یہ الیکٹرک گاڑیاں اب پاکستان میں انتہائی کم قیمت پر دستیاب

[کنعان]

یہ الیکٹرک گاڑیاں اب پاکستان میں انتہائی کم قیمت پر دستیاب​

روزنامہ پاکستان، 28 جنوری 2016

اسپائلر: الیکٹرک گاڑی

​

اسلام آباد (مانیٹرنگ ڈیسک) دنیا گلوبل وارمنگ کے خطرے سے بھی دوچار ہے اور پٹرولیم مصنوعات کی قیمتیں بھی کافی زیادہ ہیں۔ ایسے میں برقی توانائی سے چلنے والی گاڑیاں وقت کی اہم ضرورت ہیں، تاکہ ہم گلوبل وارمنگ کے خطرے کو کم کرکے دنیا کو تباہی سے بھی بچا لیں اور پٹرول کی مد میں اٹھنے والے اخراجات سے بھی بچ جائیں۔ ترقی یافتہ ممالک میں پہلے ہی برقی توانائی سے چلنے والی گاڑیاں متعارف کروائی جا چکی ہیں اور اب پاکستان میں ان گاڑیوں کے کچھ ماڈل متعارف کروا دیئے گئے ہیں۔

پاکستان میں یہ ماڈلزامریکی کار ساز کمپنی ”زار موٹرز“ (Zar Motors) نے متعارف کروائے ہیں۔ ان میں منی کیب اور ایک لوڈر گاڑی شامل ہے۔

”زار منی کیب“ 3 پہیوں والی گاڑی ہے جس کی بیٹری 80 فیصد تک چارج ہونے کے لیے 2 گھنٹے کا وقت لیتی ہے۔

اس کی ایک بار بیٹری فل کر دی جائے تو یہ 130 سے 150 کلومیٹر کا سفر طے کر سکتی ہے۔
اس میں ڈرائیور سمیت 4 افراد کے بیٹھنے کی گنجائش ہے اور یہ پاکستان میں عام پائے جانے والے رکشوں سے کہیں زیادہ آرام دہ بھی ہے۔

پاکستان میں اس کی قیمت 2 لاکھ 40 ہزار روپے رکھی گئی ہے۔

”زار لوڈر“ گاڑی سوزوکی کے کیری ڈبوں کا متبادل ہے۔ یہ بھی تینوں پہیوں والی گاڑی ہے اور 750 کلوگرام تک وزن لیجانے کی صلاحیت رکھتی ہے۔

اس کی قیمت اڑھائی لاکھ روپے ہے۔ یہ دونوں گاڑیاں گارنٹی کے ساتھ مارکیٹ میں موجود ہیں۔

کمپنی ان کی بیٹریوں کی 18 ماہ، موٹر، چارجر اور کنٹرولر کی 12 ماہ گارنٹی دیتی ہے۔

زار موٹرز کے نمائندے نے ویب سائٹ ”پروپاکستانی“ سے گفتگو کرتے ہوئے بتایا کہ ان گاڑیوں میں جیل بیٹریاں (Gel Batteries) استعمال کی گئی ہے اس لیے ان کی مینٹی نینس کا کوئی جھنجھٹ نہیں۔ ان بیٹریوں کی اوسط عمر 3 سال یا اس سے زیادہ ہے۔

نمائندے نے بتایا کہ ان گاڑیوں کی بیٹریاں مکمل چارج ہونے میں 3 سے 4 گھنٹے کا وقت لیتی ہیں۔