیم پڑھ لے ۔​

سنن ابوداؤد: کتاب الادب​

باب : غصے سے متعلق احکام و مسائل​

حدیث نمبر 4781​

سیدنا سلیمان بن صرد رضی اللہ عنہ سے روایت ہے کہ دو آدمیوں نے رسول اللہ صلی اللہ علیہ وآلہ وسلم کے سامنے گالی گلوچ کیا تو ان میں سے ایک شخص کی آنکھیں مارے غصہ کے لال پیلی ہوگئیں اور اس کی باچھیں پھولنے لگیں تو رسول اللہ صلی اللہ علیہ وآلہ وسلم نے فرمایا کہ بیشک میں ایسا کلمہ جانتا ہوں کہ اگر یہ اسے کہے کہ تو اس کا غصہ جاتا رہے وہ کلمہ أَعُوذُ بِاللَّهِ مِنْ الشَّيْطَانِ الرَّجِيمِ ہے۔ وہ شخص کہنے لگا کہ آپ کا خیال ہے کہ مجنون ہوں؟​

تخریج : اخرجه مسلم ،کتاب البر والصلة ، باب فضل من یملك نفسه عند الغضب ... الخ ، ح : 2610 من حدیث ابی معاویه الضریر ، والبخاری ،بدء الخلق ،باب صفة ابلیس و جنودہ ، ح : 2382 من حدیث الأ عمش به​

​

فوائد و مسائل (ابو عمار عمر فاروق سعیدی حفظہ اللہ):​

1 ۔ شرعی غیرت کے علاوہ بے انتہا غصہ شیطانی اثر ہوتا ہے اور اس کا علاج تعوذ ہے بشرطیکہ بندہ اس حقیقت کا ادراک رکھتا ہو ۔​

2 ۔ غیر شرعی غصے کی ایک نحوست یہ بھی ہے کہ انسان حق قبول نہیں کرتا ہے ۔​

علامہ ابن عثیمین رحمہ اللہ کہتے ہیں کہ کسی کے لیے جائز نہیں کہ وہ کسی کو غصہ کی حالت میں دیکھے تو اسے کہے کہ '' اللہ کا ذکر کرو یا نبی صلی اللہ علیہ وسلم پر درور بھیجو ''(جیسا کہ عرب میں رواج ہے)​

بلکہ رسول مقبول صلی اللہ علیہ وسلم کی سنت پر عمل کرتے ہوئے اسے کہا جائے گا کہ '' شیطان مردود کے شر سے اللہ کی پناہ مانگو''​

ثمرات التدوین ص 243​

(2) اپنی کیفیت کو بدل دے ،یعنی اگر کھڑا ہے تو بیٹھ جائے،بیٹھا ہے تو لیٹ جائے. اور یہ بھی ہوسکتا ہے کہ اس جگہ کو چھوڑ کر چلا جائے ۔​

سنن ابوداؤد: کتاب الادب​

باب : غصے سے متعلق احکام و مسائل​

حدیث نمبر 4782​

سیدنا ابوذر رضی اللہ تعالیٰ عنہ سے روایت ہے کہ رسول اللہ صلی اللہ علیہ وآلہ وسلم نے ہم سے فرمایا کہ جب تم میں سے کسی کو غصہ آئے اور وہ کھڑا ہو تو اسے چاہیے کہ وہ بیٹھ جائے پھر اگر بیٹھنے سے غصہ زائل ہوجائے تو ٹھیک ہے ورنہ پھر لیٹ جائے ۔​

تخریج : (صحیح ) اخرجه البیھقی فی شعب الایمان۔ ح : 8284، البغوی فی شرح السنه ، ح : 3584من حدیث ابی داؤد به ، وھو فی مسند احمد 5/152 ،و اطراف المسند : 6/199 ، وصححه ابن حبان ،ح : 1973​

فائدہ (ابو عمار عمر فاروق سعیدی حفظہ اللہ ):​

غصہ آجانے کی صورت میں آدمی کو چاہیے کی ہر طرح سے پر سکون رہنے کی کوشش کرے اور اپنی ہیئت کو بدل لے اور وضو کر لینا بہترین حل ہے جیسا کہ درج ذیل حدیث میں آرہا ہے ۔​

​

(3) وضو کرلے ۔​

سنن ابوداؤد: کتاب الادب​

باب : غصے سے متعلق احکام و مسائل​

حدیث نمبر 4784​

ابووائل قاصّ(واعظ) کہتے ہیں کہ ہم عروہ بن محمد السعدی کے پاس گئے۔ ایک شخص نے ان سے گفتگو کی تو انہیں غصہ دلا دیا۔ چنانچہ وہ کھڑے ہوئے اور وضو کیا پھر فرمایا کہ مجھے میرے والد نے میرے دادا عطیہ کے واسطہ سے بیان کیا کہ رسول اللہ صلی اللہ علیہ وآلہ وسلم نے فرمایا کہ غصہ شیطانی اثر سے آتا ہے اور شیطان آگ سے پیدا ہوا ہے اور آگ کو پانی بجھا دیتا ہے پس جب تم میں سے کسی کو غصہ آئے تو اسے چاہیے کہ وضو کرلے۔​

تخریج: (اسنادہ حسن) اخرجه احمد : 4/226 من حدیث ابراھیم بن خالد به *عروہ و ابوہ وثقھما ابن حبان ، و الحاکم ، الذھبی : 4 / 327،328 و غیرھما، فحدیثھما لا ینزل عن درجة الحسن​

 

[محمد ارسلان]

جزاک اللہ خیرا

 

[کنعان]

السلام علیکم

ہائیڈنگ میں سینٹر الائنمنٹ درست ھے، اگر آپ کو پورے مضمون پر سینٹر الائنمنٹ پسند ھے تو بہتر ھے مگر اصول اور خوبصورتی رائٹ الائنمنٹ میں ہی مفید ہوتی ھے۔ ایک حدیث ختم ہونے کے بعد انڈنٹ ضرور دیں ورنہ معلوم نہیں ہوتا کہ کہاں سے عبارت شروع ہوئی اور کہاں ختم۔

والسلام