کوئٹہ:2 دھماکوں میں ڈپٹی کمشنر اور 11 طالبات ہلاک، فائرنگ جاری

[حسن شبیر]

پاکستان کے صوبہ بلوچستان کے دارالحکومت کوئٹہ میں دو دھماکوں میں کم از کم گیارہ طالبات اور کوئٹہ کے ڈپٹی کمشنر ہلاک اور اسسٹنٹ کمشنر سمیت بیس سے زائد لوگ زخمی ہوئے ہیں۔
پولیس حکام کے مطابق پہلا دھماکا سنیچر کی دوپہر سردار بہادر خان ویمن یونیورسٹی کی ایک بس میں ہوا اور اس دھماکے کی زخمی طالبات کو بولان میڈیکل کمپلیکس لے جایا گیا جہاں شعبہ حادثات میں دوسرا دھماکہ ہوا جس کے بعد فائرنگ کا سلسلہ شروع ہو گیا جو ابھی تک جاری ہے۔
حکام کے مطابق سات سے آٹھ مسلح افراد نے ہسپتال کے اندر عملے اور مریضوں کو یرغمال بنایا ہوا ہے اور وہی فائرنگ کر رہے ہیں۔
شعبہ حادثات میں ہونے والے دھماکے کی نوعیت معلوم نہیں ہو سکی ہے۔
بلوچستان کے وزیراعلیٰ کے ترجمان جان محمد بلیدی نے بی بی سی کو بتایا ہے کہ جب دوسرا دھماکا ہوا تو کوئٹہ کے ڈپٹی کمشنر اور اسسٹنٹ کمشنر دونوں ہسپتال میں موجود تھے اور ڈپٹی کمشنر عبدالمنصور کاکڑ ہلاک اور اسسٹنٹ کمشنر انور علی شر زخمی ہوئے ہیں۔
پاکستان ٹیلی ویژن کے مطابق دھماکے میں ڈائریکٹر جنرل ہیلتھ بھی زخمی ہونے والوں میں شامل ہیں۔
یونیورسٹی کی ایک اہلکار کے مطابق پہلا دھماکہ اس وقت ہوا جب بس بروری روڈ پر جا رہی تھی۔
ابتدائی اطلاعات کے مطابق یونیورسٹی کی بس پر حملہ بس میں نصب شدہ ایک ریموٹ کنٹرول بم کے ذریعے کیا گیا۔ حملے میں نشانہ بننے والی بس مکمل طور پر تباہ ہو گئی ہے۔
سرکاری ٹی وی چینل پی ٹی وی کے مطابق پولیس کا کہنا ہے کہ امدادی کارروائیاں جاری ہیں اور دوسری جانب حملے کی عینی شاہدین سے اطلاعات بھی اکٹھی کی جا رہی ہیں۔
ان دھماکوں کی ذمہ داری ابھی تک کسی گروپ یا فرد نے قبول نہیں کی ہے۔ یہ بلوچستان میں نئی حکومت کی تشکیل کے بعد کوئٹہ میں دہشتگردی کی پہلی بڑی واردات ہے۔
وزیرِاعظم میاں محمد نواز شریف نے ویمن یونیورسٹی کی بس پر حملے کی شدید مذمت کی ہے۔
یاد رہے کہ سردار بہادر خان ویمن یونیورسٹی بلوچستان میں خواتین کی واحد یونیورسٹی ہے۔ یونیورسٹی کی ویب سائٹ کے مطابق یونیورسٹی میں تقریباً تین ہزار طالبات زیرِ تعلیم ہیں۔
دریں اثنا آج صبح بلوچستان کے شہر زیارت میں واقع پاکستان کے بانی محمد علی جناح کی رہائش گاہ زیارت ریزیڈنسی کے اطراف چار زوردار دھماکے ہوئے ہیں جن سے لکڑی سے بنی اس عمارت کی دیواروں کے سِوا تمام سامان جل کر تباہ ہوگیا۔ کالعدم تنظیم بلوچ لبریشن آرمی نے اس دھماکے کی ذمہ داری قبول کی ہے۔ ربط

 

[حسن شبیر]

امریکن ہیلی کاپٹر ایبٹ آباد تک پہنچ جاتے ہیں، دھشت گرد مہران بیس میں گھس کر تباہی مچا دیتے ہیں، کامرہ بیس کے اندر دھشت گرد چلے جاتے ہیں، جی ایچ کیو پر اٹیک ہوجاتا ہے، خوکش افغآنستان کے بارڈر سے ہمارے شہروں میں گھس آتے ہیں،سردار بہادر خان ویمن یونیورسٹی کی ایک بس میں دھماکہ،بولان میڈیکل کمپلیکس کےشعبہ حادثات میں دھماکہ، قصہ مختصرقائدکی رہائش گاہ (اے قائد ہم تم سے ،شرمندہ ہیں)
تک کو جلا دیا جاتاہے لیکن انٹلیجنس ادارے سو رہے ہوتے ہیں۔۔
یا پھر بجٹ لے کر اس پر سیاسی پارٹیاں توڑتے اور بناتے ہیں۔۔ جب عوام کو اللہ کے آسرے پر چھوڑ دیا گیا ہے تو پھر عوام سے 687 ارب کا بجٹ کس خوشی میں لے رہے ہیں۔؟ اس ملک کی انٹیلیجنس اور سیکیورٹی اداروں کی ذمہ داری ہے کہ وہ ملک میں امن امان قائم کرے اور اپنے بجٹ کو حلال کرے ورنہ سیکیورٹی کے نام پر یہ لوٹ مار بند کرے۔
سیاسی حکومتیں آتی جاتی ہیں لیکن ادارے ہمیشہ کیلئے ہوتے ہیں اسلیئے سارے اپنے ساکھ اور کاکردگی کو بہتر بنائیں تا کہ قوم آپ پر فخر کر سکے۔
اتنے بڑے سیکیورٹی فورسز کے باوجود نہ تو ملک کے اندر عوام محفوظ ہیں اور نہ ملک کے بارڈر۔۔
اے قائد ہم تم سے ،شرمندہ ہیں...
میں مسلمان ہوں اور پاکستان میری پہچان ہے

 

[حسن شبیر]

لاکھوں قربانیاں دے کر یہ ملک ہمیں دینے والے کی

آخری نشانی کو آج تباہ کر دیا گیا

اور میرے سمیت ہماری پوری قوم سب کچھ بھول بھال کر ٹی وی کے سامنے میچ میں یوں مگن ہے جیسے اسکی فتح ہماری عزت کو آسمانوں کی بلندیوں پر لے جائے گی۔۔۔۔۔۔۔۔۔۔۔
ہم سے بڑا غیرت مند کوئی ہو گا کیا؟؟؟